今次揸呢一架車真係幾大下，重要係揸左軚，所以真係要揸慢少少來適應一下 !! 一開始當然係要 Set 返我哋個目的地先啦，因為都差不多成一點鐘，係網上面搵過Ｄ資料如果由機場去我哋住宿嘅谷關要成三個鐘嘅車程，再加埋要慢行少少，所以我哋就要直接由機場去啦。因為第一次用呢個 GPS ，當然係要租車俾我哋個哥哥仔教一教點用啦。原來係可以手寫輸入個喎，又真係幾方便喎 !! 好啦，攪掂好Ｄ嘢就要係個停車場到出發喇，但係唔知點解放個銀仔入去係都出唔到，原來係過咗時間 !! 好~~一路行都幾好，無咩特別，行行下就見到有個收費亭，諗住俾$1000佢找下Ｄ碎錢，點知個個收費俾咗一疊代用卷我哋，有10張每張$40 ，而台灣嘅高速公路收費每次係$40。 架車都幾好揸 !! 就係呢Ｄ回數票證啦..... 揸咗大約個半鐘到就到咗豐原市，有團友話要去釋放一下一Ｄ水份，咁啱又見到有間 7 仔係路口，於是就試下睇下會唔會好似日本Ｄ便利店咁有廁所提供嘅呢 !! 原來都真係有個喎，大家就買下嘢放下嘢咁，我就係呢到買咗本旅遊書，因為當地買嘅旅遊書嘅資料係香港無嘅，重要有幾多嘅選擇下添呀 !! 係高速公路落來去谷關嘅路，睇下路邊幾多花 個GPS叫我左轉繼續行程 7-Eleven 呢本就係個本書喇....都幾好用啦 買完嘢就繼續我哋嘅行程，呢一段路係係山邊行，比較行得慢Ｄ，行行下見到有條吊橋，於是就落車去影下相啦~~原來呢條橋只可以同時間行得兩個人，但係我哋見到有成三個人啱啱行過，都唔知危唔危險嘅，所以我哋都係係橋邊到影下相咁，呢一條橋唔係叫做巴別橋，係叫做白鹿橋 !! 我哋其實係東勢鎮到架啦... 條橋都真係幾窄下 見唔見都我校面有人重係條橋到行緊呢 睇到個警告嗎 ? 只可以行兩個人咋....你哋信唔信呢 ? 呢架就真陪伴咗我哋五日嘅車啦... 條橋下面就係呢Ｄ成大堆碎石嘅河啦....會唔會係大雨嘅時候成條河都係水呢 ? 
2010/04/10
2010 台中自駕之旅 Day 1 (2)
2010/04/09
2010 台中自駕之旅 Day 1 (1)
2010 台中自駕之旅 Day 1
日期 : 2/4/2010
天氣 : 天陰 & 微雨
呢個台中之旅其實係舊年已經講咗好耐話要同屋企人去(我老婆屋企人)，但係咁啱我亞爸就係今年一月離開咗，忙住攪佢嘅身後事，要到二月先至得閒~~~好在嘅就係都重Book到機票，但係價錢就貴咗~~~
好喇，講返呢個台中之旅先，台灣我都去過幾次，今次都係第一次玩自駕，同埋台中我都未去過，所以今次五日嘅行程就去台中玩喇，之前Book機票嘅時候想係台中入台中走，但係Ｄ時間非常之唔係好得，所以最後都係揀咗係台北入台北走，一出機場就揸車去台中 !!
好喇，講返個台中之旅先 !! 2010年4月2日，呢一日係五日紅色假期嘅第一日，機場到亦都好多人 !! 平時食早餐會食 BurgerKing都多人到排晒長龍，真係未試過，如果係我哋自己去的話，基本上係唔會係呢Ｄ大旺日子出發呢 !! 雖然係好多人，但係都幾暢順，不過我外母就唔記得自己帶咗把刀仔係個袋到，攪到搜咗一段時間，之後就去食返個早餐~~~食完就去上機，行到去原來已經開始等機喇 !! 係上機嘅時候，突然話要Check個張買機票嘅信用卡，好在我有帶啫，如果唔係...(我都唔知會點)
嘩~~你睇下幾多人~~~
連食嘢都係排晒長龍，呢到都唔係好勁，係大家樂到重勁呀 !!
美味嘅早餐
出發啦....
上到飛機，基本上全滿咁濟，到食餐之前，無神神個空姐問我哋係咪要海鮮餐，我哋當然話係喇(呢個係因為我哋登記咗做佢哋嘅Member先有嘅服務)，到食嘅時候真係俾咗個海鮮餐我哋喎 !! 重要幾好食添呀 !!
嘻嘻...特別餐...
嘩~~有蝦同埋帶子架 !!
班機大約係10:35起飛，未到12點就到咗，但係呢唔知點解今次要行咁耐先到海關喎，唔知係唔係整緊Ｄ咩工程呢 ?? 係排隊辦理入境手續嘅時候，就收到租車公司嘅電話喇，話佢已經到咗，會攞住個牌寫咗我個名。一行出去就見到有個人攞住個牌寫咗我個名，然後佢就帶我哋去停車場到攞車啦，都係好似其他國家租車一樣，攞車前 Check 下架車嘅外表有無咩損毀，然後就Mark係張租單到，係網上面睇人講話通常都係無咩油，要自己去入油。但係今次我哋租呢架車就入滿油，當然係還車嘅時間就要入返滿佢喇 !! 今次我哋租咗架9人車，呢架車真係好大架，我哋放晒所有行李都重有位剩低，跟住就有人話總之帶個大喼來啦 !! 今次租車公司(艾維士租車公司)其實都搵咗幾間，但係得呢一間有呢架九人車租，其餘個Ｄ都係得八人車，不過其他嘅折扣優惠就多Ｄ，呢一間就少Ｄ !!
2010/03/27
2010/03/22
2010/03/21
2010/02/28
亞凡達
呢套電影真係幾好睇，早係舊年12月幾已經想睇，當然要睇下呢個 3D 版啦。但係原來Ｄ戲飛已經買到1月中先有，買嘅當然又係買俗稱"皇帝位"嘅M18中M19啦......
其實我好耐無入戲院睇戲，因為好多戲都唔係咁吸引。呢套戲其實係講述地球人因為要攞人哋嘅第二個星球嘅資源，而去破壞個個星球嘅環境，主角開頭係間諜，但係後來同呢個星球嘅人相處後愛上呢個星球同埋愛上咗女主角~~~就係咁係同呢個星球嘅人一齊對抗破壞環境嘅地球人啦....
故事骨幹簡單，但係就係簡單先好睇...
再講下呢個 3D 版，其實係一般嘅畫面上面分別不大，但係當有Ｄ飛行嘅物體係畫面中出現，就會好似去到面前咁~~~~~感覺好正
2010/01/30
父親...........
我父親嘅身後事已經完成咗三分二....係到要感謝返各位 Blog 友嘅慰問同幫忙 !!
原來突然間要辦理親人身後事真係會好多嘢要攪，慶幸家下有 Blog ，又可以係網上面搵下有關資料....我諗我攪埋我父親上位嘅嘢之後都要寫低Ｄ資料同人分享下，大家唔好覺得呢Ｄ係咩唔好嘅嘢，死亡並不是可怕嘅事，只係有相處咁耐嘅親人離開咗會感到悲傷。
重有呢Ｄ係人生必經嘅階段，到真係來臨嘅時間，唔知點做的話，真係好徬徨 !!
最後點都要再一次多謝各位 !!
2010/01/16
父親
我的父親於2010年1月12日下午二點十五分離開了......
我嘅心情比較平靜，因為唔係一齊住嘅關係，但偶爾都有點兒悲傷..
有好多嘢要做...朋友介紹搵咗一間殯儀服務公司，開頭都幾緊張咁幫手整有關文件，但係去到整死亡証個時已經覺得佢哋有Ｄ唔係幾交帶......重有佢哋有攪私人骨灰龕，位於屯門，但係一個好Ｄ嘅位置都幾貴，我亞媽睇到都覺得可以，但係我叫我亞媽睇多幾間先下決定.......(有無人有介紹呢 ?)
家下重有頭旬、回魂、設靈、火葬...........好多嘢攪.........
呢一間公司所講嘅頭七同回魂方法有別於一般係網上面搵到所講.....所以家下都要搵多Ｄ資料比較下先...(有咩要注意呢 ?)
2010/01/07
2010/01/03
2010 新的一年
踏入2010年，諗住繼續趁幾日假期寫下未寫完嘅長篇遊記(會唔會寫到下一次旅行都未寫完呢 ?).....點知屋企部陪伴咗我差不多成六年嘅電視突然唔撈自己攪掂，個一刻突然"拍拍"聲好似燒煙花咁~~~之後就有一陣味 !! 當然即刻熄晒所有電源啦...但係呢 !! 我都想試多次係咪真係 Certified....再整好晒Ｄ電，開掣又係"拍拍"之後就有一陣味.....即時就要真係 Certified....
又要去搵資料睇下買咩機，周圍睇下款...
家下開始出緊 LED 背光嘅 LCD iDTV (當然要有內置高清解碼啦~~~)，但係價錢都幾貴...睇咗有三叔同東芝，三叔有痕身咭就有折差不多成$18XXX...東芝就成$23XXX..其實都幾貴，睇睇下東芝重有部 CCFL (呢Ｄ LED 同 CCFL 都係講緊部機嘅背光系統， LED 聽聞睇出來嘅畫面就會靚Ｄ黑色嘅地方就會實Ｄ，而 CCFL 就係大部份現今嘅 LCD TV 用緊嘅背光系統.....)，價錢都幾好添 $14XXX....
但係呢...三叔個部真係幾靚仔，好簿..只係得2.99cm...(嘩~~好簿呀~~~)...放係屋企到就好似一件藝術品咁 !!
所以呢幾日就係到搵呢Ｄ資料同周圍格價.....星期一就會決定買邊一部啦...
2009/12/13
麵飽布甸
材料： (四位用)
鮮奶………………………………………………………………………………150g
糖…………………………………………………………………………………40g
淡忌廉……………………………………………………………………………150g
雲呢拿香油………………………………………………………………………少許
蛋…………………………………………………………………………………150g
麵飽………………………………………………………………………………適量
牛油………………………………………………………………………………適量
玉桂粉……………………………………………………………………………少許
提子乾……………………………………………………………………………少許
做法：
(1) 焗爐預熱180 度。麵飽切片放在杯內，塗牛油及放入少許玉桂粉，再放上
提子乾。
(2) 蛋、糖攪勻，加入淡忌廉和奶攪勻隔渣，倒入麵飽杯內至7-8 成滿。隔水
以200 度焗約40-45 分鐘。
呢到就係部份材料啦..
將糖同埋蛋一齊攪.....
再將鮮奶同淡忌廉倒埋落去蛋同糖嘅完成品到又再攪....
之後就將Ｄ上面整好個兜嘢倒落去預先放好咗麵包皮、牛油、玉桂粉同埋提子乾嘅兜兜到....記得要係個盤到倒返Ｄ水落去等個布丁唔洗咁乾
我呢幾個就焗咗23分鐘到....時間其實都要睇下你個兜兜有幾大而定
好嘢....完成 !!
2009/12/12
香蕉蛋糕
材料(4人份量):
砂糖： ６５ｇ
蛋一隻
麵粉：７５ｇ
有鹽牛油： ７０ｇ (要
自發粉： 半茶匙
香蕉： １５０ｇ（約一隻大Ｓｉｚｅ嘅。）
好啦，開工...
首先將隻蛋同埋Ｄ糖用電動打蛋機打到變咗白色
然後就將Ｄ麵粉同埋自發粉放埋入去一齊攪
攪呀...攪呀...攪到混合晒，然後再落Ｄ溶至水狀嘅牛油放埋落去攪...
然後就將Ｄ壓到變咗醬狀嘅香蕉放埋入去又攪....
攪完就將Ｄ攪好咗嘅嘢倒入去Ｄ紙兜到
然後放入一個預熱到 170度嘅焗爐入面焗20分鐘(焗嘅時間要睇下用Ｄ咩嘢裝，我用Ｄ細細個嘅紙兜就快Ｄ，如果用一個大嘅兜就要起碼35分鐘啦)
嘻嘻...完成 !! 成間屋到好香嘅呢...
