2008 紐西蘭北島遊記第十一日

Day 11 - 6/11/2008



Ash Grove Motel@Haruru Falls à 90 miles beach à Cape Reinga à Stone Church@Paihia à Ash Grove Motel@Haruru Falls



住宿 : Ash Grove Motel@Haruru Falls



今日食咗個美味嘅早餐之後

就要出發去睇90 miles beach同埋Cape Reinga，呢個景點嘅車程要成4個幾鍾先到，所以就要早Ｄ出發唔洗咁趕 ! 大約10:30 到咗90 miles beach ，開頭揸架車入去呢個90 miles beach嘅時候都唔覺有咩特別，但係再網真Ｄ又真係幾長下喎….真係長到見唔到陣頭架 !

然後就試下揸架車係呢個沙灘到行，開頭諗住可以由頭揸到尾先出去，但係揸揸下發覺有Ｄ唔係好妥咁，因為我哋架唔係四驅車，係沙灘行始終係有危險，所以就調頭返返去入口到，不過我哋都原來行咗幾耐下，要揸幾耐先出返去 ! 之後就去 Cape Reinga ，由呢個 90 miles beach去Cape Reinga有要成104km，車速行100km/hr都要行成1個鍾先到。點知去呢個Cape Reinga嘅路都幾多修路，重要係去到差不多淨返20幾公里就到嘅時候開始整喎，成段路好似玩緊 Rally 咁，短短嘅20幾公里行咗差不多成一個鍾 !

行呢一段路好似揸緊越野賽車咁...

最後要到成12:30先到，去到呢個Cape Reinga重有好多地方都做緊工程，架車定低咗之後都重要行多一段路先到呢個景點。我哋去到嘅時候其實陸陸續續有好多人來睇，有Ｄ人重係呢到飲紅酒同食嘢添呀 !

呢個Cape Reinga 其實只係一個燈塔，不過就係係紐西蘭最北嘅燈塔，所以就好多人慕名而來附近好多地方都好荒蕪下，如果有時間同埋興趣的話，可以係附近Ｄ地方到玩沙灘滑板或者沙灘四驅車。睇完呢個Cape Reinga就驅車返歸，點知無神神來有一段路成段封咗，要兜路行，但係我哋又無留意Ｄ好細嘅路牌喎，走咗去另外一條路，又徙咗Ｄ時間，最大問題係就快無油，嘩~~~個時幾驚唔夠油係路中拋錨真係唔知點算好…..好在最後都係有驚無險。



不過因為時間實在係太晏，本來諗住去另外一個市食，但係去到都要成差不多4:30，所以最後都係食Ｄ曲奇餅同埋生果就算啦 ! 返到去 Paihia 差不多成4:30到，我哋就去返Paihia市入面個 Stone Church@Paihia 睇下，呢個 Church 成間堡壘咁都靚仔

睇完之後就返去 Motel 休息下同埋準備埋晚餐。

2008 紐西蘭北島遊記第十日

Day 10 - 5/11/2008



Seaspray Motel@Thames à Whangarei à Paihia à i-site@Paihia à Haruru Falls à Te Waimate Mission Station à Makana Boutique Chocolate Factory à KeriKeri Mission House à Stone Store à Rewa’s Village à Haruru Falls à Ash Grove Motel@Haruru Falls

住宿 : Ash Grove Motel@Haruru Falls

今朝因為要去 Paihia ，所以要比平時早多一個鐘出發，但係因為Ｄ麵包發霉(包麵包帶咗成十日架啦!)，所以要去超市到買麵包，不過要到八點鐘先開門。重有就係好在間 Motel 幫我哋 Charge 部 Digital Wallet 咋，所以就可以抄Ｄ相去部 Wallet 到 ! 我哋差不多8點鐘去到間超市，等咗一陣佢哋就開門啦~~

入去買咗一條麵包之後就返車到整個三文治早餐食，食完就出發去 Paihia 喇 ! 係大約1點鍾到到咗一個叫 Whangarei 嘅市，因為到成1點，所以就諗住係呢個市到食完個 Lunch ，然後先繼續前進。點知呢個市到幾大下，兜來兜去到搵唔到Ｄ食肆，兜咗成半個鍾先搵到間肯德基

食咗個包餐就繼續向 Paihia 出發，大約2點鍾到就到咗Paihia，第一時間就去 i-site@Paihia 到搵下資料先。跟住就係個市入面兜下睇下有Ｄ咩係呢個市，同埋要搵下有無超市。呢個Paihia 其實都幾細下，個 Feel有Ｄ似香港Ｄ離島，但係兜咗好耐只係見到一間規模好細嘅超市

於是就去搵間Ash Grove Motel@Haruru Falls睇下有無得 Check in 先…途中見到有間超市，比起頭先個間大好多….去到間Ash Grove Motel@Haruru Falls，開頭個外型到唔係咁吸引….入去到間房簡直就係話一聲啦 ! 間房真係好靚，重要好大間添呀~~~

間房可以行出去一個花園到，呢個 Motel重有個泳池好鬼死靚架 !

房入面嘅設備都唔錯~~~~係間房都影咗唔少相 ! 整好晒Ｄ行李之後，就去附近嘅一個景點都睇下喇。之後就去到Haruru Falls，呢一條瀑布遠睇佢覺得唔係好大，但係走緊Ｄ睇又真係幾大下喎….

睇完之後就去咗一個要做 Stone Store嘅地方，但係揸揸下見都有一個叫 Te Waimate Mission Station，所以就揸過去睇下喇 ! 呢個Te Waimate Mission Station其實同KeriKeri Mission House & Stone Store差不多同一個時期出現，亦都係係紐西蘭第二間最舊嘅建築物。呢間Te Waimate Mission Station係一間英式建築風格嘅屋，開頭以為係可以免費參觀添~~~原來係要俾錢架 !

因為我哋一入去就一個人都無，咁係行下囉 ! 點知行行下就有個女士行出來問我哋洗唔洗佢解釋下屋入面Ｄ嘢，我哋話唔洗喇~~~之後佢就同我哋講要俾錢先至可以入去參觀，重要係 $7.5一個人呀~~~嘩~~~都幾貴喎~~~於是我哋就係外面影相就算啦 ! 跟住就繼續向Stone Store前進，係去呢個KeriKeri Mission House之前，我哋去睇咗一間Chocolate製造廠，Makana Boutique Chocolate Factory，係入面有得試食下佢哋Ｄ手製Chocalate，重可以睇到佢哋點整~~~ＤChocolate都幾好味，不過我哋最後都係無幫襯 !

之後去到嘅時候就見到原來KeriKeri Mission House 同埋 Stone Store就係隔離架咋 ! 呢個KeriKeri Mission House 同埋 Stone Store都係要俾錢先至可以入去參觀，就我哋見都其實好多人行埋去見到話要收錢就會走人，因為價錢真係唔平，兩個人嘅入場費可以食餐豐富晚餐架啦 !

不過其實我哋對呢兩間屋仔嘅外觀有興趣多Ｄ…睇完呢個係去搵一個叫Rewa’s Village，又係兜來兜去到搵唔到，睇地圖就係KeriKeri Mission House 同埋 Stone Store附近，最後都搵到，原來係個山坡上面，原先就係KeriKeri Mission House 同埋 Stone Store附近嘅一條橋過去就到，不過條橋就塌咗….入面又係無人，呢個地方都係要俾入場費，但係就少好多只要 $2.5 重要係自願性質嘅，入面有幾間草屋，同一般嘅山區森林住嘅屋無咩大分別，所以覺得好普通。

睇完就去咗 KeriKeri入面嘅超市都買咗Ｄ食物準備今晚嘅晚餐~~~~

2008 紐西蘭北島遊記第九日

Day 9 - 4/11/2008



Rotorua (1) à Hells Gate à Comvita Visitor Centre@TE PUKE à Tauranga à Lunch@Tairua Subway à Hot Water Beach à Cathedral Cove à Thames à Seaspray Motel@Thames à Thames City Centre àPAK’nSAVE Super Market@Thames à Seaspray Motel@Thames



住宿 : Seaspray Motel@Thames

今日嘅車程比較長，要去The Coromandel個邊，所以就要早早出發。首先我哋就去睇下呢個Hells Gate嘅景點，呢一個Hells Gate其實同前一日睇過嘅Wai-O-Tapu Thermal Wonderland & Te Puia都係同一樣嘅嘢，所以都係係門口影張相留念~~~

之後係地圖到發現有呢呢個 Comvita Visitor Centre@TE PUKE ，所以我哋就去睇睇喇，還掂都係順路之嗎 ! 另外就係因為我哋都有食開呢一隻嘅產品，諗住會平Ｄ添~~不過個價錢就同街買一樣，有Ｄ地方重平過佢添呀 !

但係呢個 Visitor Centre就有另外Ｄ嘢睇，譬如俾你睇下Ｄ蜜糖係點採返來喇、佢哋Ｄ Product 有無用啦~~不過我哋無興趣呢 ! 淨係買咗Ｄ嘢就走人繼續旅程~~之後就去到一個叫 Tauranga 嘅市，呢個地方都幾大，但唔知點街兜咗入去，兜咗成半個鐘先出返去大路咋 ! 大約1點鐘就去到一個叫 Tairua 嘅市，於是我哋就係呢到食埋個 Lunch@Tairua Subway 喇 !

食完就繼續前進啦~~~沿途都無咩特別，可能都見慣咗，都係Ｄ一大片樹林，好多羊、牛咁囉 ! 大約2點鐘就到咗 Hot Water Beach ，去到時都有Ｄ人係到行來行去。去行呢個Hot Water Beach最好就係除鞋行，如果唔係就會成腳都係沙啦~~~呢個Hot Water Beach唔係成個沙灘都會有熱水，係只有其中一個位置先有，而呢個位置係因為係近岸嘅地下入面有Ｄ地下熱水滲出來，所以先會有呢個Hot Water Beach之名~~~我哋去到個個位置係咁搵但係都搵唔到有熱嘅地方，後來返到香港先知道原來要等到潮退嘅時候先至會試到有熱水係個沙灘到湧出來，不過我哋個日要等潮退的話就會好夜先走架啦 !

之後我哋就去另外一個景點就係 Cathedral Cove

開頭行去個入口到睇下Ｄ資料，話要成個半鐘先可以去個呢個洞到~~個時已經差不多成3點鐘，因為去我哋住個個地方都要成2個鐘嘅車程，所以我哋唯有放棄啦 ! 之後就大約4點幾就到咗 Thames，原先以為Book 個間 Motel 係個市中心附近，原來都重要多成15分鐘路途先到 !

間Motel原來係海邊到，如果天氣好又無咁大風的話，個View會好正 ! 安頓好晒Ｄ行裝之後就去返Thames市到睇下有無咩可以食，最後都係要係超市到買嘢返Motel到食~~~