2013 馬來西亞榴槤忘返自駕之旅 Day 9 (9)

2013 馬來西亞自駕之旅 Day 9 29/12/2013

Heritage Hotel Cameron Highlands > KLCC 雙子塔> Kuala Lumpur Tower(吉隆坡塔) > Shopping@ Pavilion Mall > Lunch@小霸王@ Pavilion Mall > Kuala Lumpur International Airport > Hong Kong

今日我哋下午就要返香港，所以我哋只係得半日嘅時間去睇嘢，不過吉隆坡D人話無咩睇。朝早係酒店到食咗個簡單嘅早餐，我哋就出發喇。原先諗住放D行李係酒店到，走個時先返來攞，因為驚俾人偷嘢。不過最後都係決定攞埋D嘢一齊去。我哋第一個景點就係去呢個KLCC 雙子塔，架車去到附近停低影下相，不過近得濟形唔到，於是我哋就去咗KLCC 雙子塔嘅正面去睇啦喎，架車就泊咗係馬路邊，我哋見有好多車都係咁泊係到，於是就泊埋係到啦。

去完呢個KLCC 雙子塔，我哋就去呢個Kuala Lumpur Tower(吉隆坡塔)，入呢個Kuala Lumpur Tower(吉隆坡塔)係要俾停車場費嘅，呢一個塔我哋都係遠距離咁影下個外觀就算，不過最重要係入去用個廁所。

睇完Kuala Lumpur Tower(吉隆坡塔)，我哋就諗住去行商場，求其見到一個我哋就隊入去泊車，原來我哋去咗吉隆坡一個幾大嘅Shopping Mall叫Pavilion Mall。呢個商場真係好大，如果要慢慢行真係可以行一日。團友們發揮嘅佢哋嘅小宇宙，最後血併，行無耐就見到 SuperDry ，一入去就係到買咗好多嘢。之後因為無咩時間，所以都係快行，如果唔係應該重會有收穫嘅。本來我哋諗住去機場先食嘢，不過見重有時間就係呢個Mall到食嘢喇，係呢個Mall嘅底層有個Food Court，好大個有好多選擇~~~我哋最後揀咗一間台式食品店到食嘢，味道都唔錯添，原來個店主係Model來架~~~

食完嘢，我哋就要離開吉隆坡去機場還車啦，之前重要去入下油添。去到機場到要搵一陣先搵到個個還車嘅停車場，還車過程非常之快，個職員只係睇下有無油就攪掂~~

Check in 過程又非常之順利，入到去我哋途經呢個 Loccitane又有團友要買嘢。返到香港差不多2200喇，比原來時間遲咗半個鐘，因為無機位可以泊~~~

呢個馬來西亞自駕之旅，9日話咁快就過咗，馬來西亞我哋重有好多地方未去，都係一個可以考慮再去嘅地方~~~之前係網上面見到好多人話馬來西亞嘅治安唔係咁好，Touch Wood我哋無遇到，成個旅程都幾順利，洗費又好合理，買嘢又平，食嘢又平，真係幾正…

Parking @ Menara Kuala Lumpur	MYR$ 3.00
高速公路費	MYR$ 16.80
	MYR$ 1.50
	MYR$ 2.50
Parking @ Pavilion KL	MYR$ 9.00
入油	MYR$ 93.00
Lunch @ Pavilion	MYR$ 102.60
	MYR$ 228.40

		Summary of Daily Expense
	機票	HKD 34,144.00
	住宿費用	HKD 15,890.46
	入油費用	HKD 777.36
	租車費用	HKD 7,678.19
	食用費用	HKD 8,279.01
	入場費用	HKD 639.60

2013 馬來西亞榴槤忘返自駕之旅 Day 8 (8)

2013 馬來西亞自駕之旅 Day 8 28/12/2013

Heritage Hotel Cameron Highlands >Lata Iskandar瀑布>中途休息@ R&R Ulu Bernam – South Bound>黑風洞>皇家雪蘭莪錫器展覽館> U Pac Hotel>Dinner@阿羅街黃亞華小吃店> U Pac Hotel

好喇，今日就要返去呢個吉隆坡喇，不過第一件事當然係食返個美味嘅早餐先啦。食完嘢Hea一陣我哋大概九點半就出發返去吉隆坡喇，返去吉隆坡條路都幾多灣，所以其中一個團友係中途就要嘔嘢，攪到一車都係，好在路邊有一間士多可以借個廁所俾我哋用咋~~清理完之後，都攪咗成大半個鐘，我哋就去今日嘅第一個景點Lata Iskandar瀑布，呢一個景點又係可以求其泊車。呢個Lata Iskandar瀑布都幾靚，我哋係到影咗唔少相，重見到有好多小朋友係水入面玩得好開心添呀~~~影完相就走人，又見到又榴槤買喎，買一下個榴槤都係MRY$4，嘩~~咁抵，就買來試下喇，又幾好食喎~~~

食完，我哋就繼續向吉隆坡出發。我哋去吉隆坡第一個景點就係去呢個黑風洞，不過行咗個半鐘途經一個中途站就入去睇下有無嘢食啦，嘢食就有不過就唔多啱團友們嘅口味，我哋就係呢到飲返杯嘢先走人。

去到黑風洞都差不多成兩點鐘，呢到泊車就要俾錢嘅，但係個景點就唔洗俾錢喎。呢個黑風洞條樓梯睇落去都幾長，但係行起上來又唔係咁辛苦，不過係條樓梯到有好多馬騮係到搵食，成日係到跳來跳去，驚嘅人都會幾怕下。呢個黑風洞上到頂再行入去有一個廟，不過我哋去到個時好似無開到。係去呢個黑風洞嘅中途又有一個洞，呢個洞係一個鐘乳石洞，但係就要收費先至可以入去，個價錢都唔平喎~~要成MRY$35/person呀~~~所以我哋就無入去睇嘅。

睇完呢個景點，我哋就去咗一個叫皇家雪蘭莪錫器展覽館到參觀，有團友話之前跟團來都無來過呢個地方。呢個皇家雪蘭莪錫器展覽館其實主要係會介紹下呢一近公司係點樣成立，同埋佢哋D產品係點樣製成嘅，當然唔少得嘅就係有個地方買佢哋嘅產品架啦，不過都唔平，但係係香港買就唔知咩價錢喇~~~我哋都有團友買咗D嘢。好喇，之後就要去酒店啦，因為吉隆坡呢到D路同個GPS入面嘅資料有D出入，所以我哋都兜咗一陣路，大概1830先到酒店。去到酒店又要等一陣先攞到房，因為好多人係到Check in緊。放好咗D行李之後，我哋就出去搵食啦~~

吉隆坡當然係去呢個阿羅街到搵食喇，我哋兜到阿羅街附近咁啱有個街邊位係到，一泊架車又有D人行埋來，我哋就俾咗兩蚊雞佢。之後一行入去呢個阿羅街就見到有榴槤食喎，又有團友榴槤癮起，要食返個D24先得，不過又係無係檳城個到食到嘅咁好味~~~之後我哋行咗一陣就去咗黃亞華小吃店到搵食喇，坐低咗好耐都無人招呼我哋喎，最後周圍叫先搵到人。我哋叫咗一個湯、燒雞翼當然係唔少得架啦，重有燒魔鬼魚、炒菜、串燒、吉仔茶、唔知咩咩豆腐、炒粿條、炒聖子、魷魚炒菜、炒蜆、炒魷魚，重好食我覺得係個魔鬼魚，因為好滑，其餘嘅一般啦，最劣評如潮嘅就係呢個炒粿條，我又唔覺得難食喎。之後係條街到行咗一陣就返去酒店休息喇，不過又係要兜一陣間路先得。好囉，終於玩到尾聲囉，聽日就要返香港啦~~~就真話咁快就過咗咁多日~~~

U Pac Hotel	MYR$ 439.00
榴槤 @ Lata Iskinder	MYR$ 4.00
Drink @ 中途站	MYR$ 19.00
入油	MYR$ 50.00
高速公路	MYR$ 16.80
高速公路	MYR$ 2.00
黑風洞 Parking	MYR$ 2.00
阿羅街 Parking	MYR$ 2.00
榴槤 @ 阿羅街	MYR$ 22.00
Dinner @ 黃亞榮	MYR$ 322.80
磁石貼	MYR$ 15.00
	MYR$ 894.60