2009 日本東北自駕遊(2) 24.10.2009好喇，繼續我哋嘅行程先 ! 咁究竟點樣先開到架車呢 ? 我就不停咁係到按住個"Power"，心諗唔通有機關嘅，要連按幾下先得 ? 試過又唔係喎，型仔車都係瞓咗無醒過喎，點好呢 ? 最多咪去叫返個職員出來整返醒佢囉，亞團友又按下個到按下，都係無反應...正當我哋束手就擒嘅時間，我踩咗個 Brake 一下，我見到個個 "Power" 掣著咗盞橙燈，咦 ! 唔通要踩住來叫醒佢...於是我就按一下個 "Power" 掣...哈哈哈哈...型仔車真係醒返啦 !! 原來個機關就係個 Brake 腳掣，迷底終於都被我解破 (講到自己好勁咁，其實開頭咪又係唔知點算好 !
)好嘢 !! 終於都可以出發喇..正式展開我哋呢個悠長假期啦...我哋今日要由成田機場揸車去栃木県小山市嘅 SuperHotel入住，預計要行大約三個鐘車到喇 ! 其實三個鐘都幾耐下架，係不停喎 ! 我哋差不多成三點先出發，重要我哋係唔會行"有料道路(即係收費道路)"，係行一般道路，因為我覺得行一般道路會多Ｄ嘢睇 !! 重有好多選擇，譬如"推獎(應該係指推薦)、距離優先、時間優先....睇下呢一個就係我哋今日嘅行程喇..成田機場揸車(Point A) -> 栃木県小山市SuperHotel (需時大約三個鐘，距離 : 110 km)(Point E)不過行一般道路都有個唔好處就係會塞車，因為有好多車都會行呢Ｄ道路，同埋速度會比較慢一Ｄ，重有個 GPS 會唔知點解會帶你行埋Ｄ鬼鼠路個喎，明明直行就得..呀 (呢個係之後發覺，因為有Ｄ路行熟咗，見到應該可以直行但佢係到要你行小路)! 佢又無神神要你行另外一條個喎，真係俾佢激死 !!一路揸架車一路熟習下個操作，因為感覺完全唔同嘅呢 !! 揸揸下見到有間 "Jusco" 喎，都揸咗一段時間，大家都要去方便方便一下架嗎~~~所以就入去行返個卷先啦 !! 重有就係要買返Ｄ零食(團友強烈要求)同埋水。JUSCO 係日本真係周圍都會見到，真係好似香港嘅百X同惠X咁...嘻嘻...見唔見都我哋架型仔車呀...入面都幾多嘢買架 !! 啱啱到咗日本第一日，見到Ｄ價錢計返香港錢，嘩~~吓~~其實好多嘢都唔係好平個喎 !!見到係食嘢個到有Ｄ熟食同埋魚生壽司食，本來想買Ｄ壽司過下口癮，但係又驚食得太飽，一陣晚餐食唔落呢 !!呢一個煎餃子都幾好味...(Point B) 店舖資料:イオン成田ＳＣ ジャスコイオン成田店 地址 : 千葉県成田市ウイング土屋２４イオンモール成田 Tel. : 0476-23-8300
買咗Ｄ好味嘅餃子當然就要就地正法咗佢喇，食完我哋又再次踏上征途喇...一路揸都無咩特別嘢 ! 見行咗個幾鐘，又係時間去停一停抖一抖喇 ! 見到有間便利店，就揸埋去借個方便啦 (係日本好多便利店都有廁所，所以基本上係唔驚無廁所，因為梗有一間係附近 !!)
揸揸下重要落雨添呀~~~
呢間就係我哋方便嘅地方啦..見唔見到有隻貓貓係到望住入面呢 ? 唔知入面係咪有老鼠呢 ?
我行埋去佢就成隻坐咗係到...
唔知貓貓有無人養嘅呢 ?
係便利店入面方便完我哋重買咗Ｄ嘢食添呀(咪又係團友最鍾意嘅零食囉...) !!
店舖資料(Point C)
ファミリーマート つくば上横場店
地址 : 茨城県つくば市上横場２１７２−１４
Tel. : 029-839-5336
小休咗後就繼續行程喇，嘩~~~其實個天個時已經黑晒咁 ! 咦 !都未夠六點個喎，係無錯，日本真係好快天黑...就差不多到今晚嘅落腳點嘅時候就開始有塞車出現，行行下見到有間迴轉壽司喎，都差不多七點喇 (其實都係香港嘅差不多六點啫)，又見有Ｄ肚餓，好就揸入去停低架車食晚餐喇(呢一間連鎖迴轉壽司真係好抵食，我哋後來係唔同地區都有幫襯過，讚!!)。嘩吓..入到去同侍應棟起兩隻手指，然後我諗佢叫我哋隨便坐，我哋就求其坐個位啦...呢Ｄ迴轉壽司好處就係自己鍾意食咩就攞咩來食，最攪鬼嘅就係可以係電腦到落Order，然後用運輸帶運俾我哋...就係呢一間迴轉壽司(個名係最下面個一間)喇...我哋叫佢做青蛙壽司...就快有嘢食喇... 迴轉壽司，見到咩就攞咩食..唔洗客氣嘅呢嘩~~飛魚子壽司三文魚子壽司...唔知點解會加Ｄ薄荷葉落去，不過呢個配搭都唔錯(嘻嘻...扮下食評家先)呢個係蘿蔔牛肉麵豉湯海膽壽司 (開頭諗住試下算，因為都係105yen一碟，應該唔會有無質素可言啦，點知就真幾好食架 !!)三文魚加洋蔥(呢個組合幾攪鬼，但係真係要講句 Mix & Match，出來嘅味道真係幾特別個喎)帶子壽司(呢個簡直就係我哋主力喇，食咗三大碟呀 ! 香港點有可能用105yen (~HK$9)食到一碟帶子壽司呀，重要好鮮甜個喎!!)火燄燒三文魚腩壽司(嘩~~呢個又係好好味~~~真係唔知點算，碟碟都話好味，食得幾多呀，救命呀~~~)呢個唔記得叫咩名堂~~~三文魚腩壽司(又係好食都不得了~~~)呢個就係自助叫嘢食嘅落單電腦啦，見到咩想食就揀來食啦..之後就會用呢個運輸器運到你面前架啦..三文魚子壽司...(好食到唔停得口!)最後我哋食咗13碟壽司，好滿足咁離開呢一間食店 !!店舖資料(Point D)かっぱ寿司下館店地址： 茨城県筑西市玉戸１００５−１５
Tel. : 0296-26-6855
好啦，食飽飽就去酒店啦..個GPS顯示應該會係一個鐘頭之內到，揸揸下又見到幾間店舖嘅商店喎，我哋又走咗入去睇啦。重去埋 UNIQLO睇下，因為家下個匯價比較高，所以係日本嘅UNIQLO買嘢係"唔抵"嘅 !!
上返車繼續向酒店出發，但係去到個目的地居然就見唔到間酒店喎 !! 咁唯有再入多次喇，一入就出現咗間 SuperHotel 個名啦，重要都幾近下，揸咗一陣就到咗啦 !!
去到大堂就Check-in啦，我就忘住填嘢，團友就忙住揀嘢，因為每個女性都可以揀Ｄ Mask、洗頭水連護髮素、Eye Mask....好多女性嘅用品，係免費送嘅，每人限攞五件 !! 點解男嘅就無咗....
Check-in完就上房啦，同上次係沖繩住個間一樣。呢間 SuperHotel重有溫泉浸架，不過我哋無去浸，因為佢就分時段，男女各用一段時間~~~
呢間房其實可以瞓三個人架...
我哋沖完涼，睇咗一陣電視就瞓啦...因為聽日嘅車程都唔短 !! 講返睇電視，我哋一去到就報導有個"疑容者"殺咗一個英國嘅女子，然後就整容避開警方嘅追查，事件都發生咗成年架喇，呢一個新聞陪住我哋成個東北之旅，日日都有講呢個人Ｄ嘢。
酒店資料(Point E)
地址： 栃木県 小山市城山町3-16-10 Tel. : 0285-24-9000
講返下架車先，架車揸揸下都幾好揸，性能都幾良好，可以好似中國太空人咁講一句 : 感覺良好 !!
