2009 日本東北之旅 Day 16

2009 日本東北自駕遊 Day 16

日期 : 8.11.2009  星期六

行程 : スーパーホテルCity仙台  > 吾妻八景 (白樺の峰、つばくろ谷、天狗の庭、浄土平、双竜の辻、湖見峠、天風境、国見台)  > Lunch@レストラン　サペレ吾妻‎‎ > JUSCO > Dinner@ 元気寿司東武店‎ > スーパーホテル宇都宮 > 宇都宮餃子小町 > 宇都宮駅前橫丁

總行程里數 : 295 公里 – 大約 7 小時 20 分鐘

檢視較大的地圖

今日係行程嘅第16日，今日本來諗住遲Ｄ出發，直接去宇都宮。但係尋晚搵資料個時發覺我哋係呢個區域重有個地方係未去，就係福島嘅磐梯吾妻喇，還掂都係順路，我哋就去埋先落宇都宮啦。

由酒店去磐梯吾妻都要成個幾鐘先到，行呢條路重要係俾路費添呀。沿路行Ｄ樹到枯晒，好凄涼咁，如果有紅葉個時應該係幾好睇架，重有就係沿路都有唔少嘅影相位架。其實沿住呢條路行就會睇到好出名嘅吾妻八景 (白樺の峰、つばくろ谷、天狗の庭、浄土平、双竜の辻、湖見峠、天風境、国見台)，沿路行都有Ｄ積雪係路邊，重有Ｄ山頂都有積雪。

去到山頂嘅浄土平嘅停車場又係有料嘅停車場，泊低架車我哋就行去睇呢個浄土平，其實呢個係一個火山口，行嘅時候都幾大風重幾凍添呀，吹下吹下雙耳重好痛添呀...我哋行下行下就去都個山頂位，睇返附近嘅環境都幾靚，重要有雲海睇到添呀。係我哋嘅對面個山個山頂重要有Ｄ煙不停咁霧出來，唔知呢個係唔係一個活火山來嘅呢 ?! 其實呢個行去呢個山頂嘅路真係唔係咁好行，好多碎石，都會幾容易跣低架同埋係Ｄ懸崖邊到行都幾危險，一唔小心就會跣落山，不過我哋見到Ｄ日本人男女老幼重要帶埋Ｄ狗狗上去添呀~~~~

行完呢個火山口都要用咗成半個鐘，之後就行落去個休息處到休息下，入面有嘢買同有嘢食添~~我哋見都差不多成點鐘就食埋個Lunch先走啦...

我哋兩個人叫咗個烏冬加個飯定食，都夠我哋兩個人食喎!食完就係Ｄ買手信嘅商店都試食，試咗Ｄ芝麻餅，呀~~又幾好食喎，之後又試咗Ｄ有糖包住嘅寒天，又幾好食喎，所以就買咗Ｄ來自己食同埋做手信啦...

之後我哋就出發去宇都宮啦，個GPS預計我哋要成七點鐘先到達，但係最後我哋就六點鐘就到咗，因為一路都好多車同埋塞車，所以行得好慢，如果唔係應該可以重快Ｄ到...

去到SuperHotel佢問我哋係咪連住兩個，本來諗住住一日呢到之後另外一日住第二間，個間係係新瀉(好嗱遠架)，不過就未取消呢個Booking，諗住都無咩所謂就連住呢一間啦，所以就要取消另外一間啦...重有聽日係附近到睇下嘢，唔洗咁趕呀嗎，最後一日可以直接去機場.....

好喇，今晚我哋食咩好呢，宇都宮就出名餃子，於是我哋就驅車出去搵食啦。當然要搵Ｄ唔洗俾錢嘅泊車位啦，我哋就泊咗係一間百貨公司入面，有一個鐘免費泊車架。之後就係附近搵嘢食，但係都無咩食咁嘅，見到又唔係有好多時間，所以就搵咗一間日本嘅元氣壽司食啦。呢一間元氣壽司款式都幾多下，但係價錢就唔係好抵啦，所以我哋食咗都幾係好多碟就走人啦。見重有Ｄ時間就係個百貨公司都行下啦，不過好多舖頭都準備閂門啦。我哋行咗一陣都返去酒店到，然後我哋又行去個車站到睇下啦，原來入面都又幾多嘢食個喎，早知行過來呢邊食喇，唔緊要聽日我哋可以來呢個食架嗎。入面重有一個商場但係就唔係好多嘢睇囉~~睇咗一陣就返酒店休息啦....
今日係倒數第三日就完成成個日本東北之旅...尋晚睇返地圖原來重有一個景點未去，就係盤梯吾妻未去，呢個景點係我順道可以睇埋所以今日就去咗...不過Ｄ葉已經枯晒，之後去咗宇都宮

嘩~~~漫漫長路....

Ｄ山好滄桑咁呀...

淨土平，係呢到嘅山頂位置，都幾高下架

我哋就係行呢Ｄ梯上去個火山口架啦..

火山口

一望無制...海闊天空

有無人落過去呢 ?

睇就唔係好高，但係都要行得幾辛苦下架...

唔好講笑，食返個Lunch先

日落......Magic...

去宇都宮途中

元喜壽司晚餐...味道真係幾一般，價錢重要唔係平...同我哋食開個間真係無得比...

宇都宮車站

餃子祭...oh no...我哋去到個時已經玩完啦..

呢一間排晒隊應該好食，聽日試下先

去香港嘅旅行團，嘩~~都唔平喎...

夜晚嘅宇都宮車站

唔知入面有咩食嘅呢 ?我哋入到去個時Ｄ舖頭閂咗門..