2013 馬來西亞榴槤忘返自駕之旅 Day 6 (6)

2013 馬來西亞自駕之旅 Day 6 26/12/2013

Hotel Sentral Georgetown > 食生果@Perkampung Buah-Buahan Tropika Bukit Gantang Selatan(R&R Bukit Gantang - Northbound)(中途休息站) > Lunch@Ipoh 老黃芽菜雞沙河粉 > 玫瑰山谷Rose Valley@Tringkap Cameron Highland > BOH Tea Center Sungei Palas > Heritage Hotel Cameron Highlands >  Dinner@Rosette > 行夜市@Tanah Rata > Heritage Hotel Cameron Highlands

今日我哋就會離開呢個檳城啦，會去呢個金馬侖高原進發啦~~~由檳城去金馬侖高原，車程就係兩個半鐘到。我哋大概9點幾先開車，應該就會係呢個12點到到達呢個金馬侖高原，不過行咗一排高速公路，個人有D眼瞓同埋想去放返D嘢出來，所以就去咗一個中途站。係馬來西亞嘅高速公路到，每隔一段距離就會有呢D休息站，有D有得買嘢食，有D就淨係俾你放低D嘢~~~

我哋去咗呢個係叫做Perkampung Buah-Buahan Tropika Bukit Gantang Selatan(R&R Bukit Gantang - Northbound)，其實我都唔知叫咩名。我哋係途經去呢個廁所期間，又發現呢到有得買榴槤食，團友們嘅榴槤癮又發作，去完廁所又走去買榴槤食。我哋榴槤癮發作嘅團友一共買咗4隻榴槤來食，本來想主打買D平價嘅榴槤來食，主要係買青皮，但係有團友見到有D24又兩眼發光，最後都買咗一隻來食，不過呢一隻D24完全係唔似囉，比起之前係檳城食到嘅差一大節，反而D青皮又真係平、靚、正喎~~~除咗榴槤之外，我哋重有買菠蘿同埋芒果食。D菠蘿唔係好得，同香港食到嘅真係兩樣嘢來嘅。而D芒果就無即刻食，我哋去到呢個金馬侖高原先食，又甜又好味呀~~

我哋食到成11:30先走人，見時間都咁遲，我哋就決定去怡保到食個Lunch先上去金馬侖高原喇。去得怡保梗係去食呢個芽菜雞啦，上一次我哋去咗安記食，今次我哋就去呢個老黃到食下先。我哋大概係12:30到咗老黃個到，泊車又係泊街邊，有人會指你泊去邊，落車時俾幾蚊佢哋就得。

去到老黃到幾多人，好在都有位，我哋就叫咗呢個兩碟芽菜、雞、豬肉丸(其實可以唔洗叫，因為並唔係咁出色)，重有我哋又叫咗雞腎同雞腳，當然唔少得就係叫呢個吉仔茶啦，沙河粉都叫咗，不過唔係每人一碗，因為之前係中途站食咗唔少嘢~~~怡保嘅雞真係好好食，係香港真係好少地方可以整到咁好食囉~~~重有D芽菜，真係怡保先有~~~食完…我哋就順便去宴瓊林到買返隻鹽焗雞來食下，不過我哋都係諗住去到酒店先食，因為家下實在係幾飽下~~~

食完嘢我哋就繼續向呢個金馬侖高原進發啦，我哋大概一點鐘出發，要成差不多三點鐘先到咗金馬侖高原嘅第一個景點，玫瑰谷。泊車就咁泊係出面就得，無人會理你。呢個玫瑰山谷入面就有好多花係到，不過就唔係咁靚，我哋行咗一個圈之後影下相就走人，不過入去最主要係要去廁所~~~

睇完呢個玫瑰山谷就差不多成四點，於是我哋就去埋呢個BOH Tea Center Sungei Palas嘆返個下午茶先再去酒店。個GPS又係無反應，都係用人肉GPS先得，去到佢有兩個地方可以泊車，一個就係下面，要行路上去嘅。另外一個就係個中心附近，不過就得好少位，呢個泊車位都係後來先發覺，泊車都係免費嘅。去呢個中心，發覺原來係食Tea個個地方係去到1630就會收工(不過過咗1630都重見都有人排隊買嘢食)，咁我哋就去買下嘢先啦~~~我哋每人都買咗唔少同茶有關嘅嘢，之後就係呢到影下相啦。然後，我哋又去咗沿路嘅一個茶園到影下相，咁就玩到差不多1730先去酒店，酒店同呢個查園有一段距離，不過應該係呢個15分鐘來到。但係因為中途會途經呢個Brinchang夜市，所以去到附近嘅地方就好塞車(開頭都唔知點解會塞車，後來經過個夜市就知道)，一過咗個夜市就快好多啦~~~

我哋去到酒店已經係六點幾啦，Check in 好之後放好晒D行李，然後我哋就食咗隻宴瓊林鹽焗雞，嘩~~都真係幾好食喎，不過我哋食個時都已經係凍咗，如果係熱食的話，應該會幾好味~~~

食完我哋就準備出去搵食，呢間酒店嘅呢一區附近都有個Tanah Rata鎮仔，都有唔小嘅餐廳係到，我哋就去咗呢個Tanah Rata鎮仔到搵食啦~~揀咗一輪，就去咗一間叫Rosette嘅餐廳，叫咗幾個餸食，味道都唔錯，不過份量就少咗D。食完嘢，我哋就係附近到行下睇下有無咩買同有無嘢食，有團友可能唔夠飽(其實我好飽)，重有附近D攤檔到買串燒食~~~

之後我哋就返去酒店到食埋之前買嘅芒果，真係好好食喎，又甜又香~~~食完就返房到休息啦~~~

Heritage Hotel Cameron Highlands	MYR$ 920.00
Geogre Town to Ipoh Highway	MYR$ 16.80
Parking @ Ipoh	MYR$ 1.00
食生果 @ 中途休息站	MYR$ 47.00
Lunch @ 老黃芽菜雞	MYR$ 116.00
宴瓊林鹽焗雞	MYR$ 17.00
金馬崙玫瑰谷	MYR$ 32.00
Dinner @ Rosette	MYR$ 122.50
	MYR$ 1,272.30