2009 日本東北之旅 Day 6

 2009 日本東北自駕遊 Day 6
日期 : 29.10.2009  星期三

行程 : スーパーホテルCity仙台(SuperHotel仙台) >松島 >瑞巌寺 > Lunch@（有）独まん‎ >厳美渓>  猊鼻渓 > Dinner@ぴょんぴょん舎 稲荷町本店 > スーパーホテル盛岡

住宿 : スーパーホテル盛岡

 總行程里數 : 242 公里 – 大約 5 小時 33 分鐘



檢視較大的地圖



好喇 !! 又係要晨咁早就起身，因為我哋要係有日光嘅時間去睇晒Ｄ戶外景點。不過係出發之前我哋就要去食個早餐先，今次呢一間仙台City Hotel嘅早餐真係我住咁多間最豐富個一間來，Ｄ款式好多選擇，用呢個價錢住同埋有得食真係非常自抵呀~~~食完早餐我哋就上房到休息一陣就，就出發，但係之前我哋要去搵個間 LV 係邊到，原來尋晚我哋都已經經過過，但係就無留意到，唔緊要我哋會再返仙台嘅 !! 今日嘅行程第一個景點就係松島喇，松島呢個名真係聽咗好耐，重要係係昔日好多去日本旅行團要去嘅景點。

驅車去松島其實大約半個鐘就到，我哋一路入去就一路停車影相，其實好快就知道到咗松島未，因為一到咗，真係好似個名咁，你會見到有好多有松嘅島~~~去到呢到，當然係要搵返Ｄ唔洗俾錢嘅停車場啦。係未正式入松島嘅中心，我哋都停咗一兩個免費位置，但係呢Ｄ免費位遲咗就會無架啦，重要係遠離咗個中心地方架 !!

我哋一路睇就一路揸車向中心點出發，但係去到中心位就要泊係Ｄ收費停車場，兜咗幾個圈到無免費停車場，咁唯有泊係Ｄ收費停車場到啦。我哋停咗車周圍行，重見到有兩團香港嘅旅行團係到添呀，原來松島家下都重係一個熱門嘅景點來嘅 !! 睇完松島唔知幾多個景(唔記得七定八景喇)，我哋就順便睇埋呢個瑞巌寺個啦~~不過又係要收費，所以我哋無入去睇，點解會唔入呢 ?! 因為其實日本Ｄ寺廟好多都係差不多，入過一兩間就唔洗特登入去睇，因為入場費其實都唔平架。



見到差不多12點，我哋就決定係呢到食埋個Lunch先去下一個景點，先前搵過下Ｄ資料話松島呢到食石卷蠔，重有Ｄ地方係有放題添，不過最後都無去食放題，因為都驚驚Ｄ，雖然係日本啫，同埋路程都幾遠下，要行相反方向，唔係好順路，所以到係等下一次先食。於是，我哋就係附近睇咗幾間，最後揀咗一間有得食下蠔又有得食下牛舌嘅試下，味道都唔錯，但係份量就少Ｄ同埋牛舌就無尋晚食個Ｄ咁好味啦~~~



食完我哋就驅車去一個叫厳美渓嘅地方，呢個地方係Ｄ旅遊書到介紹睇紅葉都幾靚個喎~~呢個搵位泊車都幾容易，因為近Ｄ郊外地方 !! 但係我哋去到嘅時候，個到Ｄ紅葉其實都差不多無晒咁濟，但係睇落去都重可以嘅，重有就係見到有Ｄ日本人旅行團都來呢個地方，即係應該係幾靚架。

之後我哋去一個叫猊鼻渓嘅地方繼續睇紅葉，咁我哋就順便入埋酒店個地步入去個 GPS 到啦，點知又 Show 唔到酒店個位置喎~~咁唯有就全部再入多一次啦，呀~~~又正常返喎 !! 講返個猊鼻渓先睇Ｄ書仔介紹呢到會有人划船載你係條溪到睇呢到成個峽谷到睇紅葉，重會唱埋歌仔添喎 !! 但係呢個節目Not Our Cup Of Tea 囉，重有就係呢到Ｄ紅葉都係差不多無晒咁濟，好在架車啱啱就泊咗係條溪隔離，行兩步就到，影完相我哋就要去酒店，個GPS話要成三個鐘先到，雖然最後唔洗三個鐘，但係都用咗兩個幾鐘先到酒店呀，因為途中有好多慢車同埋有好多路段到塞車呀，日本一到咗黃昏時間，好多地方都會塞車架~~~

今次酒店Check in又無禮物攞喎，平時有好多禮物攞架嗎，雖然只係得女性先有，但係就唔知點解無囉 !! 重有就係間房係吸煙房，所以好大陣煙味，點解唔Book無煙房，應該係無晒Ｄ無煙房所以先會Book，下一次老死都唔會Book呢Ｄ 吸煙房，真係好難頂!! 之後我哋係去咗本書推介嘅一間餐廳到食Dinner喇。我哋係盛岡當然要叫埋個盛岡冷麵食下啦，重叫咗個燒肉套餐，真係有個爐放咗Ｄ炭俾你去燒Ｄ肉來食架~~~個冷麵到幾好食，有Ｄ似韓國嘅冷麵，而個燒肉就好一般。

之後我哋就返酒店休息同埋要洗衫啦，呢到個乾衣機都幾勁，可以將Ｄ衫褲乾到成八、九成咁乾~~~攪掂就上下網，然後就瞓囉...



松島

瑞巌寺

Lunch@（有）独まん

Ｄ蠔都幾好食架...

厳美渓

猊鼻渓

Dinner@ぴょんぴょん舎 稲荷町本店

2009 日本東北之旅 Day 5

  2009 日本東北自駕遊 Day 5

 日期 : 28.10.2009  星期二

 行程 : スーパーホテル山形駅西口 (SuperHotel山形駅西口) >霞城公園 >山形県郷土館(旧県庁舎 & 旧県会議事堂) >銀山温泉 >鳴子峡 (另外資料)>  Lunch@鳴子峡 > 仙台 > 青葉城址 > スーパーホテルCity仙台(SuperHotel仙台)>仙台市中心遊覽 > Dinner@牛たん 一福    

 住宿 : スーパーホテルCity仙台 (SuperHotel仙台)

 總行程里數 : 188 公里 – 大約 4 小時 42 分鐘



檢視較大的地圖

今日已經係去到行程嘅第五日喇，因為見到天氣預報話11月頭Ｄ天氣會唔係幾好，所以我哋就要同太陽伯伯玩遊戲，追住太陽伯伯，即係要係日出(7點幾)玩到日落(下午5點到，係..無錯係5點，個天就會開始黑，未到6點黑晒，真係要講句，即刻黑又得，立即黑又得，得咗...)。係酒店食完個美味嘅早餐之後，我哋就要爭取時間(點解去旅行都要咁早起身架??)，出發去附近嘅一個景點霞城公園，揸車去都幾近，不過個GPS又係帶咗我哋唔知去邊，呢個公園其實都幾大，開頭我哋就係搵錯咗，其實我哋去呢個公園都係想搵個浸腳嘅足浴咋，不過最後都係搵唔到囉，都唔知係邊到添~~~可惜 !! 我哋係個公園入面兜來兜去，行行下見到有個叫山形県郷土館，於是就落車去睇下啦...點知未開門，咁我哋當然要同佢影返張相留下念啦。

之後見架車都就快無油(其實應該重有三份一到，不過就費時用到咁盡，一陣行行下無油，又無地方入咪大煲，所以都係入咗先)。入完油，我哋就驅車去山形縣嘅舊市政廳參觀下，呢個舊市政廳個外觀都幾華麗，好有大英帝國嘅建築色彩，當然係到我哋都影咗唔少嘅相啦。

好，跟住我哋就去銀山温泉到睇下啦，睇Ｄ書介紹呢到Ｄ建築物好古色古香，Ｄ建築物襯托住後面個山嘅紅葉真係好有味道，如果係龍友一定會係到影好耐先捨得走人。我哋揸車去呢個景點嘅時候，行Ｄ路開頭都唔覺去緊呢個地方，係差不多到先知到咗，但係呢個地方就無咩地方俾人泊車，有泊車嘅地方都係Ｄ旅館嘅，所以我哋都搵咗一排先搵到一個角落頭泊低架戰車咋 !! 我哋係入面Ｄ大街都行下參觀下，行行下見到有個浸腳嘅地方，但係見到佢不停咁冒煙出來，我再搵手試下，嘩~~好熱，應該係浸唔到腳，所以最後我哋都無浸到 !! 重有就我睇有Ｄ人夜晚Book咗住係呢到Ｄ溫泉酒店，夜晚影呢條溫泉街個種Feel好鬼正。呢個景點其實都有唔少嘅旅行團會去，因為係我哋係入面睇嘢期間，都見到唔少嘅香港旅行係到出現。

之後我哋就去今日嘅重點景點鳴子峡，雖然睇個地圖好似唔係好遠咁，但係我都要成個幾鐘嘅車程先去到架!!去呢個鳴子峡嘅沿點景色都好靚，我哋當然係會見到靚嘅就會落車影下相啦，呢Ｄ就係自駕遊嘅好處喇 !! 去到鳴子峡嘅時間，成十二點幾，近主要景點嘅停車場好多都已經無晒位，於是我哋就要泊遠Ｄ，好在我哋早少少到，如果唔係就要越泊越遠啦。呢個鳴子峡嘅中心位置有個大停車場，個都有一Ｄ臨時攤檔食店同埋有間餐廳，廁所呢Ｄ設備都有，呢到好似一Ｄ嘉年華會咁，非常之熱鬧。我哋泊好車，就行返去食嘢個邊食返個Lunch先。途經有一條橋好多人企咗係到唔知等咩，Set好晒相機唔知想影Ｄ咩嘢，開頭我哋都唔知佢哋想影咩嘢，後來先知原來佢哋係到等Ｄ火車由隧道出來經過再入返隧道個一刻嘅畫面，嘩~~~唔怪之得Set好晒嘢等影啦。我哋就無理咁多，當然係食咗嘢先算啦，其實都有幾多嘢食，真係花多眼亂，但係就無咩位置食嘢囉，因為實在係好多人呀~~~~食完嘢就返車到食埋個蘋果先開始睇呢個鳴子峡。我哋係到周圍影下相，其實呢到可以圍個圈行睇下入面嘅山色，不過要行晒起碼都要成三、四個鐘先可以攪掂，所以我哋就係外圍到睇下同埋影下相，睇完一個就揸車去另外一個位睇。呢到Ｄ紅葉嘅數目其實都幾多，但係如果係正啱啱開嘅時候來睇呢，應該會重靚，成個山都係紅紅橙橙咁~~~~之後我哋去到一個另外一個位睇葉，諗住泊係一一間買嘢嘅商店個停車場到，我哋開頭泊咗係到落車準備走人去睇嘢，有個日本亞姐見我哋無行入去到佢哋個間舖頭。就走出來講咗一大輪日文，都唔知佢講咩(日本人就係咁，唔理妳識唔識聽總之就講完先算~~)，最後我哋當然係搵個第二個位泊啦~~~其實如果時間多的話，呢到真係可以睇一日都得架...

睇完呢個景點，我哋就要揸車去仙台，由鳴子峡去仙台要成三個鐘，沿途都幾塞車下添呀。去到仙台，本來我哋諗住睇一個叫青葉城址，但係去到我哋要搵咗個地方泊車先可以，個時個天已經黑晒，所以最後我哋都係無去到呢個青葉城址入面參觀到。之後我哋就去酒店(スーパーホテルCity仙台 (SuperHotel仙台) 喇，由於呢間酒店係位處於呢個市中心，個停車場無得自出自入，所以我哋泊低咗架車就要做步兵喇，不過係呢類市中心就絕對唔適宜揸車，因為係好難搵到免費嘅位泊，所以其實步兵都無咩所謂 !! 我哋泊好架車就攞房啦，呢間房其實都幾細，會唔會係因為呢個係市中心嘅關係呢，我諗都應該係啦~~~攞完房我哋就要去搵食喇~~

來到仙台當然係要食牛舌啦，睇Ｄ書都介紹咗幾間，咁我哋當然要去搵咗先啦。我哋係附近搵，見到有一間叫牛たん 一福 有幾多人係到等食喎，咁我哋當然係試下呢一間啦，唔好食點會有人等先~~不過係食之前我哋就係附近嘅地方都行下先喇，但係原來有好多舖頭都閂咗門，好多舖頭都係6點到就收工，尤其係Ｄ大百貨公司，所以我哋行行下都無咩睇。重有仙台有條通都幾長下，要行晒都要成個鐘先得....

我哋見行到差不多就去返頭先個間牛たん 一福 到搵食喇，呢間食店有牛舌套餐，Ｄ牛舌有Ｄ係燒嘅，有Ｄ係滷嘅，係仙台當然係食燒架喇，個餐有個湯、有燒牛舌同埋一個飯，個湯係牛尾湯來架，Ｄ牛舌食落去都唔覺得係食緊牛，好好味同埋好 juicy ，配合埋Ｄ日本飯真係Very Good喇....呢一間食店重要有唔少嘅日本藝人幫襯過添呀 !!

食完嘢我哋就去行下街喇再行多一陣就返酒店休息啦.....





霞城公園

旧県庁舎 & 旧県会議事堂

銀山温泉

鳴子峡

仙台

牛たん 一福 牛舌套餐

2009 日本東北自駕遊 Day 4

2009 日本東北自駕遊 Day 4

日期 : 27.10.2009  星期一

行程 : 東横イン 会津若松駅前 > 松岬公園(松が岬公園) > 上杉神社 > 小野川溫泉(浸腳) >蔵王 搭吊車(蔵王山麓駅<>（麓）樹氷高原駅<>地蔵山頂駅) > Lunch@地藏山頂駅 > 鴫の谷地沼 > 山寺 (另外資料) > 山寺芭蕉記念館 > Dinner@MilkyWay(ミルキーウェイ山形城南町店‎) > スーパーホテル山形駅西口  

住宿 : スーパーホテル山形駅西口 (SuperHotel山形駅西口)

總行程里數 : 77.4公里 – 大約 2 小時 36 分鐘







檢視較大的地圖



今日起身見到個天都係烏雲密佈咁，想落雨 ，但係有少少太陽，好過前個幾日，正!! 唔理咁多喇，起身執返晒Ｄ眼耳口鼻之後就去食早餐。東橫Inn嘅早餐真係無得同 SuperHotel比，簡單但係可以食飽你，食早餐期間發現有一Pair香港人都係住係呢一間酒店到，我哋食完早餐就上房到Hea一陣先出發。

今日我哋第一個景點就係松岬公園(松が岬公園)，個GPS又係唔知帶咗我哋去邊到，後來要再入多一次先得 !! 去到呢個松岬公園(松が岬公園)時非常之大風，但係就有太陽，影相出來都幾靚，睇下嘢影下相我哋就入咗個上杉神社到參觀下添。

Ｄ葉又紅又黃又綠咁都幾靚

呢Ｄ算唔算叫做海天一色呢 ?

睇完第一個景點，我哋就去小野川溫泉浸下腳先，係日本有好多呢Ｄ係街邊嘅溫泉俾人浸下腳架，都唔錯。

日本都有幾多呢Ｄ浸腳地方個喎 !! 得閒係到浸腳吹水都幾正

係途中我哋重去咗一間便利店都買咗杯奶茶飲添呀，去到個足浴到咁啱有人係到浸緊腳，我哋就坐埋一邊喇。開頭浸嘅時候覺得呢個溫泉嘅溫度唔係好高，只係可以講係暖囉，原來係我哋遠離開咗個出水口所以就比較無咁熱喇。浸完我哋就驅車去蔵王 搭吊車上山睇風景，去到都無人係到，重以為係無開到添 !! 買完飛，啱啱好有一班車可以搭，得我哋兩個人咋，包車 !! 我哋搭到去樹氷高原駅個時好大霧，真係咩到睇唔到，本來上行去黑姬到都唔得，唯有再搭吊車上地蔵山頂到睇下啦。搭到上去個天氣情況重加惡劣，於是我哋就食咗午餐先，好在呢個有一間餐廳咋，其實當時都幾凍架，我哋要重所有嘅預寒嘅裝備攞晒出來著係身先出到去架。一路食，一路睇住出面嘅天氣，食食下天氣好咗喎，重有Ｄ太陽添。講返呢間餐廳先，我哋叫咗兩個唔同味嘅拉麵，味道都唔錯，唔知係唔係我哋凍得濟所以覺得好食呢 !? 食完我哋就 Full Gear 行出去，雖然係無咁大霧但係都重係好大風，我哋行出去試探下先。原來行去個地蔵王到都唔係好遠，如果好天可以行遠好多睇到好多風景架 !! 睇完我哋就搭吊車落返去樹氷高原駅，落到去個時Ｄ霧無晒囉，我哋當然係周圍行下影下相啦，行埋去黑姬到。呢個地方一定係滑雪場，因為我哋睇到一大塊草地成條滑雪道咁，好正 !! 重有就係有好多吊車仔係用來載Ｄ人上最高點然後滑返落去嘅 !! 周圍行睇下都無咩紅葉，因為好多都枯咗，變黃咗，之後我哋係個草地到影相都幾正，影影下又好大風，Ｄ風可以將成個人都吹住唔會跌，睇完影完我哋就落返山麓駅，係停車場見到有好多旅行團一車車咁車Ｄ人來。

其實我哋到嘅時間呢到都幾大霧架....

再遠Ｄ都望唔到呢..

我後面其實係好大風架...好似打緊8號風球咁架

唔知係唔係凍得濟呢，呢碗麵都幾好食架...

坐坐下重落埋雨添

幾大風都好地藏王都係穩如泰山

呢到落雪後一片雪地係滑雪嘅熱點

大風到可以將我成個人吹住唔會跌倒

好多地方Ｄ葉都枯黃晒

係我哋搭吊車落去山麓駅個時候見到一個湖到幾靚，於是我哋就去搵下啦。去到見到原來呢個湖係叫做鴫の谷地沼，襯埋對面山上面Ｄ紅葉，影出來好靚呀 !! 呢到重有人係到放狗添呀，睇返資料原來呢到附近有Ｄ水芭蕉架，不過我哋就睇唔到，我哋係呢到都影咗唔少相。

呢到真係幾靚

睇完我哋就向山寺出發喇，去到本來想停係Ｄ收費停車場，但係原來個停車場離個入口有好遠距離，於是我哋就揸入Ｄ睇下有無其他停車場啦，揸揸下俾我哋發現咗一個免費嘅停車位，泊好車，我哋就行去山寺到睇嘢啦。山寺呢個山其實係有好多間寺廟入面，入去睇要俾入場費架，重有就係要行樓梯上去，都行唔少個喎，去到嘅時候都有唔少嘅遊客係到。我哋係呢個山寺到影咗唔少嘅相，係呢到重見到有好多香港人添呀，重要就見到我哋今朝係東橫Inn見到個Pair人添呀，真係有緣。

呢到真係有好多寺，真係成個山都係....

行完呢個山寺，我哋就去對面嘅山寺芭蕉記念館，去到睇個時發覺原來係要俾錢睇嘅，我哋就無入到去睇啦。係附近Ｄ地方行下睇下同影下相，之後就要向酒店出發喇。

係去酒店途中我哋去咗一間超市到買咗Ｄ嘢，我哋今晚住個間酒店有得免費泊車，真係唔錯，入去酒店到Check-in，然後放好Ｄ嘢我哋就出去搵食啦。搵咗好耐到搵唔到，有Ｄ又無地方泊車，好在我哋係去酒店途中見到有一間食店Milky Way(ミルキーウェイ山形城南町店‎)，於是我哋就去試下喇。呢間係食西式扒類嘅餐廳來架，我哋叫咗個漢堡扒同埋雞扒，個漢堡扒好食過個雞扒，食完之後就返酒店休息啦。

呢一餐簡簡單單但係又幾好食喎...(點解餐餐都話好食架???)