2009 日本東北之旅 Day 2

2009 日本東北自駕遊 Day 2

日期 : 25.10.2009  星期六

行程 :  スーパーホテル小山 (栃木県小山市 SuperHotel) > 天皇の間記念公園 > 塩原溫泉足浴 & 吊橋 (塩原郵便局) > Lunch@ 道の駅　那須与一の郷 > 古怪美術館(トリックアート迷宮館) > 大內宿石原屋 > 東横イン 会津若松駅前 > Dinner@吉野家


總行程里數 : 256 公里 – 大約 6 小時 23 分鐘

住宿 : 東横イン 会津若松駅前

Map

檢視較大的地圖

經過一晚嘅休息，諗住遲Ｄ先起身，不過其實都唔係好遲 !! 係日本嘅六點鐘就起身啦(其實係香港嘅五點咋!)，執返Ｄ眼耳口鼻之後就落去食返個美味嘅早餐先 ! 我哋今次選擇SuperHotel做膽嘅其中一個原因就係因為以佢以呢個價錢都有咁嘅早餐食(同東橫Inn差不多，有部份重要平過東橫Inn添呀 !!) SuperHotel 嘅早餐聲稱係用天然同新鮮嘅材料烹調，不過我就唔理佢用咩料啦，有得好似食Buffet咁有得揀嘢食個喎，雖然款式唔多，但係就好好味喇...重有就係佢哋係早餐時間嘅時間有一部飲品機可以免費俾Ｄ住客飲所提供嘅飲品，通常實有咖啡、重有Ｄ有汽水、粟米湯、奶茶、健康飲品...款式都有好多，最重要係任飲，啱晒我哋啦.. 間房望出去嘅景物...(係......無嘢睇嘅...)  

睇下有咩食先...基本上實有嘅沙律、魚、麵包之類嘅食物

嗱...自助架，想食幾多就攞幾多..食完就好滿足架 !!

睇下Ｄ麵包都有幾款俾你揀，重要係唔差個喎...

呢一間就係我哋第一晚住嘅酒店啦...

食完早餐，我哋就上去房到Hea下，上下網打下機、睇下電視、辦下工，攪下呢樣攪個樣就去到成九點幾喇..於是，我哋就決定九點半正式出發啦...
好喇，我哋 Hae 到成九點半就出發去我哋今日嘅第一個景點啦 (往後嘅十幾日都無試過咁遲出發啦，因為太陽伯伯好快就收工，又好多景點無光嘅情況下係無嘢睇架....)。

好啦，睇下我哋第二日嘅旅程有幾多地方會去先...睇圖啦...總共係行咗221km架...都幾遠下個喎

好啦...出發喇，攪下呢樣攪下個樣都成9:45先開車

大約45分鐘嘅車程就到咗呢個景點，就係天皇の間記念公園，我哋一路去就有好多紅葉出現啦，不過其實有好多都開始枯黃喇~~~重有其他個都幾凍下，可能係係山邊到嘅關係呱。我哋去到嘅時間都有唔少嘅日本人係到進入去參觀，我哋兩個人係出面望下望下，最後都係無入到去睇，一來要俾入場費，二來呢一種嘅日本庭園式嘅建築我哋重會有得睇，所以我哋就係門口到影下相睇下附近嘅環境好似重靚喎~~~

去到嘅時候有唔少嘅日本遊客係到....

附近嘅樹Ｄ葉其實都開始枯緊

天皇の間記念公園附近景色

呢Ｄ係咪叫做萬綠松中一點紅(橙)呢 ?

指定動作....影返張到此一遊嘅相先

門口嘅景色

係個入口到可以見到重有Ｄ樹係好靚..(但係只係呢一棵咋~~其餘個Ｄ就....)

睇完呢個天皇の間記念公園，我哋就繼續驅車前往下一個目的地那須古怪美術館...但係呢個GPS幫我哋加插行程喎，帶咗我哋去浸腳同埋去睇咗一條吊橋喎 ! 其實係唔知點解個GPS有近路唔行係要兜個圈囉。揸住架車睇住個地圖行縮細先知原來係兜咗個圈，正當想話個GPS想徙我油之時見到有個地方有個足浴呢兩個字出現喎。嘩吓~~咪講少兜入去停低浸下先，還掂又唔洗錢嘅 !! 但係呢，就好多車停晒係到囉，揸車最唔想遇到其中一件事就係等位，好在好快就有個位有得停啫(但係其實呢個都唔係位，我見有個人停咗係係車位嘅隔離見唔阻人我咪有樣學樣囉 !! 停低咗就去個足浴到浸下腳係~~~真係好舒服嘅呢 !! 我哋浸咗大約10分鐘到就走人喇，浸完成個人暖晒~~跟住臨走嘅時候又見到有條吊橋幾靚喎，影返幾張相留念下先 !!
嘩~睇下外邊嘅溫度得12度架咋

見到足浴呢兩個字我哋到不知幾開心呢~~~

咪講笑浸下腳先 !!

呢個足浴嘅溫度都幾高下架，你哋睇下出水個位置煙霧迷漫就知啦

原來呢到叫塩原溫泉區....

附近有條吊橋可以行返去天皇の間記念公園附近架

條橋都幾靚架...重有唔少遊客添

橋下面嘅河，附近Ｄ樹都變晒色啦

睇完呢個途經景點之後，我哋就繼續行程，去呢個古怪美術館(トリックアート迷宮館)，都搵到去呢個古怪美術館(トリックアート迷宮館)都差不多成點鐘，當然要醫一醫個肚先啦。係頭先去呢個古怪美術館(トリックアート迷宮館)之前，我哋途經見到有個道の駅　那須与一の郷，咪講笑係呢個道の駅食返個 Lunch 先，入到去見到又好多人係到，原來佢哋係到攪緊一個叫收穫感謝祭，食完飯我哋就去睇下喇。佢哋將Ｄ收割咗嘅農產品整Ｄ嘢出來買俾人食。又有好多唔同嘅嘢食，都幾得意。

唔好講笑，食咗嘢先睇嘢

入面個裝修都幾靚

兩個餐都幾好味

那須和牛...本來想食呢個但係呢又幾貴下喎...

咁啱又個收穫感謝祭

有Ｄ小食整俾到場嘅人食

 

好喇，睇完呢個收穫祭我哋就去睇呢個古怪美術館(トリックアート迷宮館)喇，去到都無咩人，可能係閒日呱 !!

入去就要買入場卷，先前係網上面睇佢哋個網嘅時候有九折嘅 Coupon Download，當然就要整返張啦。入晒全部嘅館要成￥5,000，其實都幾貴，不過見到有好多人去完影相返來都覺得唔錯，緊係要去睇睇啦。

首先就係入去第一個館先，入面Ｄ嘢都幾攪鬼個喎，好多都係用視覺上嘅技巧令你睇到有另外一個視覺效果出現，係到玩下影下相，影相都唔係你想像中咁簡單喎 ! 要影到靚相你就要識得擺Pose同埋就角度先至可以影到靚相，所以我哋睇晒全部嘅館都睇咗成個幾兩個鐘。

睇下呢個就係要用Ｄ視覺效果就好似揸住佢隻腳啦

我個身係邊呢 ?

嘩~~好重呀...

                           弊..俾嘢拗住嘢

呢個Pose擺咗好耐先影到咋 !!

睇完呢個古怪美術館(トリックアート迷宮館)，我哋就順路去睇呢個大內宿石原屋，我哋去到嘅時候差不多四點半到，其實佢都差不多收工，所以見到有好多旅行團準備走人。係泊車到行過去大內宿入面條街都有一段距離，後來入去睇呢條古代商業街嘅時候發覺係街嘅最後係有地方泊車。好~~講返Ｄ街先，其實都係食嘢同買嘢嘅街重有Ｄ食店添呀，我哋當然係要食下嘢啦，食咗Ｄ好似燒餅同埋好似Ｄ關東煮嘅嘢..佢哋大約五點鐘到就準備收工，咁我哋都要走人啦..

入到去都天色已漸沉...睇唔睇到棵樹有幾紅呢..

如果係早Ｄ嘅話我諗呢一段街應該會好多人

燒餅....味道就一般啦...

睇完食完嘢我哋就要驅車去我哋酒店東横イン 会津若松駅前個到喇，因為車程都幾遠下架，我哋去到都成六點幾喇，去到酒店見到個停車場，諗住Check-in咗之後再出去搵嘢食，點知個酒店泊車亞伯又唔知做咩，同佢講我哋只係Check-in後就走，佢唔知講咩~~係我哋同佢雞同鴨講嘅時候，有幾個人係都泊完車行咗入去辦Check-in，我哋就唔理佢，攞埋行理就人去Check-in。做好Check-in攞埋Ｄ行李上房就出去搵嘢食，兜咗一陣都唔知有咩食，見到有間吉野家係到就食呢一間啦。日本嘅吉野家同香港嘅唔同，只係有牛食，我哋叫咗兩個餐，味道都幾好味，不過不失啦。食完嘢就返酒店休息，本來想返去酒店前兜下睇下有咩嘢行，但係好多店舖都閂晒門，咁唯有返去休息啦 !

兩個都係牛嘅，都幾好味  

景點資料:
塩原温泉天皇の間記念公園 地址：栃木県那須塩原市塩原１２６６−１１３ Tel. :0287-32-4037 塩原溫泉足浴 & 吊橋 呢個景點係無資料架，附近就有間"塩原郵便局"，將呢間郵便局嘅電話入去GPS應該可以搵到呢個浸腳.. 塩原郵便局 地址 : 栃木県那須塩原市塩原２５４−８
Tel. : 0287-32-2800



古怪美術館(トリックアート迷宮館)
地址 : 栃木県那須郡那須町大字高久甲５７６０
Tel. : 0287-62-8388


大內宿石原屋地址 : 南会津郡下郷町大字大内字山本5福島県南会津郡下郷町大字大内字Tel. : 0241-68-2914