2013 墾丁‧台南‧高雄自駕之旅 (2) Day 1 (23.3.2013)

Day 1 23.3.2013 星期六
香港 ® 高雄 ® 墾丁 ® 後璧湖魚市場 ® 伯利恆 ® 船帆石 ® 最南之端 ® 鵝鑾鼻 ® 砂島 ® 墾丁夜市 (墾丁大街) ® 伯利恆

去墾丁住(墾丁民住網)，其實有好多選擇，我哋呢次去可以話係墾丁嘅淡季(12月至3月)，如果無揸車，可以選擇係墾丁大街到住，不過你要忍受下熱鬧嘅夜市。

如果有揸車，選擇就會多好多 ! 不過如果要訂呢到D民宿，一般都係要 Deposit ，唔知係唔係多香港人去住，家下好多都提供方法俾人入錢 Deposit ，有 D 入銀行，有 D 就用 Paypal ，重有就係用 Visa 過數，不過如果有手續法的話就要自己俾喇。

今次我哋係住係船帆石附近嘅伯利恆，訂呢一間係因為佢哋係 booking.com 到又得訂，隨時可以改變行程。我哋去到伯利恆都1500喇，呢一到泊車係周圍泊都得，不過因為係個船帆石景點附近，所以基本上日間係會無咩位，要等一陣先有位。

我哋住3日兩夜，總數係 NT$5,400 包早餐，圍返大概係差不多成 HK$490/day 都唔係好平。但係其他嘅都係咁上下價錢到，有D近墾丁大街嘅重貴，不過都幾靚架。

Check in 完，就話我哋知我哋間房係邊，係入面個幢到，無得望海呢 !! 我哋住係最高個一層，好在行李唔係好重，如果唔係就大煲 !! 係到 Hae 咗一陣，我哋就出發去睇嘢啦 !!

第一個當然係睇個最近個個船帆石啦，呢一舊石真係要有D想像力先得，其實我覺得似個人頭多D ! 睇完我哋就驅車去最南之端到，呢個最南之端係要泊車係停車場。係台灣一般景點都唔洗俾錢，但係就要你泊係收費停車場到，呢一個停車場收費係 NT$50 ，但係我哋去到呢，中門大開 ! 係唔洗俾錢呢 !

之後就要行一段斜路落去(原來呢個位係可以揸車落去嘅)，然後再行 500 米。呢 500米行咗好耐都未到，最後唔知行咗幾耐就到咗呢個最南之端，呢到都有唔少人係到，咁我哋影下相就走人啦
! 行返出去又快好多喎，沿路有人行入來都問到未 ! 睇來行入去好多人都覺得好遠 !

睇完呢一個，我哋就去鵝鑾鼻公園到睇個燈塔。係最南之端個停車場一望就見到個燈塔，原來係要兜過去另外一個停車場先可以入去，另外一個停車場又係要俾停車場錢(都係NT$50啫)。但係，我哋就泊咗係出面條馬路到，無入到個停車場到。最後，又發現個停車場又係唔洗俾錢個喎，唔知點解嘅呢 ? 入去呢個鵝鑾鼻公園係要收入場費(@ NT$40)，入去我哋都係睇下個燈塔影下相咁，其實入面都重有好多嘢睇嘅，我諗要睇晒應該要2-3個鐘先睇完 !

伯利恆

我哋住最高個一層

入面D裝飾都幾靚

伯利恆外貌，呢一幢係第一幢，我哋住入面個一幢

伯利恆，呢一幢就係第二幢..

船帆石

我覺得似人頭多D

呢個排係寫500米，但係可能真係1,500米都唔定

鵝鑾鼻燈塔

2013 墾丁‧台南‧高雄自駕之旅 (1) Day 1 (23.3.2013)

2013 墾丁‧台南‧高雄自駕之旅

家下年年復活節都會去下旅遊，去咗幾次歐洲，呢個時期去到個D國家好似無咩睇，因為都重係春季，同埋搭長途機其實都幾辛苦…

查實想去日本，D日元有跌到落8.xx啦，都幾抵玩架。但係繼上次去完東北之後發生咗311之後就無去囉，話就話家下好似幾安全，但係其實係傳媒無報導出來啫，硬係覺得日本重係有D嘢咁囉…玩得唔安心就唔好去啦

左諗右諗，就去台灣啦，其實墾丁我都未去過 ! 咁就搵下機票 Plan 下行程，開頭睇D人講無咩玩睇，但係去完有唔係呀，其實都幾多嘢睇個喎。重有有好多嘢食(搵咗好多嘢食，但係好多都無試到)，又估唔到墾丁D魚生又幾好食喎 !!

今次去咗8日7夜，其實得個7日到，因為最後個一日朝早就返香港，無計啦，遲買機票，買唔到夜晚返嘅機位囉。

不過呢個墾丁‧台南‧高雄自駕之旅查實都幾 Hae ，但係又日日都玩到成夜晚9點先返去休息喎，好耐無試過旅行玩到咁夜先返去休息，因為先前去歐洲個D，6點鐘就無嘢睇，要返去休息架嗎 !!

好…唔講咁多，去片…

 

Day 1 23.3.2013 星期六

香港 ® 高雄 ® 墾丁 ® 後璧湖魚市場 ® 伯利恆 ® 船帆石 ® 最南之端 ® 鵝鑾鼻 ® 砂島 ® 墾丁夜市 (墾丁大街) ® 伯利恆

今日搭 0855 機，我哋 0730 去到機場，嘩…好多人呀，諗住好快就會攪掂喇，點知攪咗成45分鐘先寄好行李，我哋又重未食早餐喎，又未禁機攞錢，早餐又係勁多人，禁機有係勁多人。最後攪到我哋係 Last Call 先去到閘口上機。

呢一程機好快，一個鐘多D，好耐無搭過咁短機程嘅飛機啦，話咁快就去到高雄國際機場。我哋就約咗租車公司 11:15 先攞車，因為諗住會係機場到攞D資料同埋買張上網電話咭，同埋唔知要等幾耐行李，預鬆D時間好D嘅。攞行李過程非常順利同埋快，我哋10:30就攪掂，攞埋行李出咗閘。諗住去出張上網咭，先前搵過下資料係出境個一層有中華電信可以出咭，去到都有幾個香港人出緊咭，佢哋有幾款咭可以出，我哋就出咗7日上網咭，佢哋有7送1優惠，即係有8日用，誠惠 NT$450 ，計返都係百幾蚊港幣都幾抵 ! 佢哋重有 D 上網連通話嘅，都係貴少少，都幾抵用。

出完咭，就落返去出境個一層，睇下有無D旅遊資料，原來係無咩嘅，連地圖都無 ! 我哋見都差不多成 11:10 都未見到租車公司 D 人，於是就去機場個遊客服務中心，叫佢哋幫手打個電話去問一問間租車公司D人到咗未喇，打去間租車公司佢哋話就快到。果然 11:15 先到，一男一女去咗間便利店到搵我哋，因為我哋去咗買嘢飲。

佢哋來到又填一大輪嘢，其實基本上呢D嘢佢哋可以一早填定，唔洗來到先填 ! 填完一大輪嘢，就去攞車啦，今次我哋就係一間叫格上租車嘅租車公司到租車嘅，今次租咗 VW Golf 1.6 ，價錢係 NT$2,000/day，佢個原價係 NT$4,000/day ，其實好多間租車公司(和運、歐力士、小馬)都有租車優惠，通常都係信用咭嘅折扣優惠。

嘩 ! 可能近排去得歐洲多，覺得佢哋好似驗屍咁驗，因為歐洲就咁俾條車匙你自己去停車場攞車就得，有咩嘢佢哋已經係張租約到寫晒，同埋D小花痕基本上佢哋係唔理嘅。今次佢哋都驗得幾仔細，小小花痕都寫低，你咁認真我都要認真D Check 先得，小小花我都叫佢哋 Mark 低，無蝕低呀嗎 ! 前前後後攪咗半個鐘終於可以出車啦，首先當然係 Set 好個 GPS 位置先啦，今次租埋 GPS ，通常租車滿3日都係有免費 GPS 用，不過唔知係唔係呢架車係優惠價，所以都要收 NT$200 租金。呢架車其實到幾新淨，行咗萬幾公里，上車都重有D 新車味。

好 ! 終於出發啦，由高雄去墾丁要2個幾鐘頭車程，過程都幾順利。去到墾丁大概係13:30到，見到食 Lunch 時間，所以就去後璧湖個魚市場到食個 Lunch 先。呢個後璧湖呢個有個漁會大樓，入面有好多間食店，主打係食海鮮，重有美味嘅魚生食添呀。呢到最出名嘅係輝哥生魚片，唔知係唔係有報導過，特別多人排隊。但係其實佢又比起其他食店真係有好多魚生款式，難怪有好多人排隊。我見其實都有唔少香港人係到等緊，因為我哋覺得都幾遲下，就費時等，搵其中一間食就算啦。

來呢到泊車都幾方便，個大樓對出就有位泊，如果無嘅就咁泊係馬路出面就得，非常之好 !!

我哋叫咗個綜合生魚片，一個炒蜆、一個菜同埋一個蜆湯 ! D 生魚片都幾新鮮，好好食，其餘個D 都幾 OK 個喎。食完我哋就行下呢個大樓，其實呢到重有二樓，我哋都無去過睇。之後就行咗去另外一邊，主要係買食嘢嘅，睇完我哋就去住宿個到啦 !

要搭巴士出去上飛機

準備出發

簡單嘅飛機餐

個天好藍

話咁快就到咗高雄機場等攞行李中...

有緝毒狗狗巡邏中

呢架就係會陪伴我哋8日嘅戰車啦

去墾丁嘅途中...

墾丁第一站後璧湖漁貨生鮮市場

門口最多人個間就係輝哥，原先係二樓，家下搬咗落來..

我哋去咗另外一間

綜合生魚片~~~新鮮...好味

炒野菜

蜆湯

炒蜆

入面重有D小食店，又好多海鮮炸嘢食

我在墾丁天氣睛

唔知幾時開始復活節假期都會去下旅行，好似連續去咗幾次歐洲，今年就去下近Ｄ台灣~~就係高雄、墾丁同埋台南啦~~

2013 高雄‧墾丁‧台南自駕之旅

Day	Date	Place	Accomendation
1	23/3 (週六)	香港 > 高雄 > 墾丁	伯利恆希臘甜蜜兩人房
2	24/3 (週日)	墾丁	伯利恆希臘甜蜜兩人房
3	25/3 (週一)	墾丁	伯利恆希臘甜蜜兩人房
4	26/3 (週二)	墾丁 > 台南	三多商務旅店
5	27/3 (週三)	墾丁 > 台南	三多商務旅店
6	28/3 (週四)	高雄	三多商務旅店
7	29/3 (週五)	高雄 > 旗津	三多商務旅店
8	30/3 (週六)	高雄 > 香港

Planning......