急救課程....

近排上緊個急救課程...嘩~~個CPR(心肺復甦法)要係2分鐘之內完成，裡面有成5個Cycle，每個Cycle要按30下然後吹2口氣...做完都手軟....唔可以錯一錯就肥 ! 星期一就考試啦....

成大堆都係包紮嘅野....要係十分鐘內完成...

私房菜喜宴@尖沙咀

有日同屋企人慶祝生日去到呢家位於尖沙咀嘅私房菜餐館，而當日嘅菜式就係有一個頭盤加八度主菜最後來個甜品(個甜品唔記得影相添!)，呢家私房菜其實都幾隱閉，如果唔係有人食過就真係唔知點來....全部菜色最欣賞就係頭同尾兩個，但係整體都幾滿意。呢一間個主廚都係好似一貫私房菜一樣，每個菜色都會改一個名。出每個餸都會介紹下個餸菜，之後就會問下你Ｄ餸菜有無Ｄ咩問題.....至於收費方面盛惠HK$250一位啦....

頭盤 :龍蝦柚子沙律

瓊珍鮮花伴海皇 - 蟹米子荔枝花枝(個配搭都幾新鮮)

珠玉滿堂奉如意 - 蕃薯豆腐釀魚翅 (口感幾好 ! 不過唔多覺感到有魚翅)

龍宮將軍被黃裳 - 毛茄伴酒糟南瓜蝦

蘋蹤雪印聽海螺 - 雪梨蘋果豬腱海螺頭湯 (呢個湯真係幾好味!)

紅粉飄揚俏鳳凰 - 仁稔粉皮雞

玉琢金裝白妙藝 - 肉鬆炒茭白

綠榭蔭旁嬉繡球 - 碧綠獅子頭

火辣玉面紅袍將 - 年糕豆腐伴酸辣蟹

球皇保齡球館@深圳

唔知大家有無打保齡球嘅呢 ? 我就耐唔耐都打下架...不過就唔係好叻 ! 不過如果係香港打保齡球平極都要成$2x 一個Game，所以基本上我係唔會係香港打，會係深圳打多，因為深圳打星期六及日下午一點前都係rmb$10一局，星期一至五重要係rmb$5一個Game....我就覺得非常抵打。打完波就周圍行下買下野食野.......

深圳吉野家....

惠東平海二天遊@DAY 2

第二日起身就包埋個海鮮粥做早餐，個粥又係好好味，食到唔停得口....食完個粥之後，就包咗我地去附近嘅景點到睇睇，個司機車咗我地去睇有鹽田、海龜生蛋嘅地方同埋一個海龜館(要俾入場費)、重有個雙月灣(又係要俾錢，不過呢個好似係俾Ｄ人封住個入口來收錢)，因為同個司機好傾，睇完晒Ｄ指定景點後，個司機就車我地去一個叫做巽寮灣，據個司機講呢一個係一個內地夏天消暑嘅地方，所以夏天嘅時候會好多人來呢度遊水玩樂 ! Ｄ酒店嘅價錢都幾貴下，標價要成千幾蚊人民幣一晚，最後打折幾錢就唔知。不過Ｄ房有部份係向住個海，個 View 都幾正下 ! 睇完呢個地方就叫司機車我地去食 Lunch ，個 Lunch 就係間客家酒樓到食，因為比較遲，所以好多野都買晒 ! 食完個 Lunch 就返去間民宿到，係去呢個巽寮灣之前曾經經過一個地方種咗好多士多啤梨，所以就叫個司機車我地去呢到睇睇 ! 開頭都諗住大陸Ｄ士多啤梨應該唔係好得，但係睇落有幾大粒同埋幾有士多啤梨味，於是乎我地就係咁扎Ｄ士多啤梨.....扎下扎下多扎咗幾多下(不過都係唔洗100人仔就有兩大盒，之後我個朋友話佢地第二日去個一個重平Ｄ添呀)。因為我地係二日一夜(如果唔係就可以車埋我地返深圳)，所以就差不多要返去搭車。返到民宿就洗咗Ｄ士多啤梨來食...嘩....都幾好味喎 ! 然後個司機就車咗我地去車站到搭車返深圳啦...返到深圳都差不多成六點幾.......呢個平海之旅都幾好玩 ! 不過就最主要係食，景點好快就睇晒 ! 不過我個朋友話佢地第三日個時，個民宿老闆帶咗佢地去農場到玩"乞兒雞"，將隻雞搵尼包住然後就用熱力將雞整熟來食......

海鮮粥做早餐，個粥又係好好味，食到唔停得口

鹽田

海龜自然保護區....呢個海灣係七至十月會有海龜來生蛋

海龜館

雙月灣(有Ｄ似日本函館個個灣)

東蓮禪寺

巽寮灣

海濱溫泉渡假村

午餐

自己擇士多啤梨來食...嘩....都幾好味喎 !

惠東平海二天遊@DAY 1

朝早9:30係皇崗口岸等民宿安排嘅車，今次坐個架係一架七人車....車程大約兩個幾鐘，不過因為塞車所以俾原定時間遲咗少少，要成十二點幾先到 ! 去到個老闆就安排好Ｄ房間俾我地，Ｄ房間都可以接受，之後就整咗個炒米粉俾我地食，話時話都幾好味，食下食下幾個人都食咗幾多下 ! 跟住我地就係呢個平海市入面四圍去睇。首先就去個古城到睇睇...但係我地就唔知行咗去邊，一路行一路搵，行咗入個成入面見到有一家人有Ｄ楊桃幾靚問可唔可以俾一個我地食...呀，個婆婆二話不說就俾咗兩個我地喇 ! 之後我地就行咗去個南灣到，行咗好鬼耐先到 ! 跟住頂唔緊要搵架摩托車坐我地去古城東門，不過就一架車坐咗成四個人，好似玩緊歡樂滿東華咁 ! 後來到咗之後我重聞到一陣囉味添呀 ! 之後就係古城行來行去，最後重買咗Ｄ野食下添....行完古城我地就返去等食晚餐，因為我地訂咗個海鮮晚餐。食嘅時間會同埋其他宿友一齊開餐，但係就每個 Party 一張檯，最期待嘅就係炭燒生蠔 ! 但係其餘嘅餸都好好味喎，總共有成差不多有九個餸連埋湯...食到食唔晒 ! Ｄ蠔真係好好味，又係無限量供應咁濟....食完沖完涼就訓覺囉...

一去到就有一個自家製嘅炒米粉同埋枸杞湯...個米粉好好味呀 !

呢個係平海市入面其中一條村嘅一個地方

呢個叫孤洲釣月......

南門海灣....好長嘅海岸線呀....

平海古城.....

炭燒生蠔....嘩~~~好正架...

粟米紅蘿白豬骨湯...

好多餸食呀...

呢個扇貝就普通Ｄ

Ｄ蠔幾大隻...

晚上玩煙花...

一門@銅鑼灣

今次食嘅呢間餐廳叫一門，其實佢都幾出名，不過出名係燒物到。但係我就覺得如果係一間好食嘅餐廳，無論佢整咩都係咁出色 ! 正如我屋企附近有一家家庭式經營嘅飯店一樣，真係咩都咁好味 ! 好...都係講返呢一家"一門"先，今次去食 Lunch，叫咗個"滑蛋吉列豬扒定食"，個定食包個飯之外重有一個麵豉湯同埋一個餐前小食，重有一杯飲品，我就叫咗一杯芒果汁。個滑蛋吉列豬扒都幾好味，塊豬扒都幾好味，有豬肉味同埋唔係炸得太乾身 ! 不過個麵豉湯就叫OK，麵豉湯始終都係覺得係銅鑼灣街市附近有一間食日本野嘅食店咁出色 ! 總體來講都幾好味，不過每個餐都要成七十幾蚊埋單，其實都幾貴下 ! 我地去到嘅時間一個人都無，可能比較早，一去到就問有無BOOK位，我諗呢一間餐廳午市都幾多人食。



滑蛋吉列豬扒定食

芒果汁

維記咖啡粉麵@深水埗

深水埗，一個男人好鍾意去嘅地方...點解呢..因為有個電腦商場，附近重有條鴨寮街。其實係深水埗都有好多野食，有好多間都幾出名下，好似我家下講呢一間就係其中一間啦 ! 佢就係叫做維記咖啡粉麵，佢最出名嘅就係豬潤牛肉麵，重有就係咖央西多士。佢Ｄ豬潤牛肉麵都幾出色，因為如果有食過豬潤同牛肉嘅人就會知道，豬潤同牛肉要淋同埋吃落要有口感，呢間餐廳整得啱啱好 ! 同埋個湯都好出色，應該係豬潤湯來架 ! 咖央西多士其實都OK，不過比起新加坡嘅就無得比啦 ! 整體都幾好，去行深水埗又見肚餓的話，呢一間都係一個唔錯嘅選擇。

豬潤麵

咖央西多士

御苑皇宴@Mega Box

呢個係九龍灣嘅大型商場係舊年開幕，入面有好多大型嘅商店，其中一間就係B & Q，不過其實我係幾年前係深圳成日都光顧呢間大型家居用品店....都係唔講呢間 B & Q ，搵日開個新 Topic 講下先。講返呢次嘅主題 - 御苑皇宴，啱啱新開張大買廣告，見到呢一間御苑皇宴有鮑魚食，某信用咭消費有半價 ，重要係糖心鮑魚，嘩....我都幾鍾意食鮑魚架，不過食來食去都係罐頭鮑魚，糖心鮑魚真係未試過 ! 於是就去行下呢個商場同埋食野啦 ! 一去到就睇下有無得食...點知話訂位訂到八點先有臺....弊....失察,,唔記得打電話問下添 ! 但係無理由唔食架，重要係最後一日添 ! 於是就照跟，最多係行到八點.....之後就周圍行。七點半就返去再等位，個時已經見到人頭湧湧，等呀等...中間有Ｄ人不停咁問重要等幾耐，幾時有位 ! 有Ｄ人重發皮氣走埋添...終於都等到 ! 不過係搭臺..唔理，有得食就得 ! 好在做一步，因為Ｄ想食個款糖心鮑魚淨返一隻 ! 如果唔係就要叫貴好多個隻 ! 之後就叫多兩樣餸，有個重要係羅唔知咩獎添呀 ! 戲肉到...嘩，有專人係你面前煮個汁然後淋落隻鮑魚到....正 ! 第一次用刀叉食...Ｄ鮑魚好有鮮味，果然真係唔同 ! 之後食埋個飯...嘩 ! 好滿足呀`  個次都淨係記得食，唔記得影相....如果佢再做特價，我一定去食過 !

嘩嘩...有專人煮..係咪好 Pro 呢...

主角出場,,,其實好細隻(好似係32頭)...不過就過下口癮 !

呢個唔記得咩名堂...不過幾好味 !

南翔饅頭店@荃灣綠楊坊

荃灣綠楊商場經過一大輪嘅裝修之後變咗做綠楊坊，係三樓原先係美心酒樓嘅位置畫分為好多間嘅舖位，其中一個舖位就開咗間好出名嘅食店 "南翔饅頭店"。呢間食店如果係週末你唔訂位的話，就要等幾耐下先有位，因為都成日人頭湧湧。

呢次我地都叫咗兩個套餐，入面都包咗呢間食店嘅招牌菜式，份量都幾夠，不過重頭戲，蟹粉小籠包都OK，但係就唔會覺得好正，另外重有Ｄ花茶飲添啊 !

菊花茶

玫瑰花茶

醉雞(醉雞我幾鍾意食，但係唔係間間都整得好味，主要係因為雞本人嘅質素問題，呢間都造得唔錯!)

呢個係飯前小點，都幾好味 !

賽膀蟹又係我喜歡之一嘅菜式，呢個都幾好食。

呢個係飯前小點，炸蝦角 !

呢個都係餐前小食 !

蟹粉小籠包

豆腐湯

甜品 - 桂花糕