麗江大研古城 > 束河古鎮 > 白沙壁畫 > 束河古鎮 > 麗江大研古城
午餐 : 束河古鎮飄香小店
晚餐 : 束河古鎮奎記橋鄉情雲南過橋米線
經過連續兩日參加咗本地一日遊，今日我哋就開始返自由行喇。所以今日就11點先出發，我哋今日嘅目的地就係去呢個束河古鎮同埋白沙古鎮。之前係參加玉龍雪山等車個位到見到有好多車係去束河古鎮嘅，所以我哋就去個個位到睇下有無車去先。一上去就問咗一架，$40去束河古鎮，即成交 !!
由大研古城去呢個束河古鎮車程其實都係三十分鐘內到，去到佢係停車場就放低咗我哋，我哋就係到繼續遊蕩，順便睇下有無嘢食，因為都係時間食午餐。行行下，見到有兩個女仔租咗架電單車來揸，真係用電個一隻喎。佢哋話係去呢個白沙古鎮嘅~~~咦...我哋都係喎，問咗佢哋話$80 !! 之後我哋行行下不如都租埋來揸，順便搵嘢食。
咁就展開咗我哋自駕之旅喇，本來係網上面有人介紹一間食店嘅，不過搵唔到，但係我哋去到個一間食店附近嘅地方，就有好多間食店。於是我哋就揀咗一間來食，呢一間出面有條河仔係到，又有一個水車仔係到，都幾靚仔~~~不過呢一間食店嘅嘢食都唔係好平，飲嘢就重貴，要成$10一罐汽水，咖啡個D重貴，要成三十幾蚊杯。但係呢一間食店嘅嘢食又整得幾好食個喎，所以都OK喇~~~
食完嘢，就展開咗我哋自駕之旅，由束河古鎮揸車去呢個白沙壁畫大概都係15分鐘到，如果原先我哋係踩單車去嘅話，我諗我哋要踩40分鐘到啦。去到呢個白沙壁畫，當然又係要俾入場費喇，另外古城維護費嘅收據都要出示架，如果無帶就要買過喇。
其實呢個白沙壁畫就無咩嘢睇，係一個殿入面有幾幅大嘅壁畫囉。佢另外兩個殿又無開到喎，所以呢一個景點係好少人來睇嘅~~睇完我哋就走人啦，本來諗住沿路去附近嘅地方到睇下嘢，因為我哋揸車來個時見到有D牌寫咗D地方，但係唔知點解揸返去個時就見唔到喎。一直就返到去呢個束河古鎮啦，因為個鎮入面都幾多人，我哋就搵個地方泊低架車，然後就繼續係呢個古鎮入面四圍遊蕩喇，周圍影下相，又行埋呢個古鎮嘅四方街就搵間食店食晚餐喇。
今次我哋就食呢個過橋米線，因為來到雲南點都要食下架嗎~~~呢個米線都唔係平，要成四十幾蚊一碗，個米線底重要唔係好多，要另外加多一個先夠食，不過味道又真係幾好食嘅。
食完我哋就去還車，然後就去搭車返去呢個大研古城，不過問第一個司機話要$50，咁我哋來係$40架嗎，無理由要俾$10，咁就行去搵另外嘅，都係要$50喎。咁我哋咪諗住搭的士囉，最後有一個司機肯$40返去，就成交啦~~~
返到去，我哋就食生果，因為頭先係束河古鎮到買咗一D生果食，有芒果同埋李仔，不過味道就唔係咁好食~~~玩埋聽日，後日就要返香港啦，時間真係過得快啦.....
沒有留言:
發佈留言
來到留返句說話先走啦...