2009 日本東北之旅 Day 15

2009 日本東北自駕遊 Day 15

日期 : 7.11.2009  星期五

行程 : スーパーホテル山形駅西口  > みやぎ生協 COOP MIYAGI(黑松店) > 志波彦神社鹽竈神社‎ > Lunch@くら寿司仙台中野栄店 > 大崎八幡宮‎‎ > 瑞鳳殿‎ > スーパーホテルCity仙台 > 広瀬通 > Dinner@仙台牛タン発祥の店 味太助

總行程里數 :

131 公里 – 大約 3 小時 11 分鐘

檢視較大的地圖

今日行程就係開始Hea住來玩啦，因為大部份嘅景點我哋都睇咗啦，淨低嘅可以去可以唔去都得，睇情況而定啦。我哋食完早餐例牌上去Hea下先，大約九點半我哋先出發，但係又唔記得影低酒店個outlook喎...

今日我哋首先去鹽竈市嘅塩水產物仲御市場，中途經過一間大型嘅Shopping Mall，我哋以為有嘢睇，所以就入咗去睇下啦...原來係 SuperMarket來嘅 !! 重要係呢到整到將部相機跌咗落地添，攪到部機之後傻下傻下咁，去到個御市場個時部相機都重係傻下傻下咁，重要影唔到相添，好在最後佢都正常返，但係都唔敢大力咁整佢喎，怕佢又傻咗。我哋去個御市場，原來呢個係一個街市來架，我就入去睇咗一陣影咗幾張相就走人啦...附近又無咩嘢行。於是我哋就去咗附近嘅一個景點志波彦神社鹽竈神社‎參觀下啦，去到呢個志波彦神社鹽竈神社‎，見到有好多小朋友係到喎，重要著晒成套和服咁，係個神社入面有Ｄ棋寫住咗"三五七"，唔知係咩來，我哋估計應該係幫Ｄ三、五同七歲嘅小朋友祈福嘅日子，都幾得意喎 !!

睇完時候又差不多係食Lunch嘅時間，但係附近又無咩食喎，好在來個時留意到有一間迴轉壽司，於是就沿路行啦，點知行行下入咗Ｄ OneWay 路喎，最後唯有入返酒店個地址行返出去啦，好在最後都行返來個條路，俾我哋搵到個間壽司店。但係呢一間就唔係我哋食開個一間連鎖店，有多Ｄ選擇，重有火燄燒北寄背添呀，但係個海膽就唔好食囉，話唔好食但係我哋都食咗成10碟先收工呀~~~~其實呢個鹽竈市睇旅遊書講有好多壽司店架，不過路程就會遠好多啦，所以我哋最後都無去到架....

食飽就繼續我哋嘅行程啦，就係去仙台嘅景點啦，首先我哋去咗大崎八幡宮‎‎，呢個宮又係有Ｄ三、五、七嘅棋係到，但係就少好多人，呢個宮其實都無地方俾我哋泊車架，我哋都係求其搵個地方泊咗係到咋~~~呢個宮係要行上去架，入面Ｄ門柱好有型同埋靚仔架。之後我哋就去咗瑞鳳殿‎，去到個瑞鳳殿‎個時咁啱係到裝修緊，所以我哋無入到去睇，因為呢個地方要收入場費架....

跟住我哋就驅車去酒店啦，去到都成四點幾啦，我哋就即刻Check-in，間房都係偏細，唔知係唔係因為係特價房嘅關係定係其實間間都係咁細間嘅呢 ? 上網搵咗一陣資料我哋就出去行下街啦，我哋去咗LV到睇嘢，本來想買一個包包架，點知原來全日本都係 Sold Out ~~所以買唔到嘢添 !! 之後我哋就係仙台市呢幾條大通到行咗成二個幾鐘啦，我哋重行咗去仙台駅。期間我哋去咗Ｄ藥房到買咗Ｄ嘢，之後就去食炭燒鹽牛舌，今次我哋去咗本旅遊書介紹嘅一間叫做仙台牛タン発祥の店 味太助，我哋叫咗兩個鹽燒牛舌定食，而我哋就座咗係個爐前面，一路食一路睇住佢哋燒Ｄ牛舌都幾有風味呀。呢一間嘅牛舌味道都唔錯，但係就比較乾身，同我哋第一次食個間有Ｄ唔同，都幾好味 !! 但係個湯就好好味囉...我哋食食下就有一班香港人入咗來食，呢間睇來都幾多香港人來食個喎 !!

食完我哋就返酒店休息同埋搵下Ｄ景點，睇下聽日去咩地方好，但係呢有Ｄ口乾喎，唔通個牛舌落咗師傅~~~

今日得一兩個行程，都幾 Hea 下...鹽燒牛舌好味..

呢到都幾多人來架....

入面Ｄ環境都唔錯架..

有好多小朋友係到架...唔知係唔係到祈福呢...

我哋嘅至愛.....迴轉壽司

車仔都要食下嘢先...

大崎八幡宮‎‎

睇下有老外架...

瑞鳳殿‎

裝修緊...

仙台市

仙台牛タン発祥の店 味太助

你睇下佢哋幾神氣...嘩~~~Ｄ牛舌燒得幾靚...

鹽燒牛舌定食

睇落都幾好味咁喎....

呢個湯都好正架...

呢個應該係老闆啦...