2009 韓國自駕之旅 - Book 車篇

講咗咁多景點資料，不過講下韓國租車嘅嘢喇...去外地揸車有香港車牌嘅你當然首先要去香港運輸處申請返個國際車牌先啦..申請費用係HK$80有一年有效期，申請時需要提供兩張近照 ，申請書可以係呢到Download --> 國 際 駕 駛 許 可 證 申 請 書

之後呢，就係要搵返間租車公司，如果想係香港Book定先的話，只有兩間可以做到 ! 一間就係Avis，而另外一間就係Hertz韓國。我兩間都租過，兩間嘅價錢如果同一車款係一樣，但係有部份車款兩間公司有Ｄ有，有Ｄ無，咁就要睇下你個人想租邊一種車款再決定。但係其實係韓國都重有好多間租車公司提供租車服務，但係呢....要識韓文囉，唔係網上book就要去到機場先決定租邊一間都重可以，好多租車公司係機場都有Counter，價錢好大機會平過Avis同埋Hertz......(但係我無比較過~~貴咗唔好話我喎...)

以Avis & Hertz 來做例子，如果你想要透過網絡租呢兩間公司嘅車的話，你首先要登記做會員先，過程好簡單容易(嘻嘻，其實係我懶啫，如果真係唔識就再問我啦!!)。選擇租車嘅日期同時間，然後就選擇車款，保險同埋GPS，韓國租車係以每小時來做單位架，所以你用幾耐就租幾耐。完成晒所以嘢之後就會有個記錄，基本上你呢個booking係唔會收取你任何錢，因為基本上你登記做會員係唔需要入信用卡資料。所以~~~如果大家真係book咗，之後有任何更改或者唔要的話，係你個booking record入面應該有記錄，所以記得要Cancel 返佢，唔好book咗又no show，咁會影響香港人嘅形象架嗎~~~知道無 !!

重有樣嘢想提提大家，就係如果你係網上面book的話，最好就print埋個booking record出來以作記錄，因為大家言語上有機會溝通唔到，同埋個價錢有記錄，如果多咗可以攞出來話俾Ｄ職員知個價錢唔啱喎...我就試過租第二架車嘅時候，個價錢多咗成50,000won。出入咁大我當然要問問點解啦，最後佢哋都係收返我係網上面個價 !

另外就係上面提及個兩個租車公司都有提供GPS(Navigation)，可以係book車時選擇埋，但係只得韓文嘅，有得睇下都叫做好過無呀嗎 !!

講開 GPS (Navigation)，如果大家係搵資料嘅時候想去睇嘅景點、住宿地方或者食店有電話號碼或者地圖的話，盡量抄低，因為我都係靠呢Ｄ資料去呢Ｄ地方架咋。韓國嘅GPS同日本嘅差不多一樣，但係你如果要去一個地方的話，你入資料嘅時間要輸入韓文(呀~~~無搵過有無得入英文名去搵地方添，如果有人試過就話我知)，一係就好似我咁，入電話號碼或者係地圖到直接篤入去搵 !!

 

Avis (韓文及英文) http://www.avis.co.kr/eng/index.jsp

Hertz 錦湖汽車租賃公司 (韓、日及英) http://www.korexrentcar.co.kr/en/Main.aspx

 

Budget(韓文)  http://www.budget.co.kr/

大信(韓文) http://www.ilj.co.kr/

東亞 (韓文) http://www.dongarent.co.kr/

城山 (韓文) http://www.sungsanrent.com/index.php

漢城 (韓文) http://www.hansungrent.co.kr/

濟州夢想 (韓文) http://www.dreamrent.co.kr/

韓國 (韓文) http://www.hankookrent.co.kr/