重話有好多香港人同埋台灣人去日本都會去食下，不過我就真係孤陋寡聞，呢一間我完全係無聽過~~~
今日11/7/2013係佢哋嘅開張嘅日子，佢哋11點就開始營業，我11點15分去到，點知已經排晒長龍，有個牌寫住要排60分鐘，來到點到試下啦~~~
點知最後要排成兩個鐘先入到去食，排就排咗兩個鐘，食就食咗10分鐘，其實重可以座下嘅，不過出面排隊嘅人咁辛苦，食完梗係走人啦~~~
講返個麵先，基本上我係呢一兩年其實都食咗唔少嘅日式拉麵，都叫食唔少，但係味道嘅嘢就好個人嘅，又講咗去第二度添..
又講返個麵，同豚王一樣，有張紙俾你揀湯要咩濃度、麵要咩硬度、油要咩濃度、蒜蓉要幾多、要唔要叉燒(唔通係俾Ｄ食齋嘅人)、重有佢哋嘅秘製醬汁，之後就自己要加嘅嘢，半熟鹽煮蛋係無嘅，一隻要$12
落Order 到上麵應該唔洗3分鐘，都幾快~~~
唔~~排咗兩個鐘，就係等呢一刻啦。首先唔撈混個秘製醬汁之前，飲返啖湯先，味道又幾OK喎
之後就撈混佢，再飲一啖，無分別，無咩辣嘅感覺，今次我叫咗 1/2 倍辣，我諗我應該可以食到3-4倍辣
之後食一啖麵，麵質都唔錯，有口感，但係同一般日本拉麵店食到嘅分別不大，再食下兩塊好珍貴嘅叉燒先，師傅嘅刀功好利害，切到好薄，我諗去打邊爐食嘅肥牛都唔夠佢薄~~
塊叉燒嘅味道就無咩特別，但係肉質就比較硬，同我係網上面見都有人早幾日試食個時講話又淋又滑嘅感覺唔同，唔通係唔洗錢會好食Ｄ嘅 ??
我有叫加蔥，但係份量好少，同佢幅相比較真係好大分別，鍾意食蔥嘅人會好失望~~~
重有我有要加蒜蓉，但係就唔多覺有蒜味，唔知佢哋有無加到，有嘅可能又係加少少~~~
重有個隻$12嘅半熟鹽煮蛋，味道又幾好食喎，不過就唔覺有咸味~~~
成個麵如果100分係滿分，我會俾70分到啦。
講完個麵又講有間店舖入面嘅佈局先，入面其實得36個位，分咗4排座~~每一位有一個獨立空間，呢Ｄ有人叫自閉位，都座得OK，唔迫。佢哋重有個顯示版，會顯示邊個位有得座，但係其實我覺得都無用，基本上有人會帶你去個吉位到座低。
佢哋重有外賣嘅麵，唔想排隊嘅人可以自己買返去屋企自己整來食，不過自己整就無叉燒食啦~~
食完埋單多謝 $101 ($89 個麵 + $12 半熟鹽煮蛋)，其實都幾貴下~~~
暫時來講，我都係覺得豚王好食Ｄ~~~
係排隊等食嘅時候有段小插曲發生咗，就係原先條隊就要排到去伊利沙伯大廈個邊，唔知點解排排下有個實招走出來話唔可以排係呢到阻住佢哋，但係其實Ｄ人都係排係條街到，唔關佢哋事，最離泡嘅就係佢哋叫個工人扮洗地係到噴水，噴濕咗幾個排隊嘅人，之後重聽到有人係到鬧交添啊~~~都唔明個個伊利沙伯大廈攪咩，佢哋個商場十室九空，唔知阻住佢哋邊一忽~~~
