2012 捷克、奧地利、匈牙利自駕之旅 (12) - Day 6 Salzburg > Hallstatt 31 Oct 2012

Day 7
Salzburg > Hallstatt > Landhaus Osborne (Obertraun)
31 Oct 2012

今日又係早就醒咗，不過5點先起身，之後就Hae咗陣，食埋早餐8點幾先離開Salzburg。今日我哋會去Hallstatt，呢一地方嘅城鎮成個都已經列入咗去世界文化遺產到。執好晒D嘢，放返D嘢上車到我哋就出發，今日就係唔洗Checkout，因為尋日已經同Apartment負責人講咗會早走人嘅，重諗住順便埋單，點知佢哋就用信用卡過咗數~~噢~~個Rate可能無咁正，佢哋話Cancel個交易，我話唔洗啦，一來一回又俾銀行收埋個差額，咪重蝕~~所以最後呢間Apartment都係用信用卡埋單，講開又講，通常我去旅行都係用現金找數，因為咁樣會容易D圍到個開支，如果用信用卡唔係唔好，不過個Rate會比較浮動D咁啫，相差查實唔係咁大嘅…

由Salzburg去Hallstatt，GPS話要幾鐘就會到，一路行都非常暢順，今日我哋重入咗油同順便洗下車，架車都幾哪喳，可能係因為行係D落雪嘅路上面呱，查實都唔係話點洗，D油站通常都有D工具可以洗下個擋風玻璃之類嘅嘢，我咪順便洗下個車身囉…

行下行下就不知不覺入到去Hallstatt區域附近，因為沿途嘅風景都幾靚，有D瑞士Feel，加上今日重要陽光普照添，所以時間過得特別快。行行下咁啱又路經一間超市喎，我哋咪入去睇下有咩買囉，買咗支可樂同兩支水，支可樂成2Litre，但係都係港幣兩個幾咋，真係平過買水呀…

我哋大概10:45到到咗Hallstatt，之後就將架車泊咗係指定停車場入面，Hallstatt個市中心，係指定時間內，無記錯應該係 08:00~17:00 係唔俾外來嘅車輛駛入去嘅，除非有Permit 啦。先前有問過係呢到住宿嘅負責人都係咁講，所以就搵好資料，係Car Park No.2 係最近市中心嘅，所以我哋就泊咗架車係呢個停車場都啦~~

一落車，嘩吓~~原來都幾凍個喎~~成個地下都重係雪~~但係附近環境真係幾靚，好~~開始行程啦~~

由停車場行落去市中心，其實都係5分鐘路程之耐，呢個停車場附近重係睇鹽礦嘅地方添呀~~行到落去個城鎮入口到，就會見到一個石像，呢一個石像其實係一個鹽礦工人來嘅，因為呢個城鎮其實係由採鹽發跡架~~

跟住行入去睇下呢個世界文化遺產嘅城鎮，就會路經一間買炸雞嘅舖頭，呢一間炸雞好多人都話幾好食，我有個朋友重同個老板改咗個名叫Chicken Man 雞佬，哈哈~~我路過個時就叫咗佢一聲Chicken Man，呀~~佢有應我喎，真攪笑。

之後我哋就沿住條路行入去，人都唔多個，行行下見到個湖，嘩~~好靚呀~~好似仙境咁，加上今日又好天喎，個湖面上面重要有一層好似霧咁嘅嘢，好靚。我哋就不停咁係到影相啦~~一路行一路影~~影到入去個市中心入面，其實有好多舖頭都無開門，後來同一個遊客傾開，佢話呢到D舖頭通常10月尾都會休息一個月，好多都去咗旅行，所以好多舖頭都無做生意~~原來係咁!!

晨早起身，重見有月亮

凍到結冰

簡單早餐

成架車都結晒冰

出發啦..

沿途經過嘅地方都係舖晒雪

今日陽光普照

中途嘅一間超市

Hallstatt Parking

呢到就係去鹽礦嘅Cable Car

Hallstatt入口

呢到入到去靚到好似仙境咁

得好少舖頭開門咋