~活在當夏~

我哋走既時候重搭早一班車走o左添呀，所以去到機場就早o左好多，機場入面又係有好多試食，食到我哋兩個好飽咁上機，好在我哋早o左到機場，如果唔係Check-in機位就有排等喇，因為我哋入去候機室既時候見到一大條長龍係個Counter到排晒大隊~~~~入面個候機室唔係好大，又有好多人，尤其係d台灣客~~~佢地真係~~~返到香港到成夜晚八點鐘到，不過唔知係咪我哋早Check-in，件行李放得好入呢，等件行李都等o左成粒鐘。總算都完成o左呢個十二天日本之旅既遊記，都歷時成兩個幾月，真係要Dik起心肝先至可以完成呀~~~~

Ben HA

08.11.2005 (星期二) 陰--->雨天

第十一天:

札幌市內遊

住宿: 東橫Inn北口

行程簡介:

今日係札幌市內遊，主要既地方就係行百貨公司購物，不過朝早本來想去試下係 Sapporo Factory 啤酒廠既一個無料啤酒見學，點知去到一丁友都無，等左一段時間見唔對路就決定行街街算數 !

返到香港搵返d資料原來係另外一邊個個Shopping Mall到。跟住我哋就展開o左Shopping之旅，成日都買o左唔少既野，可以話係滿載而歸同埋大出血呀。

午餐就係 Sapporo-ESTA既地庫食品街到食，條食品街都真係有好多間食店，真係花多眼亂呀。最後我哋一間叫The丼既食店食o左d定食午餐，價錢適中味道都唔錯，呢條食街都係搵食之選，重見到有間Fancl-House添呀，入面既Product大部份到係平過香港有成半有多，本來見到其他野，譬如花茶包同埋其他野都想買，不過因為個行理o急無咩位，所以都係放棄o左。所以我哋都買o左少少野，之後就繼續我哋既血戰之旅。跟住行到去大丸札幌店既地庫個一層既Food Plaza，又係有好多野食，係免費既試食喎，d蛋糕半件半件咁試，食到我哋兩個飽晒。係因為係到試食食到飽晒，攪到我哋原本諗住係今晚去食既蝦蟹大戰既蟹放題都擱置o左，因為食到好飽，如果去食放題戰鬥力就會大減同埋會覺得好唔抵架嗎，所以今晚既晚餐就變o左Food Plaza美食大集會喇!

Ben HA

07.11.2005 (星期一) 睛--->陰

第十天:自駕旅遊

札幌 --> 二世谷積丹小樽海岸國定公園 (地圖)--> 小樽 --> 札幌

住宿: 東橫Inn北口

行程簡介:

今日係自駕旅遊嘅最後一日，為o左爭取時間，我哋都幾早起身下! 係酒店食完個早餐就出發去我哋今日嘅地方積丹半島海岸公園，

呢個地方係我係一本講北海道駕車旅遊嘅小冊子都搵到嘅。返到香港搵返d資料先知原來呢個積丹半島海岸公園都有好多野外嘅嘢玩個喎，重有露天風呂添呀，不過我去嘅時候有唔多覺喎。基本上我哋都係行o左呢個積丹半島海岸公園一半路途到，夏天嘅時候應該會多嘢玩多d，不過我哋個日去嘅風景都好鬼死正。揸住駕車一路行一路睇住呢個原岸嘅風景真係非常正斗呢。基本上我哋都唔知個達地方叫咩名，睇住時間見到有路就行。原來我哋都去o左幾個景點架，有島武意海岸(地圖)、美國漁港(黃金岬)(地圖)同埋積丹岬，然後兜o左個圈返返去小樽。途中經過幾個地方都好靚，非常之有漁港嘅感覺，重有好多海鷗添呀，一行埋去就飛走架啦，完成o左呢個海岸之旅之後就返去小樽到食午餐。我哋去o左位於小樽嘅一個 Wing Bay Outlet 嘅地方行，又係一個好鬼死大嘅地方，重有摩天輪玩添呀，不過我哋去到嘅時候就維修緊。隔離重有間Otaru Hiton Hotel添呀，不過我哋無行過去個邊睇過，睇返資料入面有d食店都好似幾好味咁，有機會可以去試下。唔知係咪平日既關係，個 Shopping Mall 都唔係好多人行，店舖都唔係有好多間喎，反而個 Supermarket 就好鬼死大個。係入面搵o左一間係拉麵橫丁既橫麵店一人叫o左一個午餐定食，

味道就一般啦，無咩驚喜。之後就行o左一陣就驅車去另外一個景點，係位於札幌附近既羊之丘瞭望台，去到既時間都差不多係五點鐘，天色都開始變黑，重有少少雨添，頂~~~又係要俾入場費個喎，重要成JPY$500大元入場費添，所以我哋又係係門口到到此一遊算吧! 之後就要返去還車，不過途經有個地方又係個d有幾間商舖圍埋一齊既地方，入面又有一間UNIQLO，嘩，真係好似7-Eleven咁，梗有一間係左近。裡面重有一間買麵包蛋糕既商店，到唔知叫咩名但係d蛋糕同埋麵包整到鬼死咁靚，睇個樣好似好好味咁，見到就流晒口水~~~~不過我哋都買o左一件精美既栗子蛋糕仔，近住我哋就去還車仔啦。近住就到搵晚餐食既時候，本來想去札幌啤酒館到食放題，由酒店行去搵o左好耐先搵到，點知話無得食重要係預先Book先有得食，真係一肚氣呀。係無得食放題之下就行返去 Sapporo Factory 入面既食肆到食晚餐。今晚既晚餐我哋就揀o左食燒烤晚餐，成日都見到呢間野係d日本報章到買廣告既麥羊亭，重有Discount Coupon添呀!本來諗住食返個放題補數，不過經我哋兩人商量後都係叫定食算吧，因為都唔係好肚餓。我哋分別叫o左一個羊同埋一個牛既燒烤定食，嘩~~~原來d羊肉都幾羶下，好在無試食個個羊之放題，如果唔係就賴野~~~食完野就行下個商場，不過d舖頭差不多全部到閂晒門，咁我哋唯有返酒店休息，順便去行下附近既便利店。

Ben HA

06.11.2005 (星期日) 睛<--->陰

第九天:自駕旅遊

函館 --> 支笏洞爺國立公園(地圖) --> 札幌

住宿: 東橫Inn北口

行程簡介:

今日嘅行程係要返札幌，但係會經支笏洞爺國立公園、千歲市個邊返返去札幌，車程都預計要成六個幾鐘先返到札幌。

係夢空館食o左館主整嘅精美早餐之後就出發去睇埋係函館最後一個景點就係女子修道院，由夢空館出發到女子修道院都要成30分鐘。

係係星期唔知係咪因為日頭嘅關係，去到嘅時候都已經好多人同埋旅遊車係女子修道院到出現。停低架車行埋去睇睇原來又係要收入場費，都要成JPY$500，因為我哋都係想到此一遊，所以都係係外圍睇下就算(睇返資料原來入面都幾靚個喎，尤其係落雪嘅時候，有機會下次入去睇下先)。跟住就驅車前往支笏洞爺國立公園，因為行車方向唔同o左，所以沿途風景又有另外一種體會。行o左大約三個鐘頭到就到達o左目的地支笏洞爺國立公園，話時話都呢個支笏湖好似一個海咁樣，大到根本唔似湖嘅。一路行一路睇，都有好多人係呢個湖到釣魚，唔知d魚有幾大條嘅呢 ? 又係睇返d資料，原來係呢個湖附近有幾個景點，不過d書仔同個GPS都無顯示出來~~~睇完呢個湖，就要去另外一個目的地札幌，

本來想去千歲市到睇睇，不過驚時間唔夠同埋早天黑嘅關係，想早d到札幌。嘩! 返去嘅路差不多有四分三係行山路，好鬼正 ! 如果架車大 c.c. 嘅話重正，係日本揸o左幾日車，發覺d日本人揸車都幾守規矩，所以有時d車都行得幾慢，點解慢呢，因為人哋跟住o左一部慢車，最衰就係佢上斜想比我哋爬頭，又唔會開慢d，落斜又無得爬頭，大佬我哋架車細c.c.好難係上斜發圍架嗎 !所以上斜都係跟住佢，落斜就黏住佢，都攪到佢幾大壓力。揸揸下重見到有影快相添呀，原來日本人都會同香港人一樣會閃燈提醒對面線有影快相架喎。揸o左大約個幾鐘就返到札幌喇，見時間重早，於是乎就去 Sapporo Factory，呢個其實前身係啤酒工廠，後來經過改建，外表係紅磚瓦的建築同埋大型煙嘅煙囪，裡面就全部裝修過，變成一個幾大下嘅Shopping Mall。入面有四個館: 分別係一条館、二条館、三条館同埋四条館。煙囪廣場的大煙囪同二条館透明拱廊就成為Sapporo Factory嘅標記。重有入面嘅麥酒釀造所係一個可以話係歷史博物館咁，如果想試下做啤酒嘅話，可以去札幌啤酒園做下啤酒見學喇。順便食返個Late Lunch，因為我哋都未食嘢。到o左Sapporo Factory嘅時候見到有好多車排隊入去佢哋嘅停車場(又係星期日嘅關係)，身為香港人嘅我哋梗係搵個街邊位泊低架車先啦 ! 入到去有一大班小朋友係個透明拱廊下面嘅廣場到唔知有咩Function攪緊，下面d食肆間間到有人係到排隊，都唔知咩地方來架。開頭想食一間叫MisterDonut嘅食肆食下d Donut同埋其他嘢，點知條隊好似唔郁咁。於是乎就去另外一間叫星華樓食包嘅舖頭，之前排隊都已經見到好多人食呢間星華樓嘅包同埋好似燒賣嘅東西，點知淨係得包包食d燒賣嘅東西買晒，不過佢d包包都幾大個。食完個包包行o左一陣個商場就驅車返去酒店東橫Inn北口，揸車唔洗5分鐘就去到喇。係之前已經問過酒店佢哋有個停車場泊Overnight都係收JPY$500，都幾鬼抵，呢個係係北海道唯一一個地方俾錢去泊車。Check-in 嘅時候就拎返張臨時會員咭出來，即刻就有Discount喇，又係俾返前幾日住個間房俾我哋。係房到休息o左一陣就出去食返個晚餐，今次去o左Sapporo-ESTA 10/F嘅食肆到食晚餐，個到有個叫拉麵共和國嘅地方，入面有九間拉麵店，主要係sell北海道唔同口味嘅拉麵店。係拉麵共和國出面重有幾間食肆，我哋就係其中一間叫大戶屋嘅地方到開餐喇。叫o左兩個定食，都幾好味道，食完行出去先見到原來呢間嘢有咖哩湯飯食，聽聞北海道幾出名架嗎 ! 食飽飯就行o左一陣Stellar Place同埋大丸札幌店就返去酒店休息喇。

Ben HA

05.11.2005 (星期六) 睛

第八天: 自駕旅遊

函館市內遊

住宿: ペンション夢空館PENSION YUMEKUKAN

行程簡介:

今日第一個行程就係去函館朝市到食返個早飯先，去到朝市個到已經見到好多旅遊團係個到出現o左，其實函館朝市係一個海鮮市場，不過唔知點解有會成為一個旅遊點呢?! 我哋一路行一路睇，見都有一檔有得買燒帶子嘅舖頭，

好似幾好味咁，於是乎我哋就坐低o左食喇，係佢燒嘅途中見到d長腳蟹又好似幾味咁，所以又叫o左一隻燒長腳蟹食。呀，隻燒帶子都幾好味，但係就無係小樽個到食到嘅燒帶子咁好味，唔知係咪無落牛油嘅關係呢 ? 跟住緊係食下呢個出名嘅三色丼同埋二色丼食下啦，

之前近團已經食過d海膽已經覺得好好味，今次個d重好味道，d三文魚子加埋d日本飯真係幾鬼死好味。食完又係朝市入面行下，見到好多人都食雪糕，我哋有買o左一個來食，好重奶味，正。

行完朝市，下一站就係去呢個五稜郭公園，五稜郭公園係有一段故架原來，得閒就Post出來。由函館市去五稜郭公園都係大約半個鐘到，

去到嘅時候唔知係咪因為係星期六嘅關係，都好多旅遊車同埋遊客係五稜郭公園入面，入都去又一堆一堆人，行o左個公園一陣，我哋就四圍影下相，有個好熱心嘅日本伯伯主動幫我哋影相人相喎，佢咁有熱誠就俾佢影啦，佢左度右度又叫我哋企後d，以為佢好掂添，點知原來都係一般啦~~~公園行o左一陣就走，因為太大所以行一小部份。跟住就上去個五稜郭塔高空睇下個五稜郭公園，見到佢有兩個塔，開頭以為去高個個添，點知原來係高個個係未用得要係2006年4月先開放。原來都係好多人上去個塔到睇景，之前係酒店到拎o左d優惠卷，買入場卷就有Discount喇。上到去又係人頭湧湧，基本上係睇唔晒成個公園嘅，睇o左一陣就走人，行下下面個商場，又有得試食，近住就係返返函館睇下其他嘅地方喇。見到個GPS有個公仔介紹一個叫做土方、啄木浪漫館(日本嘅浪漫觀系代表記念館)，有係要俾入場費嘅，都係到此一遊吧 ! 跟住就去函館嘅湯之川喇，呢個係函館嘅溫泉區，四圍都係溫泉旅館同酒店，個GPS重Show o左個神社個標誌，咁我哋就近住去睇睇啦 ! 入去睇下日本嘅廟先，入面一個人都無架~~~睇完廟就要醫肚喇。之前係夢空館一塊板到見到一個叫做大門橫丁嘅地方，入面有十幾間嘅食肆集中嘅係個到。根據夢空館個老板話我哋知係JR函館站個邊，一個叫自由市場與中央郵局嘅地方(經過無入到去添，睇返資料個自由市場入面應該幾多嘢買同埋相信價錢會幾抵，不過無入過去睇)附近，於是乎以中央郵局為地標喇 ! 去到附近嘅時候就兜o左一排先搵到大門橫丁，個個係一達都唔係幾大嘅地方，入面有十幾間食肆集中埋一齊，款式都有唔少。開我地就諗住食拉麵嘅，有兩間都幾多人排隊等食，一間叫櫻井ラーメン店，另一間叫新函館らーめん龍鳳。但係等下等下又去o左另外一間叫做やきとり弁当光味亭食串燒豚肉，一來價錢唔洗咁貴，二來試下其他嘅食品，唔洗成日食拉麵(雖然好好味)，個串燒豚肉飯到幾好味，尤其係個汁同埋隻半生熟嘅蛋。食飽o左就去睇其餘嘅景點外國人墓地，普普通通無咩特別，又係到此一遊。跟住就去o左個中華會館，

不過閂o左門嘅 ! 去完睇唔到嘅中華會館，就去返元町個邊睇返個舊英國領事館，入面主要係買英國進口嘅嘢同埋有個Tea嘅地方，再入d就係個博物館，又要俾幾百YEN入場費，所以我哋無入去睇。跟住就去o左元町公園入面嘅函館市寫真歷史館到睇嘢，入面好多唔同年代嘅相機放o左係到做展覽，二樓又係要收入場費。我哋又無參觀到。下一個景點就係函館市舊公會堂，外表英國式嘅建築物，又係好多人睇呢個景點，重不時見到有d的士司機揸住架的士好似做導遊咁一路行一路講解俾車上面嘅乘客聽。去到門口見到又係要俾入場費，嘻嘻~~我哋又係唔入。見到二樓平台有人著住d英國宮廷式嘅衫係到影相，真攪鬼。之後就係呢個元町區到行o左一陣就落返去金森倉庫群，睇返個西波止場美術館，入面有好多熊BearBear嘅公仔，價錢一般啦，不過差不多全部都係祖國嘅製成品。

再睇埋個函館啤酒廠就食晚餐喇，函館啤酒廠唔知日頭係咪有其他嘢睇嘅呢，夜晚去到見到淨係一間好大間嘅餐廳同埋有一間精品店，不過夜晚嘅燈飾真係幾靚。睇完呢個函館啤酒廠之後就係食晚飯嘅時候喇，見到係西波止場美術館隔離有一間叫LuckyPierrot嘅食店，呢間嘢有包、Pizza同埋咖哩飯食，前日見都想試下架喇，今日終於可以試一試喇。

叫o左個咖哩豬扒飯同埋咖哩雞球飯，兩個飯都好出色，d咖哩又好味喎，成碟飯食晒咁濟 ! 食完個美味嘅晚餐之後，

就揸車去睇下夜晚嘅函館市舊公會堂，夜晚真係幾鬼靚嘅呢~~之後就返去夢空館休息啦。

Ben HA

04.11.2005 (星期五) 陰(二世谷) ---> 睛 (函館)

第七天: 自駕旅遊

二世古 --> 大沼國定公園 --> 函館

住宿: ペンション夢空館PENSION YUMEKUKAN

行程簡介:

朝早起身見到太陽諗住今日會好天，點知都係一迅間嘅陽光，後來都係陰天。YUKI 幫我哋準備緊早餐嘅時候，我哋就係間民宿入面影下相留念。

食完個簡單嘅早餐之後就開始第二日嘅駕車之旅，途經尋日去過嘅二世谷農場與自然工房，原來日頭可以見到羊蹄山(又有蝦夷富士)架。近住一路揸車嘅風景都幾靚，可能重係早同埋係郊區，車都唔見多架，因為熟習o左日本嘅路面情況同埋個GPS，速度上快o左好多。有時經過幾靚同埋特別跁地方嘅時候就會停一停睇下，順便去過廁所，

日本都有唔少咁嘅設備，途經一個叫做森町嘅地方，原來呢個地方都有好多嘅自然風景區睇，不過無做到資料搜集，所以唔會去。跟住十二點幾就去到大沼公園，去到嘅時候Miss o左個路口，所以又要兜返轉頭。入到去大沼公園附近都已經唔係好多紅葉，好多都變黃，不過紅紅黃黃咁又幾靚喎。落車四圍睇嘢時都幾覺得凍下，見到有人坐d觀光船係個湖到睇嘢。

去到大沼公園就係附近行o左一陣見無咩特別又好多人，時間又差不多到食午餐嘅時候，就諗住搵間食肆食個Lunch啦，不過都係搵唔到合心水嘅。我哋商量後就決定落到函館先搵嘢食。係落函觀途中見差不多無油就去入入油先，入完油行o左大約半個鐘到就到達o左函館。咁我哋就係朝市附近泊低架車就搵嘢醫肚，講開就講，係北海道可以將架車週街泊，只要唔阻到人同車就可以架喇。我哋搵o左間叫做一文字嘅拉麵店食個午餐，味道都幾好味架，最鍾意食個d半生熟嘅雞蛋架喇。食完嘢就去睇哈函館嘅地方名勝喇，揸車嘅好處就係可以四圍停，四圍睇，加上泊車又可以四圍泊，正~~~第一站就去o左元町配水庫，其實都係一個配水庫上面邊o左做公園，附近就係函館夜景纜車站，見到個站係到做緊維修，原來北海道好多嘢都會係十一月停止運作進行例行維修架。

之後就去o左函館山美術館睇睇，不過係閂門大吉。行過少少就係函館聖約翰教堂，再行過少少就係函館東方正教會、天主教元町教堂。行到差不多就返去我哋今晚嘅住宿民宿夢空館，

間民宿其實都幾近函館d名勝景點架。泊好架車入到去Check in o左之後就將d行李放入我哋間房，今次間房係無廁所係入面，不過有個洗手盤，重有個閣樓，基本上間房可以訓到四個人。個廁所就要係出面一齊同其他人用，廁所附近走廊嘅盡頭重有一個茶水間可以自己沖下咖啡奶茶飲。重有個浴室就係地庫個層，有幾間浴室加一間有浸浴嘅浴室，如果要大毛巾就要盛惠JPY$100。食早餐嘅地方會係接待處附近，不過聽日就無諗住係呢到食，我哋會去函館朝市到食嘅。安頓好d行李後就出發去金森倉庫群到睇下嘢同埋搵下今晚嘅晚餐，因為間民宿都幾近金森倉庫群，所以我哋就步行去金森倉庫群喇。去到個到都幾凍下，唔知係咪因為海邊嘅關係呢。係呢個海邊除o左有金森倉庫群外，重有個叫做函館西波止場嘅建築物，地下個層個個市場有不少嘅海鮮製品同埋好多嘢食買，重有得試飲試食添呀~~~二樓就係食肆叫o左函館海鮮俱樂部，就係我哋今晚晚餐嘅地方。睇完個函館西波止場，本來想去睇下個西波止場美術館，不過唔順路，最後先睇。咁就順路去睇下金森倉庫群個幾舊倉庫喇，分別有明治館、函館啤酒廠、海鮮食堂、KaneMori(食嘢嘅)、金森洋物館(係個倉庫入面有十幾間商舖係埋一齊)、函館浪漫館(買玻璃製品，唔知點解會浪漫嘅呢?!)、函館歷史館、金森啤酒館(酒吧一間)同埋個 BAY(買d飾物同埋一間幾大間嘅餐廳連住o左)。

因為重有一日嘅關係，所以個函館啤酒廠無去到睇，之後就去o左函館海鮮俱樂部食晚飯。食完飯就去返教室區個邊睇下夜晚嘅建築物，原來夜晚都幾靚個喎。睇完就返夢空館，原來係無浴巾提供，咪走去問有無浴巾囉，拎o左兩大條浴巾(返到房見到原來係要俾錢架，每條盛惠JPY$100，不過第一晚無收到)。

Ben HA

03.11.2005 (星期四) 陰<--->雨

第六天: 自駕旅遊
札幌 --> 定山溪 --> 俱知安 --> 二世古 (二世谷)

住宿: Higashiyama egg shell

今日係自駕旅遊嘅第一天，起身食o左個簡單嘅飯團加湯嘅早餐之後就要拎埋件大行李去Tocoo拎駕車，今次Book o左架Madaz 1,300 c.c. 嘅車，去到拎車嘅時候就俾o左架 Madaz Demio 嘅1,300c.c.，架車都幾新淨下，係Book之前都Book定埋個GPS系統，有o左呢個GPS係北海道駕車就真係幾容易，加上同香港一樣都係用右"車太"，所以就好正。另外一個原因係因為計過數如果用JR去我哋想去嘅目的地嘅話重要貴過自己駕車，重有Check過JR時間表(Yahoo Transit)同埋自己駕車所要行嘅路程同埋收費，JR又要限時限刻，時候唔係快過自己駕車，係北海道自己駕車油錢又唔係好貴，平均JPY$130一公里到，重有可以全程行國道(唔洗俾錢)，唔洗行d有料道路，最重要一樣嘢就係彈性非常之大。係收車嘅時候個租車職員用o左d簡單嘅英文解釋個GPS係點用，同埋大家Check下架車有d問外傷。一上車就梗係入o左我哋目的地Higashiyama egg shell嘅電話入去個GPS，佢即刻整o左個路線出來，嘩 ! 個預計到達目的地時間成三個幾鐘，之前已經Plan好o左會途經定山溪，所以我哋會睇埋呢個地點，不過都係到此一遊，定山溪其實都係一個溫泉區，四圍都係溫泉酒店，呢到都有不少嘅紅葉架，基本上我哋一見到d靚嘅地方就會搵個位停低睇下。本來諗住行呢個國道230號、國道276號、國道343號、國道66號同埋國道343號途經中山峠會係俱知安個個方向行，之前都係網上面有d可以計下車程同埋時間，重有地圖睇下添呀都幾方便。不過由於對個GPS重係未甘熟識，所以有時會Miss o左d路口，不過佢又會俾過第二條路指你去目的地架，真好嘢!去到二世谷時天氣唔係咁好，重有霧霧雨添，係個區著名嘅山羊蹄山(又有蝦夷富士)都唔係好睇得到，如果天氣好嘅話，個山都幾靚架。大約十二點幾到o左Higashiyama egg shell，俾GPS預計快成個鐘。一去到間Higashiyama egg shell，入面一個人到無，門口重掛住個牌CLOSE，嘩!真係俾佢嚇一嚇，拍門又無人應喎。點知一推度門就入到去喎，咁咪行入去睇下有無人囉，又係一個人都無。過o左大約10分鐘後，就有個中年女士係大門到行入來，就用英文問我係係邊個，原來個日得我哋兩個人Booko左咋，跟住佢就自我介紹佢叫YUKI係EggShell嘅女館主，跟住就問我哋食唔食午餐，我哋見都成點鐘，又費時週圍搵，就每人叫o左個咖哩飯食喇。呀，日本d咖哩飯唔知點解係幾好味個喎。食完午餐，YUKI就介紹附近有d咩睇同埋可以去佢嘅另外一間溫泉酒店(源泉の宿)下溫泉，重俾o左d優惠卷我哋，開頭都有諗住會去睇睇，不過最後都無因為遠離我哋住宿嘅地方，唔係咁方便。重俾o左卷膠紙人哋，YUKI解釋話因為間民宿係近郊嘅位置，所以特別多昆蟲，尤其係一種你襲擊佢佢會發出臭味嘅昆蟲(原來係臭屁辣)，叫我哋用膠紙黏住然後包住佢，上到房又真係幾多呢類昆蟲喎。跟住我哋就出發去附近嘅景點睇嘢喇。第一站就係去神仙沼，一路去嘅時候好有係香港大帽山揸車嘅Feel，因為有d霧同埋係郊外。去到神仙沼停車場嘅時候都幾凍，同埋有霧霧雨落緊，所以最後都係無入到去，如果要入去嘅話就要行20-30分鐘先到。係停車場到都見到有幾架車泊o左係到，應該都有人入o左去喇。跟住我哋就原路出返去，下一站去俱知安喇，咁係個GPS到指去俱知安。跟住就行o左一條被封閉嘅道路(原來個段路人係每年十一月頭就會路面結冰，所以就會封閉一段時間)，但係又錯有錯著喎，去o左個叫做五色溫泉鄉嘅地方。個到見到有兩間好大間嘅露天風呂嘅酒店，係好遠重見到有d人係到浸緊溫泉添呀，原來呢一區係叫做二世谷積丹海岸小樽國定公園，咩有海岸係附近咩，唔覺嘅 ?! 跟住有無意中去o左另外一個景點大湯沼，呢個其實係一個溫泉湖，係個停車場到已經聞到一大陣硫磺味，個停車場隔離有一間唔知叫咩名嘅溫泉酒店，後來先知叫做雪秩父國民宿舍，我諗落雪嘅日子係佢個露天溫泉到浸溫泉一定好好Feel。行落去近距離睇下個大湯沼，嘩~d味好勁，個到重有個足湯(赤鬼池)添呀，見到d日本人係個到玩洗腳。跟住就向俱知安出發，途中見到有一大班日本人唔知點解係一個噴水池到係咁入水喎，係一大樽一大樽咁入喎，情況就好似我哋香港人係郊野公園d集水區到入水咁樣。重要有個牌介紹係咩來個喎，原來有名堂叫做二世谷名水甘露水(位置)，咁我哋又入返樽飲下啦，不過唔知係可以直接入呀，定係要褒過先飲得，後來都係褒o左來飲。係去俱知安途經二世谷駅同埋二世谷大橋，咁順道去睇睇啦。去到俱知安因為天氣唔係咁好，都有d霧霧雨落緊，附近有無咩特別嘢睇，就係附近搵間食店食埋個晚餐，係一個連橫購物中心(日本有好多呢類型嘅中心)嘅地方到居然有間味の時計台喎，係網上面都有人介紹過呢間嘅拉麵幾好味(不過係講緊係札幌)，叫o左一個叉燒拉麵同埋叉燒拉麵加粟米食，日本d拉麵嘅湯真係幾鬼死好味。食完嘢就返Higashiyama egg shell，個GPS預計都要成個鐘至返到去，不過根據先前經驗打個七折就得。係Higashiyama egg shell附近有間二世谷農場與自然工房，去到嘅時候都差不多六點，見佢又未閂門咪行入去叫o左個雪糕食囉，日本d雪糕好重奶味，好鬼死正~~~原來間嘢收六點鐘架，我哋食完嘢走佢哋就閂門喇。跟住梗係返Higashiyama egg shell啦，又係空城計，一個人都無，突然係 Reception後面嘅廁所有d聲，咁我哋以為有其他住客添，之後有個日本人行出來，好迅速咁就行o左落去下一層，之前來嘅時候睇過下一層係無房嘅，所以因為好奇情況下我哋就落去睇睇喇，個人唔見o左，原來有一度門可以出返去架，咁個個人究竟係咩人來嘅呢 ?! 之後都無見過佢出現，唔通係借廁所嘅 ?! 跟住我哋就沖涼，重試埋下一層嘅湯浴。返到房本來想睇電視，係之前見到電視機隔離有個好似打機入錢嘅箱仔，心諗唔通要入錢睇電視嘅收費電視。原來真係要架，收費係2Hours/JPY$100，我哋諗唔通民宿睇電視機要俾錢嘅，之後重有民宿住，咁咪晚晚洗幾百YEN睇電視，本來諗住唔睇，但係成間民宿得我哋兩個又好似靜o左d，成晚用o左JPY$200，成晚都黏o左唔少昆蟲。今日都幾早訓覺，因為聽日要揸成長途車落函館~~~

Ben HA

02.11.2005 (星期三) 睛

第五天:

白い恋人工廠 --> 札幌自遊行

住宿: 東橫Inn北口

今日係跟團嘅最後一日，集合時間無前個幾日咁早。間酒店提供嘅早餐無前個兩日嘅酒店咁正，叫做標準咁啦。食完早餐係大堂到集合，因為我哋會 Stay Behind 嘅關係，旅行社嘅領隊就建議我哋將件行李放係酒店到 Keep 住，呢個提議又唔錯喎，所以我哋就採納o左。今日得一個行程就係參觀白い恋人嘅工廠，間工廠位置係札幌士附近。去到嘅時候間嘢好似係啱啱開門，我哋係第一批人到場參觀，入到去睇下，d 裝修都幾特別，話時話一間製餅廠可以咁出名同比旅行團參觀都幾犀利o下，唔知香港嘅嘉X會唔會學下呢間製餅工場咁呢，攪返d 團收下入場費。參觀完之後，個領隊教我哋搭巴士返去札幌市中心，佢話個個巴士站任何一架車都可以去返札幌，於是乎我哋係是但上o左一架巴士。日本 d 巴士好似香港 d 旅遊巴咁，都幾豪華下。基本上我哋唔知點樣俾車費，所以就排係最後睇下d日本人點俾錢，見到佢部份人手持一d類似香港嘅八達通或者儲值咭之類嘅東西。見到佢哋上車會係車門附近拎張咭仔，我諗係確認你係邊到上車，基本上我哋都唔知要搭幾耐先有至落車，都係睇下附近嘅環境，係咁睇下個地圖同埋落車嘅站名。好在之前好似有d印象經過落車嘅地方，同埋又有一大堆人係個個站落車，我哋咪又一齊近住落囉，之後就搵地方食飯，之前第一日係札幌附近行過，係間 Robinson百貨公司嘅地庫有幾間食肆d嘢好似幾好味咁，所以就去呢到食啦 ! 我哋揀o左間食迴轉壽司嘅食肆名叫"魚一心"，等緊d迴轉壽司轉出來嘅時候，見到坐係我哋隔離嘅日本人叫o左唔知咩湯(後來知道原來係三文魚湯)，咁我哋就同個待應手指指話要呢個湯。日本d迴轉壽司到幾好味，最好食就係帶子壽司，件帶子重要大個件飯架，好恐怖呀。食完午餐就要去自悠行第一個景點，札幌電視塔，上去睇下大通公園同埋札幌嘅建築物，呢個塔原來都幾高下架，之前睇佢哋嘅網頁見到有Coupon ，不過過期嘅 !! 不過係北海道每間酒店都會有呢d景點入場費嘅優惠卷拎，重有d觀光刊物都會有架。睇o左一陣影o左d相之後就走人，去睇第二個景點時計台，呢個地方有個台 Set 好o左俾人影相，d日本人真係幾攪鬼，呢個景點我哋無入到去睇，因為又係要俾入張費用架。睇完時計台就順路去睇埋北海道舊本廳舍(簡稱北海道廳)，呢個建築物都幾靚，同埋係被個公園圍住都唔錯，外表係巴洛克式紅磚建築，睇落好有歐洲式建築物Feel，我哋入去簡單咁睇下就去前日住個間京王プラザホテル札幌酒店拎返件寄存嘅行李，間酒店原來都幾近JR札幌站，步行都係10分鐘之內，個JR-Tower就係JR札幌站、APIADOME、Sapporo-ESTA、PASEO、Stellar Place、大丸札幌店同埋個地下商場重要連住Loft、札幌東急同埋西武，係一個要行一日都行唔晒嘅地方，但係又都幾方便下。我哋今晚要下榻嘅地方就係東橫Inn北口，呢間可以話係一間幾多香港人住嘅酒店，我都覺得係。因為非常之適合香港住，有得上網、洗衫、乾衣，朝早重有簡單嘅飯團加湯飲食，位置重幾方便添呀，最重要係價錢係非常合理。附近重有兩間LAWSON便利店添呀。入到酒店去 Check in 時，個Counter嘅接待員 Check 完資料後就問我要咩禮物，因為我係係網上預約，佢哋有手巾仔、襪同埋電話繩揀，咁我哋就揀ｏ左手巾仔。之前係網上面睇過話入會佢哋個4&5 CLUB，不過要俾JPY$500入會費，整完之後就上去房到放低件行李，再休息一陣就出發去行下附近嘅Shopping Mall，順便搵埋間租車公司 Tocoo Car Rental，之前係網上面搵過，呢間租車係最平，間公司係札幌站南口行過去5分鐘就到。見到佢哋未閂門就行入去問問，我哋架車就準備好，聽日就可以拎。跟住我哋就行去PASEO嘅地下食店到食o左個晚餐，跟住行o左一Stellar Place就返酒店休息，準備聽日嘅駕車之旅。

:)	:(	;)
:D	:-/	:x
:P	:-*	=((
:-O	X(	:7
B-)	#:-S	:((
:))	=))	:-B
:-c	:)]	~X(
:-h	I-)	=D7
@-)	:-w	7:P
2):)	:-q	:!!
\m/	:-bd	^#(^

~活在當夏~

2005/11/09

2005年北海道之旅有用連結

2005年北海道之旅第十二天

2005/11/08

2005年北海道之旅第十一天

2005/11/07

2005年北海道之旅第十天

2005/11/06

2005年北海道之旅第九天

2005/11/05

2005年北海道之旅第八天

2005/11/04

2005年北海道之旅第七天

2005/11/03

2005年北海道之旅第六天

2005/11/02

2005年北海道之旅第五天