2009 日本東北之旅 Day 7

                   2009 日本東北自駕遊 Day 7
日期 : 30.10.2009  星期四
行程 : スーパーホテル盛岡 >小岩井農場 > Lunch@松尾八幡平物産館あすぴーて >八幡平国立公園>十和田八幡平国立公園 > 後生掛自然研究路> 大沼自然研究路 > 盛岡駅FESAN內遊 > Dinner@磯よし > スーパーホテル盛岡住宿 : スーパーホテル盛岡
 總行程里數 : 114 公里 – 大約 2 小時 57 分鐘

檢視較大的地圖

今日個行程比較輕鬆，只係去小岩井農場同埋十和田八幡平国立公園，我哋食完個美味嘅早餐之後我哋就上去房到Hea下上下網打下機咁啦~~~

其實呢一間SuperHotel嘅早餐都幾好食，真係幾好 !! hea完我哋就出發啦，係搭Lift嘅時候我哋重遇到兩Pair香港人，佢哋可能係第一次住呢間SuperHotel，重係到商量食完早餐先退房定係落到去就退房，於是乎我就搭嘴呢間SuperHotel係唔洗做退房呢個程序啦 !!

我哋去到小岩井農場大約係九點幾，但係已經有Ｄ旅行團到咗啦，呢到又係有免費泊車嘅，重要幾多位下，不過我諗係高峰期應該會有幾多人來，因為個停車場都幾大下 !! 雖然見到有Ｄ旅行團係到但係都唔係有好多人係入面，可能係今日個天氣唔係咁好啦，入咗場我哋就周圍行喇，去到有個地方有Ｄ羊咩係到，附近重有個天文館，我哋就入咗去睇下嘢啦。

呢到應該有觀星嘅活動會舉辦，因為都有幾多有關嘅資料，重有一支好長嘅望遠鏡係到，真係好長架，我諗可能會有成5m長到啦。睇完呢個天文館我哋就出去喇，見到有人係到用Ｄ草係到餵Ｄ羊咩，我哋當然係有樣學樣啦，順便影下相啦。原來個Pair餵緊羊嘅人都係香港人來個喎，呢一個都係香港人嘅熱點呀~~~我哋係Ｄ草地到摘Ｄ草餵Ｄ羊，佢哋會跟住你手上面Ｄ草行來行去到幾得意，但係佢呼會用口搶你手上面嘅草個喎，一個唔留神就會落咗去佢哋個口到架啦~~~

其實個農場入面Ｄ樹好多都開始枯緊，如果係紅葉盛況嘅時候，我諗呢到應該會幾靚 !! 之後行行下我哋就去咗揸牛奶嘅地方，咁啱我哋就遇到呢日朝早最後一場揸牛奶，如果唔係就無得試啦，因為下一場要去到下午先有呀(呢到邊有可能玩到下午呀~~~)。係我哋之前有幾個日本妹係到玩，玩到嘻嘻哈哈咁，都我哋試之前就要消毒一雙手，然後個職員就會教你點揸，開頭都唔知點揸，揸咗幾下都無嘢出，之後揸揸下先知要點揸先會揸得出牛奶。揸牛奶嘅感覺都幾特別，但係我哋揸完隻牛牛又望住我哋喎~~

之後我哋就周圍行下影下相，個天都開始有黑雲，到我哋走嘅時候重落埋雨添呀 !! 臨走前當然要試下佢哋嘅牛奶雪糕先啦，牛奶味都幾重下同埋都幾滑~

之後我哋就去十和田八幡平国立公園睇樹海，去到搵咗一陣到未搵到，見到有個好似資料中心嘅地方，我哋就去睇睇，入面重有個松尾八幡平物産館あすぴーて可以食埋Lunch添，於是我哋就係入面食埋個Lunch先啦...今次我哋叫咗一個拉麵一個親子丼，食完之後就去個資料中心到睇下有咩資料可以攞，係.......無嘅 !!

之後我哋就驅車去十和田八幡平国立公園喇，其實沿路Ｄ樹好多都係枯晒，一片好淒涼嘅感覺咁，無晒嘢睇~~~去到近山頂嘅位置就好大霧啦，能見度我諗得10m到架咋，所以我哋架車行得好慢。去到大沼嘅時候，四周圍嘅樹同埋草都係枯晒，重要幾大風下添呀~~~所以我哋影完相就咋咋淋走人揸車返盛岡。

大沼

返去盛岡見時間尚早我哋就去睇下一間盛岡銀行嘅景點，呢間銀行嘅建築有Ｄ外國嘅色彩，非常特別，但係附近就無地方俾你泊車個喎，於是我哋就搵個路邊停低快快咁影下相，影完相我哋就返酒店到休息下先再出去食 Dinner 啦~~~

就酒店hea咗一陣我哋就做步兵去附近個盛岡JR車站到行下街同埋睇下有Ｄ咩食啦。個JR駅入面有個FESAN商場都幾多嘢買同埋有嘢食，入面重有個鄉土館都幾多盛岡嘅特產嘢買，譬如冷麵同埋Ｄ盛岡脆餅，我哋係個到都試咗唔少嘢食但係就咩都無買到囉。睇完呢Ｄ我哋就去搵食啦，入面其實都有幾多選擇，我哋最後就係呢到B2嘅到磯よし食咗我哋嘅Dinner啦..我哋叫咗個蠔鍋同埋海膽帶子飯，味道都幾好呀 (都唔知係唔係真嘅，餐餐都話好味，但係又真係幾好味喎...)。食完我哋再係個商場到行多一陣就返酒店到休息啦...返到酒店，我哋重係浸下溫泉添~~~正呀....

鄉土館

海膽帶子飯

蠔鍋