~~~活在當夏~~~: 2018 波蘭．波羅的海三小國自駕之旅 Day 18 2-4-2018 Monday (Kraków, Poland)

Exclusive Apartments > Wieliczka Salt Mine 維利奇卡鹽礦 > Exclusive Apartments > Lunch@肯德基 KFC Kraków Floriańska >聖母聖殿 Bazylika Mariacka > Rynek Glowny central square 露天廣場 > Town Hall Tower克拉科夫市政廳 > Adam Mickiewicz Monument, Kraków >聖亞德伯堂 Kościół Świętego Wojciecha > 聖伯多祿聖保祿堂 Kościół św. Apostołów Piotra i Pawła (Church of St Peter & Paul) > plac Marii Magdaleny >瓦維爾城堡 Zamek Królewski na Wawelu >瓦維爾主教座堂 Katedra Wawelska > Pomnik Jana Pawła II > Smok Wawelski > 卡齊米日Kazimierz猶太人歷史街區> Pomnik Jana Karskiego > The Nissenbaum Foundation memorial in the Kazimierz, Krakow ( in memory of the Jewish victims of the Second world War) > Jewish Square > 猶太教堂 Old Synagogue (老猶太會堂Stara Synagoga) > 猶太教堂 High Synagogue (高會堂Synagoga Wysoka ) > Plac Nowy > Drehort Schindler's Liste > Dinner@Dong A > 紡織會館 Sukiennice > Rzeźba Mitoraja@Town Hall Tower > Exclusive Apartments

Wieliczka Salt Mine 去鹽礦做礦工 (Parking 49.985304, 20.053287)

9:00就要出發參加10:00 Miner’s Route (全程約3個鐘)

今日我哋嘅主要節目就係去呢個鹽礦，先前係2月個時已經係網上面買咗Miner’s Route，不過買完先發現買錯咗!!我哋諗住係去做礦工嘅，但係買咗特價飛，諗住去到就去補錢改返。

今朝我哋福字麵加炸菜，我哋book咗10點個一場，由Apartment去鹽礦大概半個鐘到。咁我哋通常都會預早少少因為唔知中間會唔會有啲事發生阻咗啲時間，我哋大約0910到就到咗，個鹽礦自己有停車場，不過附近都有好多個停車場，最後我哋就泊返係鹽礦個個停車場，收費係PLN$6/hour。附近有啲停車場就見到佢收費係一日計嘅，如果玩得耐，泊個啲場都有著數。

我哋入到去就見到好多人係到排隊，排到去個Ticket Office同佢講買錯飛，佢睇一睇就指咗我哋去另外一邊係網上買飛嘅counter，之後又同佢講買錯飛想補錢轉返，又唔理我哋喎，印咗啲飛俾我哋。再加埋影相要買影相Permit每部機PLN$10，不過其實我見到好多人都無買又係到影相，所以都唔知佢哋整呢一項收費來做咩，只係去到比較著大嘅點，個導賞就會同啲人講影相就要買個影相Permit，不過都係唔多覺有人理佢~~~

但係我哋已經無咩時間淨低，所以就排咗去 Tourist Route到先，因為同其實兩個Tour個價錢係一樣，同埋如果去到Miner’s Route個到入唔到去，唔知洗唔洗返來Ticket Office到再搞，搞下搞下就嘥時間啦，重有一樣就係團友行完海洋之眼之後話雙腳重係好攰，同埋話成日都想抽筋，如果去玩呢個Miner’s Route行行下抽筋就唔好啦~~不過搵資料時見到好多人都推介去玩呢個Miner’s Route，話有得扮下礦工幾好玩，有興趣嘅人真係可以試下。

我哋排咗係Tourist Route到Check完飛又無問題喎，之後就Join咗呢個Route喇~~~

參觀呢個Tourist Route會有個導賞員介紹每一個位置啲礦工嘅生活同埋工作嘅情況，不過我哋就覺得幾急下，停一陣就要行，重有後面重有另外一團嘅人近住行，基本上都係唔可以停大耐，如果想影相就要好快手先得。

其實個鹽礦都幾大，入面最靚就係個教堂個個位，行晒成個Tourist Route到差不多要成兩個鐘。原來係完咗呢個Tourist Route都可以加錢再Join另外一個睇下啲教堂嘅嘢，不過我哋就無Join到~~

我哋12點幾就出返來，團友話行到差啲又抽筋，因為其實係入面基本上係無得點休息同埋無得坐嘅。諗住係附近食埋Lunch先返去，點知啲食店又係因為復活節休息，咁我哋就唯有返去再搵地方食嘢喇!

車就揸返去Apartment個停車場，我哋1點幾返到去，因為覺得今日應該啲食店都係未開晒，所以我哋都費時周圍搵，直接去咗食KFC。今日KFC又係有好多人幫襯，應該都係因為唔係好多食店開門做生意嘅關係啦~~

食完又去返個市廣場到睇嘢，個Easter Market重有開緊，今日個天好靚，藍天影相好靚。我哋又再影返尋日去過嘅地方，因為今日天氣好好呀~~

之後我哋就去城堡個邊行下，今日重多人過尋日，真係唔明點解啲食店唔做生意，呢啲時間係最搵錢，不過外國人唔係好似我哋咁諗嘅~~

個城堡到我哋無入去睇，淨係係外圍到睇下同影相，重有睇埋個噴火龍。呢個城堡重有一個地洞可以參觀嘅，不過我哋就無興趣去睇~~

睇完呢個我哋就去咗卡齊米日Kazimierz猶太人歷史街區到睇下嘢，呢到有好多食店都有開。如果我哋一早行過呢到就會來呢一邊到搵食啦，呢到有間超市都有開，我哋入先買咗啲嘢飲，不過我哋有一樽係玻璃嘅嘢，要收按樽費。呢個卡齊米日Kazimierz猶太人歷史街區點解會成為遊客區，係因為一套電影《辛德勒的名單》係呢到取景，所以就多咗人來。呢到好多建築物都重保留住係二戰時被破壞嘅狀態，無點樣維修過。

呢個卡齊米日區同舊城個一邊感覺好唔同，係會堂附近有好多遊客，一團團人係到好留心咁聽啲導遊係到講每一個位嘅背後歷史，不過呢~~就阻住我哋影相囉…

行行下見到呢到有一個好似香港嘅冬菇亭嘅建築物，入面有買啲小食嘅舖頭，都幾多人係到買嘢食。呢到重有兩三間猶太人嘅教堂，不過我哋就無入去睇，淨係係出面影相。行到就來走嘅時候，我哋見都有一間又係應該係食越南嘢嘅食店Dong A，啲嘢食嘅款式同價錢又Ok喎，我哋見都成5點幾就諗住食個早嘅晚餐喇~~

我哋叫咗一個雞肉湯、炒雞肉金邊粉同埋一個甜酸豬肉飯重有Local Beer，個雞肉湯唔知點解會有麵係入麵，啲麵質同福麵差不多，個湯就當然係似係食福麵嘅味精湯啦…點解啲湯咁奇怪有麵嘅呢?唔同我哋叫錯嘢，定係越南嘅湯其實就係有麵嘅呢?個炒金邊粉幾好食，個甜酸豬肉又係好好味，我哋食到好飽，其實係食唔晒架，呢一間食店個CP值好高啊~~~

食完我哋就行返去市廣場到睇下嘢，之後就返去Apartment到休息，聽日我哋就會去集中營，不過個時間係去到17:20，其實都幾遲下，因為佢哋1800就會閂門。所以，我哋又再book咗第二日嘅朝早0745個一段，不過如果係去呢一段就要好早就出門，因為由Apartment去都要成個鐘~~

其實去呢個集中營原來係要預先約時間去參觀，我又無為意喎。到發現個時已經去到得呢啲時間咁遲嘅時間去參觀，我哋book呢段時間就自己去睇嘅，而啲比較好嘅時間都係要參加啲導賞團嘅，我哋就想自由啲，想睇就睇，唔睇就走個一款。

住:

Name: Exclusive Apartments (Superior One-Bedroom Apartment)

Address: ul. Lubicz 17C Grzegórzki 31-503 Kraków Poland Phone: +48 12 378 98 01

GPS: 50.06444, 19.94928 (N 050° 3.867, E 19° 56.957)

Price: PLN$404.1 Parking: Free (Confirmed)

福字麵加炸菜