Rüdesheim > Weingut Robert Weil > Parkhotel Rüdesheim Superior (Rüdesheim)
睇完我哋就驅車去今晚嘅住宿附近啦，去住宿之前就去搭下吊車先。今晚會住係 Rudesheim 區入面。我先前係Google到Check過應該係15分鐘之內會到，又先前一早係個 GPS 入面 Set 好晒今此行程嘅所有住宿，咁好理所當然就揀咗 Day 1 嘅住宿記錄喇。話要30分鐘，好!算，可能計算有出入啫，點知個方向係去返 Frankurt 行，越行越覺得唔對路。於是就搵個地方停一停再Check下有無錯~~原來係入咗先前第一次Book嘅住宿，先前我哋諗住會住係 Frankurt 市中心附近，然後就係 Frankurt 行下街。之後有團友提意去參觀酒莊，所以就改咗行程，但係我就無Update到個住宿，好在發覺得早啫，其實都行咗成二十幾分鐘~~~之後就改返去今晚嘅住宿嘅地方啦~~~都要成半個鐘先到。
到咗 Rudesheim 就去酒店 Checkin 啦，點知間酒店出面就係條主要道路無位泊車個喎，兜咗幾個圈，無辦法只好泊係附近路邊到~~落晒D行李先，然後去搵街錶泊~~~我哋去到個時都已經差不多18:00，係呢到每日嘅 18:00-09:00 同埋星期日泊街錶係唔洗俾錢嘅~~~
其他團友就負責Check in ，我就去泊車。泊好車就入去攪埋D手續先，今日有一位團友生日，所以我預先同呢間酒訂咗個1磅黑森林蛋糕，想俾個驚喜個位團友架嗎~~點知間酒店無咗一回事，無問題，就叫佢整個蛋糕來啦，點知係無嘅，因為佢哋一個蛋糕差不多成5磅。咪叫佢哋切8人份量出來，然後俾我哋自己切囉，最後變咗 Cut Cake....咁唯有接受啦...不過咁嘅蛋糕慶祝都幾開心喎...係我哋唱生日歌個時，在場有個外國人又唱埋一份，個氣氛攪到幾好~~~講返件Cake先，黑森林蛋糕係德國出名嘅蛋糕，製造份量同做法有嚴格嘅標準，呢件蛋糕都幾好食~~~其實我哋可以訂個5磅，不過我諗住過下口癮，同食下其他嘢...
食完蛋糕我哋就出去搵食同埋去睇下附近出名嘅鳥巷 (Drosselga)，其實呢條鳥巷只不過係一條酒吧街來啫~~附近重有一個葡萄酒博物館叫Bromserburg(Weinmuseum)、自動演奏樂器博物館Musikkabinett(Bromsrhof)，重有一個要行遠D嘅叫木造房屋Klukhardshof(咩舊時D房屋唔係木造嘅咩?)....
我哋係鳥巷到睇下影下相，行行下聽到有人唱鄧麗君D歌~~~唔知係邊個國家嘅人呢 ? 一路睇一路搵下有無D啱心水嘅酒店~~~最後搵咗一間(都搵咗幾耐下)，我哋8個人叫咗6個餐。其實叫5個都得，因為其中一個腸仔唔係好抵~~得個幾條腸仔就一碟啦~當然係要叫下德國啤酒飲下啦....埋單多謝 EUR$63.4
食完嘢我哋就去最近嘅超市到買水啦，不過最近都要由酒店行15分鐘先到~~我哋Book咗4間房，我住個間就係4樓，但係就超細~~其餘個三間都幾大間下，但係就好噪 !! 因為酒店對出有條鐵路，夜晚都幾噪下，但係我哋4樓個間又唔覺好噪喎~~
重有我Book呢一間酒店個時話係有 Free Wifi ，點知去到就話無咗喎，要俾錢先有得用~~嘩~~我Book你間酒店其中一個原因係因為有Free Wifi ，家下就話無，有無攪錯 !!! 不過都唔係唔係歐洲人同香港人文化唔同，佢哋連 Sorry 都無講，好似老馮咁喎..
黑森林蛋糕
附近嘅超市
鳥巷
就係呢到有人係到唱鄧麗君D歌啦..
鳥巷都有間買情趣用品嘅嘢嘅店舖
是日晚餐
我哋就係呢間到食嘢，D嘢食都OK個喎...
沒有留言:
發佈留言
來到留返句說話先走啦...