2013 墾丁‧台南‧高雄自駕之旅
Day 8 30.3.2013 星期六
85大樓水格印象 ® Dream World (途經夢時代) ® 高雄小港國際機場 ® 香港
今日就要返香港，今朝又去咗呢個7-11到食早餐，但係就無晒飯團食喎。食完嘢我哋就去機場，因為怕個GPS又Short Short哋，所以就睇定點行，果然個GPS又係Short Short哋，好在睇咗點行啫，個GPS差不多去到機場先有返反應。係去呢個機場之前，諗住去睇下呢人夢時代行下，不過計返D燈位時間應該唔係好夠時間，因為我哋約咗租車公司 0930 係機場到攞車。
我哋係0920到到咗機場，到咗0925見租車公司重未有人到，於是我就打電話去問下佢哋D人到咗未，點知佢話我哋唔係係佢哋公司個到還車嘅咩，嘩~~大佬，我Book個時寫明係機場到攞車同還車架嗎~~家下即係未有人來啦，於是就叫佢哋快D到啦。呢個時間，我哋都費時等佢到，我就攞D行李去Check in先，原來鳳梨酥係可以Hand carry嘅，再係到等，期間都打咗幾次電話去吹佢哋。最後佢哋成1015先到，重話我哋唔係1115先還車咩，一早講咗0930架嗎~~
好在呢個高雄機場細咋，好快就過咗海關係入到去等上機，都叫做有驚無險。我哋有諗過如果佢哋1030到未到就會將條車匙放係機場嘅遊客服務處等佢哋自己去攞~~
我哋過咗海關去到候機室個到重有D時間，於是就去行下，附近有一間買手信嘅都幾多嘢食。我哋當然又試下喇，不過有個男人全程望住我哋兩個，攪到想試都唔係幾好咁。
之後就搭個幾鐘機程返到香港，不過係臨降落嘅時候，唔知係唔係有風切變呢 ? 突然又爬升返，所以最後就遲咗成差不多20分鐘先降落~~~不過都叫做順利返到香港啦，返到香港又覺得凍咗喎~~~好啦~~呢個墾丁‧台南‧高雄自駕之旅就此完結，雖然悶D，但係多謝收看~~
因查真高雄呢幾朝都係白矇矇一片咁架
因查真高雄呢幾朝都係白矇矇一片咁架
是日早餐~~今日有關東煮
夢時代
好在無過磅
等還車中
高雄D空氣都幾污濁
高雄機場
都有唔少香港人去高雄玩
簡單嘅飛機餐
香港天氣唔係幾好
返到香港囉...
