沖繩八天自駕之旅 - 第八天行程 1/6/2008

第八天行程 1/6/2008

東橫 Inn (新都心) à 旧海軍司令部壕 à 首里金城町の石畳 à 玉陵 à 安國襌寺 à 觀音寺 à 福州園 à Lunch @ グルメ回転寿司市場(新都心店) à 鳳梨園 à Naha Harbor Diner à DFS Galleria 還車 à Shuttle Bus to 那霸機場 à 香港







今日係係沖繩嘅最後一日，係東橫 Inn (新都心)食完早餐之後就出發去一個叫旧海軍司令部壕嘅地方。呢個景點又係要俾入場費，我哋又有呢個10% Coupon，又平咗Ｄ喇 ! 根據Ｄ資料記載，呢個旧海軍司令部壕係係1944（昭和19）年12月建成的的掩蔽部（壕），係當年日本海軍沖繩方面根據地部隊司令部嘅據點。係1945年6月13日中午1點左右美軍嘅進攻中，除日本海軍司令官大田實少將外，日軍守軍有4,000多名人士陣亡。整個旧海軍司令部壕長約450米，可以俾人參觀嘅就有當年嘅司令官室、作戰室、幕僚室、通信室、暗碼室、發電室等地下設施。目前只公開了其中的375米。去到嘅時候都有Ｄ學生係到參觀緊，佢哋重有個好似老師嘅人係到講解俾佢哋知Ｄ歷史事跡。係Ｄ通道入面重有Ｄ畫掛咗係到，Ｄ畫重畫咗當時係呢Ｄ隧道入面係訓滿晒Ｄ士兵架….重有Ｄ子彈嘅痕跡係Ｄ牆到添呀~~~睇完呢個之後我哋就去玉陵，但係又路過一間超級市場，於是乎就停車入去行下啦 ! 係入面都買咗Ｄ嘢，跟住就去睇呢個玉陵啦。點知呢個偉大嘅GPS唔知做咩搵唔到玉陵嘅位置，係到兜來兜去，咁啱經過呢個首里金城町の石畳，於是我哋就停埋架車係一面睇下呢個景點啦 ! 呢個首里金城町の石畳，金城町の石畳係係尚真王時代(公元1477-1526年)修建嘅，呢一條路係由首里城市內到郊外嘅重要道路。睇完呢條石畳我哋就繼續尋找呢個玉陵喇，睇住Ｄ路牌左轉轉右轉轉就搵到喇，原來都幾近首里城個喎 ! 由於我哋睇咗好多呢一類嘅遺跡，所以都係係門口附近都睇下影下相就算喇 ! 呢個玉陵係位於首里城西側規模宏大嘅石造建築物。係公元1501年，尚真王為咗改葬其父尚圓王而修建，成為咗第二座尚氏王統嘅陵墓。墓室分咗三部分，中室係安置洗骨前遺體嘅房間，東室就安放洗骨後嘅國王、王妃嘅遺骨，西室就安葬墓前庭院中玉陵碑記載嘅其它王室成員。二戰時曾經受到毀壞，但經過3年多嘅修復工程，基本恢復咗原貌。重係2000年12月登記成為世界文化遺產。根住我哋就係想去福州園嘅，但係又途經呢個安國襌寺同埋觀音寺，就順道入去參觀下喇，個安國襌寺其實就無咩睇，因為入到去嘅時候就閂晒Ｄ門，個觀音寺同係香港見到嘅廟宇一模一樣，其實我覺得沖繩Ｄ人係咪都係中國人來嘅呢 ? ! 去到福州園，緊係睇下洗唔洗要入場費先，因為先前好多係書到寫咗係免費，去到都要收入場費架 ! 問過門口個亞嬸係唔洗俾錢，泊好架車就入去睇下喇 ! 呢個福州園原為久米村，而久米村本是閩人在那霸的聚居地，為咗紀念這一段特殊的因緣，福建省福州市乃助琉球政府在久米村原址建立一座具有福州風味的庭園。福州園是為了紀念中國福州市與那霸市結為友好城市10周年而修建的中國式庭園，占地面積8,500平方米，1992（平成4）年建成。福州園的建設由福州市負責設計和技術指導，建築材料也使用福州當地的材料。園內摹仿福州名勝修建了樓台閣榭等建築物，在寬闊的綠地中池塘、瀑布、綠樹、雕刻點綴其間，呈現出典型的中國庭園的美麗景觀，其實都幾似係大陸到睇緊Ｄ建築物咁，睇完就搵地方食Lunch啦。因為想食Ｄ回轉壽司，所以就返去第一晚食個一間グルメ回転寿司市場(新都心店)，因為真係幾好味，同埋又唔洗周圍搵呀嗎 ! 今次去到都食咗幾多嘢，但係就唔洗好似第一晚咁要等位，一入到去就可以坐埋位攞嘢食喇，我哋 Total 食咗成十二蝶，都幾飽下 ! 食飽之後就去咗睇鳳梨園嘅門市，係呢到都有得菠蘿放題個喎~~~啱晒，食飽飯，整返Ｄ飯後生果先，我哋重係入面買咗Ｄ嘢添啊 ! 睇完呢一個就完成晒成個旅程，準備揸架車去還車，但係又途經一個叫Naha Harbor Diner嘅地方喎，我係網上面成日都見都有人係呢一個地方到影相，入面重有間餐廳架。係佢後面重有個租車中心添呀 ! 睇完就驅車返去DFS Galleria到還車，還車過程都非常順利，原來係呢個DFS Galleria消費都可以免費搭Monorail去返那霸機場架。因為Ｄ免費乘車卷要係第一日租車嘅地方到先換到，我哋就順便呢個DFS Galleria到行下，不過其實都無咩買，Ｄ LV、Gucci 價錢同香港差不多，無著數，所以無謂買。換完Monorail張車卷，其實到差不多成兩點半，要搭車去機場Check-in。咁啱又俾發現有Shuttle Bus 搭去機場喎，又係免費，緊係搭Shuttle Bus，唔洗攞住件行李四圍行呀嗎 ! 呢架車都係用咗15分鐘就去到機場喇，不過就只會係日本國內線個邊停車，其實我哋搭Monorail都係係國內線個邊架喇，所以都無所謂 ! 去到機場我哋就去咗Check-in 先，然後先去國內線個邊行下睇下有無嘢買。我哋都以為我哋好早到，原來都有好多人係到等緊Check-in，攪咗一輪之後就去國內線個邊行下喇。個邊都有幾多手信買，其實基本上同國際通買Ｄ嘢差不多 ! 都有得試食，不過來來去去都係得個幾款嘢試食。睇完晒就要離境啦，嘩~~~點先好多人係到排隊，原來日本真係好鬼死嚴，所以嘅液體都要用膠袋袋住，無嘅一係唔要，一係攞¥30出來買個袋 ! 又因為驗屍咁驗攪咗好鬼耐~~~~入到去個候機室都重有舖頭係入面俾你可以買下嘢，不過價錢就真係貴過出面 ! 呢一次又係坐緊急逃生門個位…都唔知點解又係呢個位置架 ! 係搭飛機返香港途中遇到Ｄ橫流，跟住後來係網上面睇到有人話今年Ｄ天氣會有好多橫流，所以大家搭飛機記得扣好安全帶喇 ! 返到香港大約六點半到，但係等件行李就等咗成半個鐘 ! 沖繩之旅就此完滿結束 !