2013 西班牙葡萄牙自駕之旅 (租車篇、泊車及其他關於自駕資料)

 2013 西班牙葡萄牙自駕之旅 (租車篇、泊車及其他關於自駕資料)

租車，呢個對我來講都幾重要(對我來講，因為我係主要使用者)，原來係西班牙租車同其他地方都有D分別，一陣就會講到(可能其他地方都係咁都唔定)。

一般租車都會搵個幾間國際性嘅租車大型公司，好似 Hertz, Budget, Avis, Sitx同 Europcar ，不過自從我發覺經D中介公司租車係會平過呢D大公司之後，我通常都會係呢D網都 Quote 價（不過凡事有例外，因為有時個D大公司會出D優惠，可能租5日免5日之類嘅優惠）。

好喇，講返我家下用開個兩個Website，一個係 rentalcars.com 同埋一個叫 economycarrentals.com，而提供車輛俾佢哋用嘅好大部份都係上面提及過個幾間大公司，不過今次我發覺有好大部份嘅車都係有Pre-Purchase (Fuel) 呢個要求，即係要你首先買一缸油，到還車個時唔洗入滿油。初初睇好似幾好，因為唔洗理還車個時要再入滿油，不過我睇返D使用者嘅評語，話呢一缸油嘅油價通常都俾油站貴。咁我又諗，其實佢哋都幾著數，通常好多人都唔會用油用到盡，最非你還車嘅地點好近你最後一個景點，又或者你可以預計到自己個用油量啦，如果唔係有D咩突發事要揸多一段路，咁就會好容易會出事。

其實好似我咁，通常都係係機場還車，沿路都有好多油站，基本上係唔怕搵唔到油站入油，到入滿咗，揸個一程去還車通常支油針都唔會郁，所以我就要揀D係 Full to Full 嘅要求嘅車來Book。

今次其實想揸D未揸過嘅車來揸，初初係其中一個網到見到有架寶馬(BMW Series 1)喎，重要係 HK$5000有交易，就Quote咗價先啦。不過諗諗下，D人成日話西葡治安唔好，攪到我有D心大心細。過咗幾日再用個 Quotation 去睇下架車，無咗!之後一路呢個款都無出現過~~~好喇~~算~~搵架係個邊最普遍嘅車種，咁我就揀咗 Citroen C4 or Similar 呢個 Class，不過最後去到攞車個時就俾咗一架 Benz B180 Diesel (Diesel比汽油油價平少少，真係少少架咋)俾我哋喎，架車重要係行咗萬幾公里，上車重要有一陣新車味添。一見到架車，嘩~~咁大架嘅，有D不滿嘅感覺 !! 如果係其他國家就真係無咩所謂，不過係西班牙同葡萄牙真係有D覺得佢大架，因為一入佢哋D市中心，D路真係好窄，重有就係D人話D停車場D位好細，入去嘅路又係好窄，所以真係有D擔心。不過俾到又無理由換車，因為一要換可能要攪唔知幾耐，所以最後都係要咗呢一架車。但係除咗架車係比我預期中大咗少少之後，好多嘢都好正!架車揸起來都幾舒服，揸揸下重發現呢架車係有鎖速嘅Function，嘩~~呢個Function好正呢，係要行D高速公路其個鐘個時你就會覺得好正，因為唔洗長期咁踩住個油門，重有架車其實都幾慳油，成個Trip到係入咗HK$25XX，今次行咗成3743km到，即係每公里大概係HK$0.6一公里到(重平過我香港揸個架車~~)，整體來講呢架車係非常正嘅~~

今次間中介公司俾咗一間叫 Atesa 嘅租車公司俾我哋，個 Counter 都幾容易搵，都係係埋租車公司個一堆到。辦理呢個租車手續過程都好快，之後就會行去呢個機場嘅停車場到攞車，係個到又有一個接待處，將之前係 Counter D文件俾晒佢哋就會安排架車俾你。還車個時過程又係好快，佢哋睇都唔睇個車身，淨係睇下行咗幾多公里同埋有無入滿油就攪掂，重問我哋對佢哋個 Service 滿唔滿意喎，話時話都真係幾滿意喎，因為好快手。

重有就係租車嘅時候佢會要求用你嘅信用卡做返個 EUR$150 嘅 Deposit，我都唔知佢有咩用，不過都要俾~~

題外話，呢條 Deposit 係幾日之後出現咗係我張 Credit Card 嘅 Account到，之後返咗來幾日，間租車公司 Return 返呢條數，問題出現啦。係第一次過數，銀行就收咗我 HK$1640 ，之後 Return 個時就回返 HK$152X 到，咁有成百幾蚊嘅差額，邊個要俾呢 ? 因為其實呢個都係可以當係一個未完成交易，點解銀行會收個差價嘅 ?? 於是我當然係打電話去問問信用卡公司啦，佢話係外幣嘅匯率問題，所以就會有個分別。咁我就話呢一個其實係最終係一個唔成立嘅交易，點解有個差額要客人去俾嘅呢 ? 之後攪一輪，佢哋話會幫我申請取消呢個差額嘅收費~~