2013 馬來西亞榴槤忘返自駕之旅 Day 3 (3)

今日係人日，祝大家生日快樂呀..

2013 馬來西亞自駕之旅 Day 3 23/12/2013

French Hotel >市政廳 City Hall >怡保火車站 Ipoh Railway Station (搵唔到位置，無去到) >高等法院 High Court House >聖邁可書院 St Micheal's Institution >印度清真寺 Masjid India Muslim Ipoh >極樂洞 Kek Look Tong > Lunch@新世界小吃 New World Park@ Georgetown > Hotel Sentral Georgetown >舊關仔角大樓 (維多利亞女王鐘樓) >田園餅家土產 > Shopping@Parkson > Dinner@New Lane Hawker Center Lorong Baru > Hotel Sentral Georgetown

今日我哋就會上去檳城到，係酒店到食早餐，呢間酒店嘅Café 都幾靚仔，所以影咗唔少相，重有就有兩款早餐可以揀。食完就上去 Hea 一陣就出發啦，不過離開怡保之前，我哋就去睇下附近嘅景點先走~~我哋去咗市政廳、怡保火車站(搵唔到位置，無去到) 、高等法院、聖邁可書院同埋印度清真寺。全部都可以泊車係嘅，呢D景點全部都係睇外觀多，所有我哋都係係外面影相，不過間聖邁可書院係唔入得去嘅，因為呢間真係一間書院來架。到去到呢個印度清真寺個時，見到佢鎖咗個門，我哋都係係外面影相，點知有個應該係呢間寺嘅人見到我哋就開門俾我哋入去參觀，但係入去就要除鞋兼洗腳先入得去，呢間寺入面都幾細，但係牆上面就畫滿咗D壁畫，都幾靚~~

之後就諗住離開去呢個檳城啦，咁見到個油站就順便入下油先，係馬來西亞入油，如果無油咭就要同佢哋講，唔係個支油槍係唔會有油出。係入油個時，忽然諗起重有一個景點極樂洞係未去嘅，咁還掂都係囉，咁入完油我哋又去啦~~

去到呢個極樂洞，又係有D地方管理員指D位俾你泊車，落車就俾一蚊雞佢哋啦。原來呢個極樂洞入面都幾大個喎，重要幾清涼下添。係個到重有一條梯係可以行上去呢個山頂嘅，不過我哋都係行咗一半都無行到上頂，因為費時行到成身大汗。好啦，呢一次真係要離開呢個怡保向檳城出發啦。

我哋大概11:30離開，差不多成兩點先到檳城，一入到去呢個檳城附近就好塞車喇。我哋來到檳城第一個景點就係去食啦，都成差不多三點先有得食，因為我哋去呢個新世界小吃 New World Park到開餐，第一次Miss咗個停車場入口就要兜返一個圈返來都幾嘥時間。

呢個新世界小吃 New World Park泊車係有一個停車場，收費都幾平，其實係馬來西亞泊車都真係幾平，所以見到停車場就泊車都唔洗點諗。至於食方面，呢一個新世界小吃 New World Park入面有好多一檔檔嘅食店，見到啱就去Order食物，之後佢就會問你係坐邊一張枱然後送過來。我哋都叫到一枱都係嘢食，不過D喇沙就唔係咁好食，好硬下，其餘嘅都OK嘅…

食飽咗我哋就去酒店到Check in 啦，點知個GPS又帶咗我哋行咗去唔知咩地方，好在遠距離見到間酒店，咁就要人肉GPS啦，不過都要兜咗兩個圈先搵到條路入去。呢間酒店有得免費泊車，但係因為我哋架車比較大架，所以就要泊係酒店對面嘅空地到，不過係呢個空地到就有一幅壁畫係到，我哋當然係要影下相啦。去到Check in 又話D房未攪掂喎，只得一間，咁我哋咪諗住將所有行李放入一間房到先，之後返酒店先攞返D行李上房。其實我哋都成四點鐘先到酒店，居然重未有房就真係麻麻哋，不過攪攪下又有房可以俾我哋喎。放好晒D行李之後，我哋就去睇嘢先，首先去呢個康華麗斯城堡 Fort Cornwalls，點知去到個時話無位泊車喎，之後我哋就係街邊到搵到個位，呀~~泊好咗車行到去呢，哦~~~閂咗門喎~~~原來5點鐘就閂門架啦~~咁我哋就係附近呢個舊關仔角大樓 (維多利亞女王鐘樓)到影下相啦。

影完相，見無咩睇，就去呢個田園餅家土產到買下手信先，個GPS又係帶唔到我哋去喎，咁就人肉GPS啦，我哋去到個時都已經係6點幾，原來又係閂咗門啦。不過入面就又人係到嘅，問問下佢哋就開門俾我哋入去買嘢啦~~~不過呢，可能係到咗閂門時間，無得試食嘅~~大家都買咗唔少嘢，之後就係去Shopping啦，我哋呢一團人有好強烈嘅購買慾，日日都要Shopping先安樂。我哋就去咗Paskson個Shopping Mall，呢個泊車又係無問題，不過就要留意有無D高度限制，好似我哋架車有好多商場到係啱啱好俾我哋入到去咋~~~呢個商場有D似早期嘅羅湖商業城咁，好似無咩買咁，不過最後我哋去到一個好似係百貨公司咁嘅地方到買嘢，都有收穫喎。買就諗住去新關仔角到食嘢，點知去到個邊又係到塞車，重要係無位泊車喎~~~我哋兜咗兩個圈之後到無位喎，開頭諗住周街泊，不過睇到有D人嘅車俾人鎖咗，重要有D俾人拖走，所以最後我哋就無係呢到食。最後去邊到食呢 ? 就係去咗我哋住個間酒店附近有條食街，我哋出去個時就係見到有條食街，所以今晚就去試下，因為近近哋又唔洗搵位泊車。

呢條食街叫做New Lane Hawker Center Lorong Baru，入面到幾多嘢食，重有就係一檔檔咁，不過我哋坐低食嘅又有另外一D大舖位嘅招呼我哋~~~我哋叫咗幾多嘢食，重叫咗幾次燒雞翼食，D燒雞翼又真係幾好食個喎~~又叫咗D吉仔茶飲，重有就係喇沙，好食過Lunch食個D~~食到飽飽就去咗附近嘅一間便利店到買咗D零食準備係車到食，之後就返去酒店休息~~

Hotel Sentral Georgetown	MYR$ 2,616.12
入油	MYR$ 90.00
霹靂洞 Parking	MYR$ 2.00
霹靂洞上山費	MYR$ 5.00
高速公路費 Ipoh to Penang	MYR$ 16.80
過橋費 George Bridge	MYR$ 7.00
Lunch @ New World Park	MYR$ 99.00
Parking @ New World Park	MYR$ 1.00
Parking	MYR$ 0.60
Parking @ Komtar Shopping Mall	MYR$ 2.40
Drink	MYR$ 6.05
手袋	MYR$ 50.00
零食	MYR$ 12.10
Dinner @ 酒店附近街邊檔	MYR$ 164.00
Tip	MYR$ 10.00
	MYR$ 3,082.07

2013 馬來西亞榴槤忘返自駕之旅 Day 2 (2)

2013 馬來西亞自駕之旅 Day 2 22/12/2013

Kuala Lumpur > Ipoh 怡保 > 凱利城堡 Kellie's Castle > Lunch@安記芽菜雞 > 三寶洞 & 南天洞 > French Hotel > Ipoh Parade >  French Hotel

今日就係我哋嘅旅程嘅第2日，其實今日先係開始，因為尋日都係搭飛機到咗之後就到酒店就休息。今次住呢一間酒店都叫做幾近機場，唔洗20分鐘就到。好~~第一件事就係食早餐，呢一間嘅早餐到唔錯，係Buffet型式嘅，我都係因為咁先Book呢一間。食完早餐，我哋就出發去怡保，由吉隆坡去要成兩個幾鐘，會行收費道路。

我大概哋9點半到出發，一路都係行高速公路，一上收費道路就攞咗一張咭，到出高速公路個時俾個收費亭就會話你知要收幾多錢，呢一程我哋要收MRY$30，都叫幾抵啦。係差不多12點，我哋到咗怡保，第一個景點就係去呢個凱利城堡 Kellie's Castle ，去到原來都係要收入場費嘅，不過泊車就唔洗俾錢嘅，見到地方就可以泊，咁一場來到當然係入去睇下啦。呢個古堡聽聞係夜晚都幾恐怖，話D管理員俾幾多錢都唔會入夜之後係呢到逗留~~~有咩會令到無人留係到你哋自己諗啦~~不過我哋日光日白入去就無咩好驚，重有呢個古堡可以通出去好多唔同嘅地方嘅，係有好多秘道，不過我哋無去搵喎。到係係個古堡到影下相行下去下廁所，就玩到12:30喇，咁呢個時間我哋就要去食Lunch~~

怡保最出名嘅就係芽菜同埋雞，我哋當然係唔會錯過啦。不過呢到有兩間都係幾出名嘅，今次我哋就去咗安記到食，去到其實佢哋出面就可以泊位，重有D人好熱心咁為你安排泊位，不過你就要俾返一兩蚊俾佢哋當係泊車費啦~~~我哋去到個時都重未係好多人，後來我哋走個時D人多到要座出去街個到。好喇，講返我哋叫咗D咩先，我哋叫咗一隻雞、一碟芽菜，重有就係豬肉丸~~~當然唔少得沙河粉同埋呢個吉仔水啦，我哋重叫咗一碟叉燒…隻雞真係好好食，我諗香港唔係有幾多個地方可以食到呢D咁滑嘅雞，重有D芽菜好粗身，但係又好好味…豬肉丸就不過不失，無話好出色，反而最失色嘅就係碟叉燒，同香港嘅無得比~~

食完嘢，我哋就繼續去睇嘢啦~~

不過我哋去之前就去咗附近嘅一間林真香到買咗D嘢食，呢間嘢都幾多嘢買，價錢都唔係貴~~~之後就去咗三寶洞同南天洞到睇嘢。呢個南天洞又係有得免費泊車嘅，上南天洞要行一條幾長嘅樓梯，都咪講笑~~~之後就會行到一D無燈嘅山洞到，好在家下D電話有燈嘅功能啫，如果唔係就真係黑麻麻就睇唔到路啦~~

睇完我哋就去酒店Check in ，今次住呢一間酒店係 Tripadvisor入面排名到幾高下，所以我哋住呢一日係Fully Booking嘅，好在我哋一早就訂咗房咋~~重要係有得免費泊車添，不過就要行幾十秒到。

放好咗D行李之後，我哋就去行商場~~~係~~~因為同行有人帶錯咗冬天衫來，所以要去買衫，本來想去呢個 Ipoh Parade 個Shopping Mall，但係個GPS唔知帶咗我哋行咩路，因為有部份嘅路封咗，所以行唔到，個Shopping Mall 又無寫住係咩名，不過我哋見到有個百盛 Parkson 就駛埋去泊車行下啦~~

呢個商場都幾大，我哋到走個時都係行咗一層咁多，因為行一兩間已經行咗成兩個鐘。基本上個個都有買到嘢，大家真係滿載而歸~~

之後就去食晚飯，原先諗住去遠D食，不過我哋買嘢買到好遲，所以都係返酒店附近到搵食。之前係酒店停車場附近有間酒樓都幾靚仔，諗住今晚係呢到開餐，點知去到有人包晒成個場擺酒~~~咁我哋就係附近個到睇下有無嘢食啦，有一間地道餐廳。因為費時搵，所以就揀呢一間，叫咗幾個餸，味道就一般~~價錢都唔係平~~不過食飽就算喇。之後行返過對面就係酒店啦，但係一出餐廳門口就落緊好大雨，好在有傘係到，好在係食完飯返酒店先落雨咋~~如果係去緊景點時落都幾無癮~~

講下間酒店，我哋住係其中一間無窗嘅房，其實都唔錯，美中不足就係有一棧燈唔知點解係熄唔到嘅，唯有用D嘢遮住佢，唔係就好難瞓覺囉…

French Hotel	MYR$ 544.40
高速公路費 KL to Ipoh	MYR$ 30.00
Kellie's Castle	MYR$ 56.00
Drink	MYR$ 6.00
Lunch @ 安記芽菜雞	MYR$ 100.00
Parking @ 安記芽菜雞	MYR$ 2.00
Tea @ 南香咖啡店	MYR$ 16.00
Parking @ Ipoh Parade	MYR$ 1.50
Dinner	MYR$ 164.00
零食	MYR$ 11.80
美味米	MYR$ 4.60
	MYR$ 936.30