2010/08/09

2009 日本東北之旅 Day 9


2009 日本東北自駕遊 Day 9

日期 : 1.11.2009  星期六


 總行程里數 : 140 公里 – 大約 4 小時 12 分鐘




檢視較大的地圖



今日係行程嘅第9日,因為天氣預報話會落雨同埋天氣唔係咁好,所以我哋就取消咗原先計劃去恐山同大間崎嘅行程喇,恐山其實係一個墳場,有日本三大靈場之一之稱號(下北本島觀光、下北半島觀光案內、青森県下北半島の総合案内所),有個比較出名嘅就係地獄谷,不過車程就真係幾遠下,大間崎其實就係日本本島嘅最北面,個到睇日落應該會幾正,同埋其實呢個下北半島都幾多嘢睇架,食海鮮當然又係一流啦....但係如果天氣唔好同埋會落雪的話就會好危險啦,加上淨係去呢兩個景點來回車程差不多成5~6個鐘,比較幾長下,雖然去唔到本州最北嘅地方,但係無所謂啦,同埋無謂係到遊車河呀嗎,重有可以下次先去都得架嗎 !!

好,今日第一個景點就係青森県八戸市にある八食センター(八戸市朝市)去睇下D海產同埋睇下有D咩食,順便係七厘村海鮮BBQ到燒下海鮮食呀嗎 !! 我哋唔夠九點鐘就去到呢個係八戶嘅八食品中心到啦,其實呢到有部份係街市重有食店、買零以重有D乾貨,都幾多嘢買。因為佢哋個營業時間係九點開始,所以我哋唯有係到等下啦,期間都有唔少人到咗係到等開門 ! 九點鐘準時開門,重有好多檔口都係準備緊開檔,入面真係有好多海鮮檔,買嘅嘢通常都係好大量咁買,重要其實都幾平下,所以其實呢到都係當地居民買嘢嘅地方呢~~~行下睇下,人面嘅食店數量其實都唔少,但係我哋呢段時間其實全部都係未開嘅~~~~

行下睇下就到咗10點到啦,於是我哋就買咗個1000円嘅海鮮併盤,裡面有2隻蠔、帶子同埋蝦,買完我哋當然係要去到七厘村海鮮BBQ租爐燒海鮮啦,係到租爐係要每人200円燒兩個鐘架。俾咗個爐幫我哋起咗個火之後我哋當然係要開餐啦,嘩~~~~D帶子同埋D蠔真係好好味,但係D蝦就比較差D,因為D蠔同埋帶子實在太好味嘅關係,所以我哋就再買咗兩隻蠔同埋兩隻帶子再食過,呢一次去咗第二檔到買,價錢又平D....真係好好食,食多幾round都重得,但係又唔想食咁飽呢。食完嘢之後我哋就係入面行多一陣,買咗D嘢就出發去另外一個景點啦。

下一個景點就係係附近嘅蕪島喇,呢到有個神社,我哋順道參觀下啦,重係入面買咗粒水晶添呀 !! 呢個蕪島有咩睇呢 ?? 其實係係有好多海鷗睇架,係佢哋繁殖嘅時期會成個蕪島都係海鷗,不過我哋呢段時間去就唔係有好多囉 !! 睇完我哋就去附近嘅葦毛崎展望台都睇下啦,去到嘅時候非常之大風同大雨,睇咗一陣間我哋就走人啦...

然後我哋就驅車去另外一個景點古牧温泉渋沢公園,呢個景點去都要成個幾鐘架,呢個時間其實要食Lunch,但係呢,我哋頭先食咗個美味嘅燒海鮮餐,家下都未肚餓,所以直接去呢個景點啦。去到呢個嘅時候個天都幾陰下同埋有霧霧雨落緊,我哋直接揸架車入去個公園到睇,呢個公園都幾靚,如果係天朗氣清嘅日子應該會幾靚,同埋來呢個景點係想搵個浸腳地方,但係除咗見到間溫泉酒店同埋個公園之外就見唔到個浸腳位啦~~~

睇完呢個我哋就去青森睇一個叫縄文時遊館,呢個係一個遺跡,係呢個地方有日本其中一個叫縄文嘅部族嘅遺跡嘅地方,又係個句喇,如果天氣好又係可以睇好耐嘅地方。因為我哋睇嘅時候落緊霧霧雨,所以要擔住把傘來睇,重要就幾凍下,所以我哋又係快快睇完就走人驅車去酒店休息啦。係去酒店嘅途中我哋都有睇下有無D咩食店,可以係今晚晚餐,但係都唔見有咩食店喎。

去到酒店附近但係又唔見有停車場喎,於是就係酒店後面嘅一條巷到泊低啦,去到Check-in又無印花喎,尋日儲夠三個印花就有1000円 Refund架嗎 !! 重有個停車場原來係係對面嘅多層停車場到,係Counter到有部機碌一碌就會有優惠,不過就出一次俾一次錢囉,絕對係唔適合我哋呢D成日都出出入入嘅人囉 !! 放好晒D行李之後就出去搵嘢食啦,但係架車又俾人阻住咗喎,要攪咗好耐先駛到架車。係我哋來嘅時候留意到有個地方有一個Mos Burger,因為附近真係無咩嘢食(有得食嘅都閂咗門,真係奇怪),所以我哋就去呢一間都食我哋嘅Dinner啦...去到個個Mos Burger個地方,重有其他嘅食店,我哋睇咗一陣最後都係食Mos Burger。食完之後係附近行咗一陣就返酒店休息,架車仔就泊咗係個指定停車場到,之後返酒店,呢一間酒店係無得浸溫泉架,今日重要洗衫添啊....

八食品中心




入面有好多海鮮嘢食買架....




價錢重要係幾抵添喎...睇下成大盤帶子都係1500円咋




D生果都好平架




青森蘋果..青森蘋果...




呢個檔主好攪鬼,幫佢影相時扮鬼臉...




排隊買爐




美味海鮮...




帶子同蠔都好好食...好有鮮味






蕪島神社





葦毛崎展望台





古牧温泉渋沢公園




入面D景色都幾靚下架...




縄文時遊館


Mos Burger 晚餐




2010/08/07

2009 日本東北之旅 Day 8


                    2009 日本東北自駕遊 Day 8
日期 : 31.10.2009  星期五

行程 : スーパーホテル盛岡 >宮古浄土ヶ浜 > Lunch@蛇の目本店 >潮吹穴>北山崎(其他) > スーパーホテル八戸天然温泉 > Dinner@八戸の横丁文化

 總行程里數 : 258 公里 – 大約 7 小時 30 分鐘




檢視較大的地圖



今日車程比較幾長下,食完個美味嘅早餐之後我哋就出發去宮古嘅浄土ヶ浜,由酒店出發預計要成十二點幾先到,我哋沿路去呢個浄土ヶ浜都見都有好多紅紅黃黃嘅葉,真係幾靚~~中間重去咗一個道之駅添呀,入面有雪姑七友同埋有個收穫祭,我哋當然係要順便參觀一下啦.....但係最後我哋係10點半就到咗浄土ヶ浜,之後我哋係浄土ヶ浜到行咗成個幾鐘,個到有個好大嘅石灘,D水重要好清添架,清到唔似係海水咁,重有好多海鷗係到添呀 !! 呢到嘅風景都幾靚,不過我哋去呢個時間唔知係唔係唔係旺季所以唔係好多人係到,重有就係都幾大風下。

睇完呢個浄土ヶ浜,我哋就搵個地方食返個Lunch先,如果我哋最下一個景點就要成個幾兩個鐘先到,於是就去食下本書仔入面介紹嘅一間叫蛇の目本店,呢間蛇の目本店出名就係食北三陸海鮮飯。揸車去到搵唔到免費嘅泊車位,呢一間飯店有指定嘅泊車地方應該係佢哋到食完返泊車有優惠都唔定,但係我哋去都個時個停車場係無晒位,所以我哋唯有泊去附近D收費停車場啦。我哋入到去其實都幾多人下,下面個層差不多座滿晒人,於是佢哋就安排我哋去二樓到啦~~~我哋來呢間到當然係要叫返個北三陸海鮮飯食先啦,重有就係叫咗個磯井定食。個三陸海鮮飯D魚生真係多到挾極都有,而個磯井定食其實係將個三陸海鮮飯入面D魚生整熟,但味道真係唔會俾個北三陸差,不過呢一餐都幾貴,但係都幾抵食,順便慶祝下生日呀嗎~~~

食完呢個好好味嘅Lunch之後,我哋就去下附近嘅一個景點先,呢個景點叫做潮吹穴,個名都幾咸濕~~但係我哋開頭都兜咗幾耐下先搵到呢個景點架,因為我哋Miss咗轉一個灣個GPS又唔係好得喎,不過最後我哋都搵到 !! 去呢個潮吹穴要行一段路先到,去到個潮吹穴個時我哋都唔知到咗,因為無明顯嘅記號。好在行到去個時有個牌介紹下咋,但係係我哋停留期間就見唔到好似水柱咁嘅海水噴出來囉,淨係見到有D水花係到飄飄下咋,後來上網睇返D資料原來要睇呢個水柱係要等水脹嘅時間先睇到,但係其實附近D環境都幾靚下架 !!

睇完呢個我哋就要繼續北上去一個叫北山崎嘅景點啦,呢個景點要揸成幾個鐘先到,沿途D景色都無咩特別,最後我哋成四點幾先到咗呢個景點,個天都開始黑啦。於是我哋就快快腳去睇下呢個景點有咩睇先,呢個景點都係D大自然風景,不過就好大風囉 ! 係呢個景點睇日落應該會好正,但係呢日比較多雲同埋大風,我哋行咗兩個點就走人啦,因為真係頂唔緊呢~~如果今日係天朗氣清,風和日麗的話,今日呢幾日景點真係有排睇呀~~~呢個北山崎重有兩、三間民宿係到添喎,不過住係到又無咩做~~不過可能夏天會正D啦... 

離開北山崎去到八戶嘅SuperHotel(スーパーホテル八戸天然温泉)都成六點半,我哋當係直接去酒店啦,呢到個停車場又係唔洗俾錢就有得泊I like it...Check-in完安頓好晒D嘢之後我哋就步行去附近睇下有咩食喇。因為個Lunch都食得幾飽下,所以晚餐時都唔係好肚餓,就諗食返餐簡單晚餐,呢個八戶市都幾鄉下下,好多店舖六點鐘到就休息,最後我哋行到去一個叫八戶台村橫丁嘅地方,行咗一round,入面有好多店舖都係無開門,重要呢到係無咩人氣添呀~~~唔通未到時間開門 ?? 最後入咗一間拉麵店食咗個叉燒拉麵~~~食完行咗一陣就返酒店浸下溫泉先休息。

其實今日重想去一個叫龍泉洞嘅地方,不過呢個龍泉洞其實係一個鐘乳石洞,我哋都去過唔少,同埋呢個景點個路程到幾遠下,所以最後我哋都係無去架...


 
去呢個浄土ヶ浜途經景點都幾靚




浄土ヶ浜




D水真係好清架




如果係藍天就正啦




美味嘅午餐 ---- 就係呢個北二陸海鮮飯啦....好好食架...諗起都流口水




呢個叫磯井定食,其實係北三陸海鮮飯煮熟咗嘅版本,但係都好好食架...




D帶子幾大隻






去潮吹穴嘅地方




都幾郊外下喎...




成大篇日文,我唔識佢喎...不過中間有D漢字到估到D意思嘅




呢個就係潮吹穴啦




睇唔睇到有D水花升上來呢 ??? 當預啱水脹嘅時候,出來嘅就唔係水花,而係水柱啦....




北山崎~~呢到睇日落好正個喎...




不過我哋去個日就好多雲睇唔到日落啦..




八戶台村橫丁




簡單嘅叉燒拉麵但係都幾好食喎...