Blog 網誌

近排因為要搵Ｄ旅行Ｄ資料，無意中睇o左好多其他係現實生活中唔會識到o既人，睇o左好多佢地o既網誌，好似突然間識o左好多個朋友咁(我識佢佢唔識我)。好多人現在好鍾意將一Ｄ生活點滴呀，每日發生過o既視事都放係自己個Blog到同人分享，話時話呢Ｄ同寫日記差不多，不過呢種日記係會分享到全世界，一個素未謀面o既人都可以睇你o既生活點滴，有時重有人同你講你個篇Blog入面o既野o添...

但係我又諗如果突然網誌供應商突然唔見o左你日積月累o既網誌咁點算呢 ?

都幾大鑊個喎....

2007 海洋公園哈佬喂

10月又係 Halloween o既日子，咁o岩有個朋友有特價可以買到Ｄ門票，就一齊去玩下啦...海洋公園呢個Halloween Function聽聞攪得幾成功，年年都大排長龍.....10月6日晚驅車由新界西一直去到港島南區，都咪話唔"甘"。未去到之前已經聽到個搭車去個朋友話去海洋公園Ｄ Shuttle Bus 打晒人龍.....嘩...係咪咁多人呀....去到泊車時已經有一個停車場FULL o左，心諗會唔會無位架，好在佢地重有位。之後去到門口已經見到人山人海咁，好似新年去行花市咁人頭湧湧....之後成晚都係係到排隊排成個鐘，玩就玩兩、三分鐘，真係幾無癮。成晚去o左4個鬼屋，驚嚇程度就OK，不過佢地就專門搵Ｄ女仔來嚇...重有就係反而覺得係Ｄ道路到失驚無神行出來個Ｄ重嚇到人.....玩完最後個個"東瀛凶間"都成11:50 p.m.，距離12:00差不多...真係玩到盡呀....但係個"東瀛凶間"最恐怖o既唔係入面Ｄ場景同演員，因為成條人龍咁入去睇，入面Ｄ演員又做到攰晒(蟹蟹地...)，最恐怖o既係排隊排好耐都未到咁.......
整體來講都OK o既....不過如果下年有機會去一定要買 Fast Pass....