2009/12/13

麵飽布甸

又再試多另外一款...呢一款又係好容易整 !!

材料: (四位用)
鮮奶………………………………………………………………………………150g
糖…………………………………………………………………………………40g
淡忌廉……………………………………………………………………………150g
雲呢拿香油………………………………………………………………………少許
蛋…………………………………………………………………………………150g
麵飽………………………………………………………………………………適量
牛油………………………………………………………………………………適量
玉桂粉……………………………………………………………………………少許
提子乾……………………………………………………………………………少許



做法:
(1) 焗爐預熱180 度。麵飽切片放在杯內,塗牛油及放入少許玉桂粉,再放上
提子乾。
(2) 蛋、糖攪勻,加入淡忌廉和奶攪勻隔渣,倒入麵飽杯內至7-8 成滿。隔水
以200 度焗約40-45 分鐘。



呢到就係部份材料啦..


將糖同埋蛋一齊攪.....




再將鮮奶同淡忌廉倒埋落去蛋同糖嘅完成品到又再攪....




之後就將D上面整好個兜嘢倒落去預先放好咗麵包皮、牛油、玉桂粉同埋提子乾嘅兜兜到....記得要係個盤到倒返D水落去等個布丁唔洗咁乾




我呢幾個就焗咗23分鐘到....時間其實都要睇下你個兜兜有幾大而定




好嘢....完成 !!




2009/12/12

香蕉蛋糕

聖誕就到,又有聖誕扒地,即係又要竟嘢食,今年都唔知整咩好。咁啱見都有個扑友教個女整個香蕉蛋糕,連小朋友都整到就啱晒我啦...



材料(4人份量):

砂糖: 65g

蛋一隻

麵粉:75g

有鹽牛油: 70g (要

自發粉: 半茶匙

香蕉: 150g(約一隻大Size嘅。) 



好啦,開工...






首先將隻蛋同埋D糖用電動打蛋機打到變咗白色






然後就將D麵粉同埋自發粉放埋入去一齊攪






攪呀...攪呀...攪到混合晒,然後再落D溶至水狀嘅牛油放埋落去攪...






然後就將D壓到變咗醬狀嘅香蕉放埋入去又攪....






攪完就將D攪好咗嘅嘢倒入去D紙兜到






然後放入一個預熱到 170度嘅焗爐入面焗20分鐘(焗嘅時間要睇下用D咩嘢裝,我用D細細個嘅紙兜就快D,如果用一個大嘅兜就要起碼35分鐘啦)






嘻嘻...完成 !! 成間屋到好香嘅呢...


2009/11/30

2009 日本東北自駕遊(4)

2009 日本東北自駕遊(4) 25.10.2009

好喇,我哋 Hae 到成九點半就出發去我哋今日嘅第一個景點啦 (往後嘅十幾日都無試過咁遲出發啦,因為太陽伯伯好快就收工,又好多景點無光嘅情況下係無嘢睇架....)。

好啦,睇下我哋第二日嘅旅程有幾多地方會去先...睇圖啦...總共係行咗221km架...都幾遠下個喎




好啦...出發喇,攪下呢樣攪下個樣都成9:45先開車




大約45分鐘嘅車程就到咗呢個景點,就係天皇の間記念公園,我哋一路去就有好多紅葉出現啦,不過其實有好多都開始枯黃喇~~~重有其他個都幾凍下,可能係係山邊到嘅關係呱。我哋去到嘅時間都有唔少嘅日本人係到進入去參觀,我哋兩個人係出面望下望下,最後都係無入到去睇,一來要俾入場費,二來呢一種嘅日本庭園式嘅建築我哋重會有得睇,所以我哋就係門口到影下相睇下附近嘅環境好似重靚喎~~~

去到嘅時候有唔少嘅日本遊客係到....




附近嘅樹D葉其實都開始枯緊




天皇の間記念公園附近景色




呢D係咪叫做萬綠松中一點紅(橙)呢 ?




指定動作....影返張到此一遊嘅相先




門口嘅景色




係個入口到可以見到重有D樹係好靚..(但係只係呢一棵咋~~其餘個D就....)




景點資料:

塩原温泉天皇の間記念公園

地址:栃木県那須塩原市塩原1266−113
Tel. :0287-32-4037




睇完呢個天皇の間記念公園,我哋就繼續驅車前往下一個目的地那須古怪美術館...但係呢個GPS幫我哋加插行程喎,帶咗我哋去浸腳同埋去睇咗一條吊橋喎 ! 其實係唔知點解個GPS有近路唔行係要兜個圈囉。揸住架車睇住個地圖行縮細先知原來係兜咗個圈,正當想話個GPS想徙我油之時見到有個地方有個足浴呢兩個字出現喎。嘩吓~~咪講少兜入去停低浸下先,還掂又唔洗錢嘅 !! 但係呢,就好多車停晒係到囉,揸車最唔想遇到其中一件事就係等位,好在好快就有個位有得停啫(但係其實呢個都唔係位,我見有個人停咗係係車位嘅隔離見唔阻人我咪有樣學樣囉 !! 停低咗就去個足浴到浸下腳係~~~真係好舒服嘅呢 !! 我哋浸咗大約10分鐘到就走人喇,浸完成個人暖晒~~跟住臨走嘅時候又見到有條吊橋幾靚喎,影返幾張相留念下先 !!
嘩~睇下外邊嘅溫度得12度架咋




見到足浴呢兩個字我哋到不知幾開心呢~~~




咪講笑浸下腳先 !!




呢個足浴嘅溫度都幾高下架,你哋睇下出水個位置煙霧迷漫就知啦




原來呢到叫塩原溫泉區....




附近有條吊橋可以行返去天皇の間記念公園附近架




條橋都幾靚架...重有唔少遊客添




橋下面嘅河,附近D樹都變晒色啦




景點資料:

塩原溫泉足浴 & 吊橋

呢個景點係無資料架,附近就有間"塩原郵便局",將呢間郵便局嘅電話入去GPS應該可以搵到呢個浸腳..

塩原郵便局

地址 : 栃木県那須塩原市塩原254−8

Tel. : 0287-32-2800

2009 日本東北自駕遊(3)

2009 日本東北自駕遊(3) 25.10.2009

經過一晚嘅休息,諗住遲D先起身,不過其實都唔係好遲 !! 係日本嘅六點鐘就起身啦(其實係香港嘅五點咋!),執返D眼耳口鼻之後就落去食返個美味嘅早餐先 ! 我哋今次選擇SuperHotel做膽嘅其中一個原因就係因為以佢以呢個價錢都有咁嘅早餐食(同東橫Inn差不多,有部份重要平過東橫Inn添呀 !!)

SuperHotel 嘅早餐聲稱係用天然同新鮮嘅材料烹調,不過我就唔理佢用咩料啦,有得好似食Buffet咁有得揀嘢食個喎,雖然款式唔多,但係就好好味喇...重有就係佢哋係早餐時間嘅時間有一部飲品機可以免費俾D住客飲所提供嘅飲品,通常實有咖啡、重有D有汽水、粟米湯、奶茶、健康飲品...款式都有好多,最重要係任飲,啱晒我哋啦..

間房望出去嘅景物...(係......無嘢睇嘅...)




睇下有咩食先...基本上實有嘅沙律、魚、麵包之類嘅食物




嗱...自助架,想食幾多就攞幾多..食完就好滿足架 !!




睇下D麵包都有幾款俾你揀,重要係唔差個喎...




呢一間就係我哋第一晚住嘅酒店啦...






食完早餐,我哋就上去房到Hea下,上下網打下機、睇下電視、辦下工,攪下呢樣攪個樣就去到成九點幾喇..於是,我哋就決定九點半正式出發啦...



2009/11/28

2009 日本東北自駕遊 2 (終於都可以出發啦..)

2009 日本東北自駕遊(2) 24.10.2009



好喇,繼續我哋嘅行程先 ! 咁究竟點樣先開到架車呢 ? 我就不停咁係到按住個"Power",心諗唔通有機關嘅,要連按幾下先得 ? 試過又唔係喎,型仔車都係瞓咗無醒過喎,點好呢 ? 最多咪去叫返個職員出來整返醒佢囉,亞團友又按下個到按下,都係無反應...正當我哋束手就擒嘅時間,我踩咗個 Brake 一下,我見到個個 "Power" 掣著咗盞橙燈,咦 ! 唔通要踩住來叫醒佢...於是我就按一下個 "Power" 掣...哈哈哈哈...型仔車真係醒返啦 !! 原來個機關就係個 Brake 腳掣,迷底終於都被我解破 (講到自己好勁咁,其實開頭咪又係唔知點算好 !)

好嘢 !! 終於都可以出發喇..正式展開我哋呢個悠長假期啦...我哋今日要由成田機場揸車去栃木県小山市嘅 SuperHotel入住,預計要行大約三個鐘車到喇 ! 其實三個鐘都幾耐下架,係不停喎 ! 我哋差不多成三點先出發,重要我哋係唔會行"有料道路(即係收費道路)",係行一般道路,因為我覺得行一般道路會多D嘢睇 !! 重有好多選擇,譬如"推獎(應該係指推薦)、距離優先、時間優先....

睇下呢一個就係我哋今日嘅行程喇..

成田機場揸車(Point A) -> 栃木県小山市SuperHotel (需時大約三個鐘,距離 : 110 km)(Point E)




不過行一般道路都有個唔好處就係會塞車,因為有好多車都會行呢D道路,同埋速度會比較慢一D,重有個 GPS 會唔知點解會帶你行埋D鬼鼠路個喎,明明直行就得..呀 (呢個係之後發覺,因為有D路行熟咗,見到應該可以直行但佢係到要你行小路)! 佢又無神神要你行另外一條個喎,真係俾佢激死 !!

一路揸架車一路熟習下個操作,因為感覺完全唔同嘅呢 !! 揸揸下見到有間 "Jusco" 喎,都揸咗一段時間,大家都要去方便方便一下架嗎~~~所以就入去行返個卷先啦 !! 重有就係要買返D零食(團友強烈要求)同埋水。



JUSCO 係日本真係周圍都會見到,真係好似香港嘅百X同惠X咁...嘻嘻...見唔見都我哋架型仔車呀...




入面都幾多嘢買架 !! 啱啱到咗日本第一日,見到D價錢計返香港錢,嘩~~吓~~其實好多嘢都唔係好平個喎 !!




見到係食嘢個到有D熟食同埋魚生壽司食,本來想買D壽司過下口癮,但係又驚食得太飽,一陣晚餐食唔落呢 !!

呢一個煎餃子都幾好味...




(Point B) 店舖資料:

イオン成田SC ジャスコイオン成田店
地址 : 千葉県成田市ウイング土屋24イオンモール成田


Tel. : 0476-23-8300


買咗D好味嘅餃子當然就要就地正法咗佢喇,食完我哋又再次踏上征途喇...一路揸都無咩特別嘢 ! 見行咗個幾鐘,又係時間去停一停抖一抖喇 ! 見到有間便利店,就揸埋去借個方便啦 (係日本好多便利店都有廁所,所以基本上係唔驚無廁所,因為梗有一間係附近 !!)

揸揸下重要落雨添呀~~~




呢間就係我哋方便嘅地方啦..見唔見到有隻貓貓係到望住入面呢 ? 唔知入面係咪有老鼠呢 ?




我行埋去佢就成隻坐咗係到...




唔知貓貓有無人養嘅呢 ?




係便利店入面方便完我哋重買咗D嘢食添呀(咪又係團友最鍾意嘅零食囉...) !!

店舖資料(Point C)

ファミリーマート つくば上横場店

地址 : 茨城県つくば市上横場2172−14
Tel. : 029-839-5336

小休咗後就繼續行程喇,嘩~~~其實個天個時已經黑晒咁 ! 咦 !都未夠六點個喎,係無錯,日本真係好快天黑...

就差不多到今晚嘅落腳點嘅時候就開始有塞車出現,行行下見到有間迴轉壽司喎,都差不多七點喇 (其實都係香港嘅差不多六點啫),又見有D肚餓,好就揸入去停低架車食晚餐喇(呢一間連鎖迴轉壽司真係好抵食,我哋後來係唔同地區都有幫襯過,讚!!)。

嘩吓..入到去同侍應棟起兩隻手指,然後我諗佢叫我哋隨便坐,我哋就求其坐個位啦...呢D迴轉壽司好處就係自己鍾意食咩就攞咩來食,最攪鬼嘅就係可以係電腦到落Order,然後用運輸帶運俾我哋...

就係呢一間迴轉壽司(個名係最下面個一間)喇...我哋叫佢做青蛙壽司...




就快有嘢食喇...




迴轉壽司,見到咩就攞咩食..唔洗客氣嘅呢




嘩~~飛魚子壽司




三文魚子壽司...唔知點解會加D薄荷葉落去,不過呢個配搭都唔錯(嘻嘻...扮下食評家先)




呢個係蘿蔔牛肉麵豉湯




海膽壽司 (開頭諗住試下算,因為都係105yen一碟,應該唔會有無質素可言啦,點知就真幾好食架 !!)




三文魚加洋蔥(呢個組合幾攪鬼,但係真係要講句 Mix & Match,出來嘅味道真係幾特別個喎)




帶子壽司(呢個簡直就係我哋主力喇,食咗三大碟呀 ! 香港點有可能用105yen (~HK$9)食到一碟帶子壽司呀,重要好鮮甜個喎!!)




火燄燒三文魚腩壽司(嘩~~呢個又係好好味~~~真係唔知點算,碟碟都話好味,食得幾多呀,救命呀~~~)




呢個唔記得叫咩名堂~~~




三文魚腩壽司(又係好食都不得了~~~)




呢個就係自助叫嘢食嘅落單電腦啦,見到咩想食就揀來食啦..




之後就會用呢個運輸器運到你面前架啦..




三文魚子壽司...(好食到唔停得口!)








最後我哋食咗13碟壽司,好滿足咁離開呢一間食店 !!

店舖資料(Point D)

かっぱ寿司下館店

地址:
‎ 茨城県筑西市玉戸1005−15
Tel. : 0296-26-6855





好啦,食飽飽就去酒店啦..個GPS顯示應該會係一個鐘頭之內到,揸揸下又見到幾間店舖嘅商店喎,我哋又走咗入去睇啦。重去埋 UNIQLO睇下,因為家下個匯價比較高,所以係日本嘅UNIQLO買嘢係"唔抵"嘅 !!




上返車繼續向酒店出發,但係去到個目的地居然就見唔到間酒店喎 !! 咁唯有再入多次喇,一入就出現咗間 SuperHotel 個名啦,重要都幾近下,揸咗一陣就到咗啦 !!

去到大堂就Check-in啦,我就忘住填嘢,團友就忙住揀嘢,因為每個女性都可以揀D Mask、洗頭水連護髮素、Eye Mask....好多女性嘅用品,係免費送嘅,每人限攞五件 !! 點解男嘅就無咗....


Check-in完就上房啦,同上次係沖繩住個間一樣。呢間 SuperHotel重有溫泉浸架,不過我哋無去浸,因為佢就分時段,男女各用一段時間~~~


呢間房其實可以瞓三個人架...




我哋沖完涼,睇咗一陣電視就瞓啦...因為聽日嘅車程都唔短 !! 講返睇電視,我哋一去到就報導有個"疑容者"殺咗一個英國嘅女子,然後就整容避開警方嘅追查,事件都發生咗成年架喇,呢一個新聞陪住我哋成個東北之旅,日日都有講呢個人D嘢。


酒店資料(Point E)

地址:
‎ 栃木県 小山市城山町3-16-10
Tel. : 0285-24-9000


講返下架車先,架車揸揸下都幾好揸,性能都幾良好,可以好似中國太空人咁講一句 : 感覺良好 !!