沖繩八天自駕之旅 - 第一天行程 25/5/2008

沖繩八天自駕之旅第一天行程 25/5/2008



香港 à 沖繩那霸 (Hong Kong Express直航) -à Naha Airport à Monorail(Yui-Rail) 去 東橫 Inn (新都心) à San-a Main Place Shopping Center à Dinner @ グルメ回転寿司市場(新都心店)

住宿 : 東橫 Inn (新都心)

今日搭12:25 機直航去沖繩，需時兩個鐘零五分鐘到達。今次都係係2號客運大樓到 Check-in，去到嘅時候有好多人排隊等緊 Check-in ，當中有幾團旅行團重係去沖繩添呀 ! Check-in 完就係2號客運大樓到行下，上次去埃及都行過，不過上次係夜晚，所以好多舖頭都收咗工無得睇，襯有時間我哋重行埋機場資料館 ! 見差不多時間，就諗住做出境手續，係2號客運大樓到見到有個牌指住有得出境就跟住行，原來真係有個海關係2號客運大樓到，咁我哋就辦手續出境諗住再行下Ｄ Duty Free 架嗎~~~點知一出就係去搭無人駕駛列車，一去就去到候機室…無得行添~~~不過應該係中間可以上到去 !

係候機室都幾多人等緊，班機原來都幾滿下。今次搭嘅係 HongKong Express 波音747機，係細機，所以打橫得個5-6個位，我哋係坐緊急逃生個排，不過就幾闊落。飛機起飛咗大約45分鐘到就派Lunch，諗住呢Ｄ細公司Ｄ飛機餐都無咩要求，點知又幾好味，同埋重有Haagen-Dazs 雪糕食添呀，正 !

飛機因為遲咗起飛，所以去到沖繩都成四點幾。沖繩那霸個國際機場相比起國內線比較細，同埋個海關都幾認真下，每個旅客量體溫都真係要講標準溫度，如果有少少唔同就會同你講，我就係量到 38。C，咁就同我講話高咗少少…但係又無咩要做喎…跟住就係過Check行李，個海關姐姐仔，問我哋係邊到來同埋係邊咁就出機場啦。係出去途中見到Ｄ小冊子就攞返Ｄ睇下，因為呢Ｄ小冊子會有Ｄ Coupon 同埋地圖，都幾有用下。之後就要去搭 Monorail (Yui-Rail)(車費 : 每人¥260) 去今晚住宿嘅哋方東橫Inn(新都心)，架Monorail都幾似台灣嘅捷運，搭咗大約20分鐘到就到咗新都心站，一出去就係 DFS Centre，聽日攞車嘅地方。係搭車去東橫Inn(新都心)同車都有兩Pairs香港人一Pair就係美榮站落，另外一Pair就係同我哋同一個站落 ! 搭架鍛埋站嘅時候見到一間東橫Inn諗住就係個間，點知行到埋去成間好似裝修緊咁樣，跟住就攞個地圖睇下，咁啱有個日本人行過，同我哋講咗一大輪日文，都唔知佢講咩，然後佢攞張地圖出來，原來佢都係去東橫Inn(新都心)住，話我哋知呢一間唔係要行多10分鐘先到 ! Ｄ日本人真係好人嘅呢…去到酒店Check-in show埋個 Member Card ，即刻就有30% Off 啦 !真係好 ! 放好晒Ｄ行李就出去行下同埋食晚餐，近近哋就行對面嘅San-a Main Place Shopping Center，入面其實得兩層，下面個層係Supermarket加幾間買衫嘅舖頭，二樓就係一個細Food Court加Ｄ百貨公司。係Supermarket買咗支水放返上酒店就行去搵嘢食。係網上面有人食過一間グルメ回転寿司市場(新都心店)迴轉壽司於是乎我哋就行去搵食喇，行去間迴轉壽司途中經過間沖繩縣立博物館，外型都幾特別，不過我哋無人去。又經過一個新都心公園，有好多人係到跑步同埋運動，日本人真係健康 ! 係就來到嘅時候又見到一間好大間嘅食店，不過係食放題大約120蚊港幣一個人到，不過我哋都係去食迴轉壽司。去到間迴轉壽司到，嘩~~~~有好多人係到等緊位啊，諗住坐係到等人叫，原來係要自己寫名等叫，等咗大約10分鐘就有位喇，真係快。Ｄ壽司都幾好味，食食下見到有人飲緊個湯好似幾好味就同個店員指下指下要個個湯喇，原來係三文魚湯都幾好味 ! 食完就行咗去RYUBO SOTRE天久店，附近重有無印良品同埋UNIQLO(Map)，重有買電器同埋一間好大嘅買體育用品嘅商店。係RYUBO SOTRE天久店入面嘅100¥店入面買咗兩罐奶茶，同埋係附近嘅一間商店買咗杯好似思樂冰嘅嘢飲，然後就去行下酒店附近嘅 Lawson同埋FamilyMart就返酒店休息準備聽日嘅行程啦 !