2018 波蘭．波羅的海三小國自駕之旅 - 序

序

今次呢個波蘭．波羅的海三小國(立陶宛、拉脫維亞、愛沙尼亞)自駕之旅其實並唔係我哋預計想去嘅地方，不過因為有人話去波蘭旅行想同埋我哋一齊去，但係去到最後佢竟然話請唔到假唔可以同我哋一齊去喎。咁我哋還掂未Confirm去邊，就Join埋佢哋去啦，佢哋只可以去9日淨波蘭，我哋無理由咁嘥淨係去9日㗎，計過下我哋可以去到成二十幾日(有史以來最多日數)用到盡呢個假期嘅，所以就去埋波羅的海三小國(立陶宛、拉脫維亞、愛沙尼亞)。

波蘭．波羅的海三小國資料真係好少，連旅遊書都係得一本，但係就好簡單咁講下啲大景點，例牌係個啲市廣場、教堂、皇宮之類嘅嘢。而香港去過波蘭自駕嘅又唔係好多，搵到嘅都係得個一兩個有寫，波羅的海三小國重加小。反而台灣同強國人寫嘅都有幾多下，啲資料重幾詳細添~~~

有興趣可以睇下以下嘅Blog:

15 波蘭自駕遊

波羅的海三國詳細自駕遊記、美圖和推薦（拉脫維亞、愛沙尼亞、立陶宛）

波羅的海三國自駕遊

波羅的海三國（愛沙尼亞、拉脫維亞、立陶宛）自駕遊

12天自駕自由之路，波羅的海三姐妹

秋色無邊，愜意穿行-2017環波羅的海波蘭、立陶宛、拉脫尼亞、愛沙尼亞四國自駕之旅

旅遊攻略論壇>波蘭/立陶宛/拉脫維亞/愛沙尼亞

鮮為人知的歐洲 - 波羅的海三國21天深度開荒(愛沙尼亞/拉脫維亞/立陶宛)

【Poland 波蘭】 到度假天堂 Zakopane的五個理由

【波蘭】Zakopane 爬山去!

我其實對波蘭．波羅的海三小國嘅認識唔係好多，無咩概念。波蘭就有個Blog友TMC 幾年前去過，話波蘭啲嘢好平。重有就係集中營，幾年前去捷克個時就想兜上去睇下呢個集中營。立陶宛、拉脫維亞、愛沙尼亞真係一啲概念都無，咪知道立陶宛嘅籃球都幾勁下咁囉，其他就唔知啦。

係網上面搵到關立陶宛、拉脫維亞、愛沙尼亞呢三小國嘅出名景點唔多，反而見到有強國人去咗呢三小國成二十幾日，原來呢三小國係好多郊野公園同海灘，但係我哋呢段時間去係無嘢睇，因為全部都係雪…

原先我哋去嘅呢段時間應該係得一早一晚凍，唔知搞咩有一個寒流搞到周圍都凍，個種凍係你雙手不能暴露係空氣中超過10秒，唔係好快你雙手就會凍到痛~~~

波羅的海三小國消費最平係順序立陶宛、拉脫維亞、愛沙尼亞，即係越近北歐個邊消費就越貴，波蘭嘅消費同香港差不多，但係若果同鄰近歐洲國家比較佢又真係平啲啲嘅。

講到自駕方面其實就問題不大，係立陶宛啲路有啲爛，其他幾個國家都可以接受。重有除咗波蘭有部份高速公路係收費之外(不過都唔係好貴)，波羅的海三小國都係唔洗收費嘅。係街泊車我淨係係波蘭就試過，因為我全部都係泊係住宿到然後先出去睇嘢，但係泊街收費都唔貴，當然係市中心會收得貴啲啦，咪錶可以用Coin或者信用卡俾錢都得。重有就係今次我哋就係一個 GPS導航加埋 Google Map 導航，兩個可以比較一下，個個 GPS 導航就唔洗上網都可以導航，而 Google Map就要上網。因為有得上網搵資料，所以 Google Map導航就會可以顯示到塞車嘅地方同埋邊到有改路同埋挖路，有一段路係由立陶宛落返去波蘭嘅 Gdansk，個GPS教我哋經俄羅斯去，因為路程係快同短，問題係俄羅斯係唔可以入去俄羅斯，好在睇住兩個導航行如果唔係就瀨嘢。感覺上就基本上可以取締咗個個 GPS導航，但係要有網絡先得(或者你預先計劃好條路線，可以download咗段路線先)。租車方面都係搵個間之前去歐洲租個間Economy Car Rentals，經呢一間搵咗Europcar，Book車個時個網就話係31/3之前係波蘭要用雪鏈先可以行車，所以就要租埋，但係去到攞車時又話唔洗，所以最後都係無租到雪鏈嘅。而波羅的海三小國只係要雪軚就可以喇。

講到食方面，歐洲國家都係個啲扒之類嘅嘢，呢幾個國家當然又係有佢哋嘅當地菜色啦，家下諗得返都係得立陶宛，平、靚、正。重有就係呢一帶都有嘅餃子，佢哋嘅餃子啲皮都幾厚下，味道就真係一般，我都係鍾意港式嘅餃子多。重有呢幾個國家唔知點解有好多越南加泰國嘅嘢食個喎，反而中式嘅就唔係咁多(即係強國人唔係咁多人來呢幾個國家啦)。呢幾個國家最深刻印象嘅係波蘭嘅 Zakopane，呢到真係幾正，完全係有啲瑞士Feel，又多嘢玩，食就無咩得點揀。

住宿方面其實就唔係話好貴，主要睇下你想揀咩類型嘅住宿啦。我哋因為要揀啲有得泊車嘅又要近返景點嘅，所以選擇就唔係太多，今次我哋主要住Apartment多，住Apartment空間大啲同埋可以洗下衫。住酒店好多都係要俾泊車費，好處就係有早餐食咁囉。

上網咭我哋買咗一張3UK 嘅漫遊咭，因為呢一張咭基本上就覆蓋晒我哋所去嘅地方，不過啱啱到波蘭個一日成個鐘都未上到網，差不多要成兩個鍾後先用到，不過佢都有個訊息來話入網要一段時間。之後由立陶宛落返去波蘭都出現相同情況，呢張3UK接收都唔錯。 

貨幣方面，除咗波蘭係用返波蘭幣之後，其餘個立陶宛、拉脫維亞、愛沙尼亞都係用歐羅，而時差都波蘭同波羅的海三小國差一個鐘。

去完呢個波蘭．波羅的海三小國嘅印象，其實真係無咩特別深刻印象，凍囉~~~重有應該都係集中營，一個殘殺咗好多人嘅地方~~~重有個復活節個幾日，好多店舖都無開門包括超級市場，好彩有啲比較進取嘅食店有開，同埋黃種人嘅食店都有開，如果唔係真係唔知食咩好喇。呢二十三日真係話咁快就過咗，其實實質得二十日，因為有三日係搭飛機。今次好多相都係用DC仔加手機影，換鏡個部用得唔多，因為凍嘅關係，影完就即刻放返手入袋，個部換鏡機試過凍到無晒電添呀~~家下手機影嘅相其實都幾靚，一般基本上都OK，有時影夜晚嘅相重好過個部DC添呀，因為個部DC都成幾年前嘅產品來喇。下一次會去邊呢?想去啲無咁凍嘅地方~~~

Trakai Island Castle

 

立陶宛維爾紐斯 Šventaragio gatvė, 維爾紐斯主教座堂 

 Dinner@Forto Dvaras, Pilies Street, 維爾紐斯立陶宛

 立陶宛 Jurgaičiai, 十字架山

 Turaida castle, Turaidas iela, 錫古爾達 Siguldas pilsēta, 拉脫維亞

 獨立戰爭勝利紀念柱 Vabadussõja võidusammas, 塔林愛沙尼亞

Kiek in de Kök Museum and Bastion Tunnels

 波羅的海

 Tallinn 傳統啤酒

 Tartu University Botanical Gardens

 Dinner@Tartu 越式晚餐

Rundale Palace隆黛爾宮 

 聖彌額爾總領天使教堂 Šv. arkangelo Mykolo (Įgulos) bažnyčia / Soboras

Malbork castle museum starościńska 

馬爾堡波蘭 

 Gdańsk, 波蘭格但斯克

 Żuraw Gdański

 Krzywy Domek, 索波特波蘭

 Plaques commemorating the defenders of Westerplatte

 Medieval Town of Toruń, 托倫波蘭

Bridge Of Love, most Tumski, 

樂斯拉夫波蘭

 Orthodox Parish of St. Cyril and Methodiu

Morskie Oko, 波蘭

 Zakopane 波蘭札科帕內

波蘭札呢款麵包係 Zakopane周圍都見到，都幾好食

 

Krakow Old Town Square

 Pomnik Jana Pawła II, 克拉科夫波蘭

 Smok Wawelski, 克拉科夫波蘭

 Kraków Główny 車站, 克拉科夫波蘭

 奧斯威辛－伯肯諾納粹集中營博物館 Miejsce Pamięci i Muzeum Auschwitz-Birkenau

 Statue of Wyszynski

 Presidential Palace, Warsaw

 Shrine of Our Lady of Graces

 Warsaw's Unknown Soldiers' Grave

 Mermaid Monument, rynek Starego Miasta, 華沙波蘭

 Warsaw Uprising Monument, Długa, 華沙波蘭

 Złote Tarasy, Złota, 華沙波蘭

 波蘭華沙 Stanisława Kostki Potockiego, 維拉努夫宮

 Factory Ursus, 華沙波蘭