Day 7 1/11/2013
行走里數 : 93km
參觀景點 :
佩那宮 Palácio da Pena / Pena Palace
洛卡岬 Cabo da Roca(羅卡角，天之涯地之角，歐陸的最西端)
今日我哋會去呢個Sintra 到睇佩那宮 Palácio da
Pena / Pena Palace同埋 Cabo da Roca (羅卡角，天之涯地之角，歐陸的最西端)到睇嘢，由Lisbon 去 Sintra 大概半個鐘就會到。今朝都係食完個自製早餐，大概係0930就出發喇。好快就去到 Sintra 區啦，不過就係行D山路喎，咁我哋都係跟GPS行，兜來兜去，行行下有架車係我哋後面跟得好埋，於是我哋就停埋一邊俾佢行先。之後行行下去到一個閘到，係我哋前面架車開咗個閘入咗去，我見個GPS都係指行入去喎，於是我就駛埋入去喇。之後行行下，我哋就見到個佩那宮喎，但係就見唔到有車位泊，有得泊嘅就啱啱經過咗，於是我就將架車倒後準備泊車。係呢個時候又見都頭先架車喎，重有個女仔落咗車企係到示意我落低車窗。然後，就同我講呢條路係Private
Road，咁我就當然係話跟住個GPS行啫，佢叫我唔好跟喇，指我駛去另外一邊出返去。原來我哋揸咗入皇宮都唔知喎，之後就經返個入口出返去。
駛出去就係買飛嘅地方，附近重有免費停車場，好在我哋都叫早到，我哋走個時都無晒D停車位，D車要泊到好遠。係買飛之前，我哋就研究下會唔會去埋其餘嘅地方，好似摩爾人城跡(摩爾城堡)Castelo dos Mouros同埋Palacio Nacional de Sintra辛特拉國家宮。因為呢到有D買埋D聯票，價錢當然係平過獨立一個景點買喇。但係去呢個摩爾人城跡(摩爾城堡)Castelo dos Mouros，我睇過有人話都幾靚，不過就講到要行幾耐下先到。另外，個Palacio
Nacional de Sintra辛特拉國家宮又無咩特別嘢睇，如果要睇到時再去到個到先買啦(呢個決定係明確嘅，因為之後去到個到無得泊車)。
咁我哋就淨係買呢個佩那宮先喇~~~
佩納宮（葡萄牙語：Palácio Nacional da Pena）是葡萄牙的一座19世紀浪漫主義宮殿，位於里斯本附近的辛特拉市聖伯多祿堂區（São Pedro de Penaferrim）一個山丘的山頂，晴天在里斯本亦清晰可見。1995年，這個宮殿作為辛特拉文化景觀的一部分入選為世界遺產。它也是葡萄牙國家古迹，以及葡萄牙七大奇蹟之一。它也被葡萄牙總統和其他政府官員用於國務活動。
歷史
這個地點在中世紀是一個聖母小堂。1493年，若昂二世夫婦來此朝聖。繼任者曼努埃爾一世修建了修道院。1755年里斯本大地震中修道院被夷為廢墟，1842-1854年，在此興建了王室的夏宮，建築師為德國人。
自製早餐
今日天氣唔係幾好，天陰陰重要好大霧，可能係山區到呱。買完飛我哋就行上去個皇宮到，呢到其實重可以搭車上去嘅，不過一程就要EUR$2。我哋就行上去，大概行咗15分鐘到啦。
入到去皇宮就周圍影相，如果今日好天的話，影D相出來應該會幾靚嘅。我哋係皇宮外圍影相，開頭以為淨係係出面影，原來都可以入去參觀個喎。呢個皇宮其實同其他睇過嘅差不多，都係食飯、客廳、睡房、工作廳、廚房…..入咗去睇咗大概半個鐘到啦。
睇晒全部嘢，我哋就離開喇。其實呢個佩那宮嘅面積都幾大下架，如果有時間嘅人，基本上可以係呢到睇到一日，因為佢哋重有個花園，個花園睇落都有成4~5個皇宮嘅面積咁大，再加上摩爾人城跡(摩爾城堡)Castelo dos Mouros，真係可以睇到一日唔出奇!!
好遙遠嘅摩爾人城跡
之後我哋就去睇下呢個Palacio Nacional de Sintra辛特拉國家宮，不過去到個到無位泊車，我哋兜咗一個圈返來都係無位。
如果有位，我哋會食咗嘢先，再睇埋呢個國家宮，不過無位，所以我哋就去下一個景點，就係Cabo da
Roca(羅卡角，天之涯地之角，歐陸的最西端)，由呢到去大概半個鐘到。去到呢個天涯海角個時好好天，風又唔係好大，正。我哋就去影下相，行行下重見到有人係到影婚紗相添呀。
羅卡角位於北緯38度47分，西經9度30分，距離里斯本大約40公里 。人們在羅卡角140米 高的山崖上建了一座燈塔和一個面向大洋的十字架。碑上以葡萄牙語寫有著名的一句話：「陸止於此、海始於斯」（葡萄牙語：Onde a terra acaba e o mar começa）。
我哋睇完都差不多點幾喇，見時間唔早，咁我哋就食誠實豆沙包做Lunch啦。
食完就驅車返去Lisbon 嘅住宿喇，都係大概半個鐘車程到啦。返到去個停車場個時，我哋泊開個個位俾人泊咗，而成層都無晒位。之前個負責人有無講重有一層有位，所以我哋就將架車泊埋一邊先。再上去個Reception到搵人，不過我哋搵咗好耐都唔見有人係到。之後就係住宿到休息咗一陣就出去搵下邊到有嘢食同埋有嘢買，我哋去咗一條係網上面有人講叫做海鮮街嘅地方睇下有咩食。餐廳都幾多，但係好多都係葡文又無相睇。所以我哋行完呢條街都無選擇，不過行來呢條街個時我哋搵到有兩間超市係到，入面都有D嘢食買，我哋搵唔到餐廳都可以自己煮嘢食，最後~~我哋都係自己煮嘢食。今日又要早D休息喇，因為聽日去Porto又要成5個幾鐘車程(行收費道路就只要2個幾鐘)~~
The Pena Palace is just like a disneyland in appearance. I missed the funny rooms last time. Cannot recall if they were under repair. I had no recollection of seeing the rooms.
回覆刪除話時話佢嘅外表都幾新淨...不過入面就比較細Ｄ
刪除嘻嘻~~無睇過，又可以去多一次啦...