2013 馬來西亞榴槤忘返自駕之旅 序

2013 馬來西亞自駕之旅 序

今次馬來西亞之旅，一行8個人，重要係聖誕節去，其實我好少係聖誕節去旅行。因為呢D日子去旅行，機票同埋住宿都會比平時貴好多，不過因為今次同行嘅人要係呢D日子先去得多，所以就係呢個日子去喇。其實如果可以早一日出發的話，機票可以平差不多一半，但係只有一半人可以早一日出發。咁又唔想分開兩班人去，所以就揀咗同一日出發啦。

機票

原先係買馬來西亞航空公司嘅機票，買完之後就變咗係國泰，其實去吉隆坡重有 Airasia ，不過時間就無咁好，同埋計返又唔係平好多喎，所以就買馬航~~

Book車

呢一次我哋有8個人，要Book架大車，嘩~~原來Book大都幾難搵，要大車重要係自動波，我都搵咗一排先搵到。重有就係我哋個到達時間都係一個大關鍵，有好多租車公司1900後就休息，得個一兩間係營業到2200~~而我哋就係2000先到，攪得來我諗都要2100。其實家下諗返，我哋係可以住係機場間酒店，然後第二日先租車，咁就方便好多~~今次租車費用係大概HK$7,200，即係HK$900/day，8個人都叫做抵~~今次我哋會去吉隆坡、怡保、喬治城、金馬崙高原。全程自駕，今次架車都幾好揸，係Hyundai Grand Starex 2.5 Diesel，不過架車就周身都係傷痕，成個 Trip 入咗4次油，玩咗成9日，行咗1245km，油錢都係HK$780咋。

住宿

都係全部經Booking.com訂嘅，價錢叫做可以啦，好在我早Book酒店，有好多比較熱門嘅酒店係12月頭都已經係Fully Booked…酒店價錢由HK$260~630，全部都係包早餐，今次嘅住宿都唔錯，最大間係係金馬崙高原個一間，其餘都係標準嘅酒店房。

Wifi方面，間間係繁忙時間都好慢~~有D直情係Connect唔到，要係D晨早嘅時間先叫做好D。

上網咭(電話咭)

之前係網上面搵過D資料，大致都係 Digi 或者係 Hotlink (Max)有 Prepaid Sim Card。我哋一出機場就買咗上網咭(Digi)，不過原來呢個唔係好得…早知一半用 Digi，一半用 hotlink 啦…

食

食方面真係無得頂，日日都食到好飽，我哋重要食咗4日榴槤~~係檳城附近嘅榴槤真係平靚正…好懷念怡保嘅芽菜雞同鹽焗雞呀燒雞翼…但係最後無試到係吉隆坡嘅肉骨茶…

天氣

真係正…我哋去咁多日，得一日食完晚餐落雨，其餘嘅日子都係陽光普照~~

購物

重有馬來西亞買衫褲真係好平，簡直就係一個天堂~~

治安
呢一個呢，我係搵資料個時發現有好多人同埋討論區都話馬來西亞嘅治安近年變得好差，周街有人會搶嘢，連當地嘅人都係咁講，所以都非常擔心~~~At the end...真係好好...我哋無遇過任何嘅搶嘢事件~~

如果有機會，可以再去檳城玩….