2005年北海道之旅第三天

31.10.2005 (星期一)  天睛

第三天:

鹿部溫泉 --> 間歇泉足湯 --> 登別伊達時代忍者村 --> 昭和新山、有珠火山、熊牧場 --> 洞爺天翔溫泉酒店

住宿: 洞爺天翔





第三日都係要晨咁早起身，呢d可能係跟團嘅唔好處。不過，有美味嘅早餐食(朝放題)又抵賞返 ! 講開又開，我哋今次d團友都幾早起身，次次落到去食嘢嘅地方都會有幾個幾早到~~食完美味嘅早餐之後又要準備起程出發啦 ! 重有d時間淨就係酒店四圍睇下，原來呢間酒店附近環境都幾正個喎。d 葉又紅、又黃、又綠咁樣都幾靚，重有附近有個 Golf Course ，走嘅時候間酒店嘅員工重企晒係個大門到不停咁揮手同我哋再見。今日嘅行程首先就係去睇去呢個間歇泉浸腳(日本人俗稱足湯)，去到嘅時候重有一條好大嘅 banner 掛係門口到寫住"熱烈歡迎東瀛遊"，好有祖國嘅 Feel 呀~~呢個間歇泉會不定時噴d溫泉水出來，入面重可以浸下腳，不過唔係咁熱。浸完腳之後就去睇登別伊達時代忍者村，個位置都幾偏僻下，去到就食o左個蒸嘢嘅午餐，味道就比較淡o左d。食完嘢就入去忍者村參觀，入面嘅設計都幾靚，重有好多嘢食買，之後就睇o左個唔知佢講咩嘅忍者 Show。睇完之後就去昭和新山、有珠火山同埋熊牧場，嘩 ! 個熊牧場入面有d熊真係氣味難頂，企一陣間到頂唔到呀 ! 不過都有d團友買嘢餵d熊，因為呢到都有不少嘅時間停留，所以就係熊牧場附近四圍行下。北海道d玻璃製品都幾鬼貴，閒閒哋一件都幾百蚊港幣。睇完d有味嘅熊同埋個火山之後就去洞爺湖溫泉酒店，去到嘅時候又係天到黑晒，今日嘅酒店就係洞爺天翔又有得浸溫泉，因為重有一斷時間先去酒店入面嘅餐廳食自助晚餐，放低晒行李之後就去浸下溫泉。浸o左一陣就上房換返衫去食晚餐，今晚嘅晚餐又係好正。食完晚餐就去附近嘅商店睇下，買嘅嘢同其他舖頭差不多，重有就係行 7-Eleven ，之後上房休息o左一陣等一陣睇洞爺湖嘅花火大會煙花，今晚係今年最後一次放煙花。睇睇下原來我哋間房睇到部份架，早知就唔落去睇啦，因為個到都幾凍下架 ! 睇完又去浸多一次溫泉，咁就完結今日嘅旅程喇。係房到準備訓嘅時候無神神有人敲門送o左生果盤俾我哋，原來佢哋準備少o左件披肩俾我哋呢團人，所以成團人都有得送~~嘻嘻

2005年北海道之旅第二天

30.10.2005 (星期日)  陰--->睛

第二天

札幌-->大倉山---> 登別地獄谷  --> 函館夜景 --> 鹿部溫泉

住宿:  鹿部皇家飯店



晨咁早就要起身出發，今日嘅行程係大倉山冬季運動博物館同滑雪場，一個無咩特別嘅景點。之後就係去登別嘅地獄谷，車程都幾鬼遠，要坐成個幾鐘頭車程，不過可以訓下覺。之後午餐就係去係函館途中嘅一個海鮮市場食海鮮鍋，個到可以自費食長腳蟹、新鮮嘅北寄背、美味嘅拖羅(真係入口即溶)、嚮螺刺生，重有好多好多嘅美味海鮮。經過之前嘅資料搜集，我哋無食到長腳蟹因為價錢都幾貴下同埋無咩特別，我哋揀o左，北寄背、拖羅、嚮螺刺生、海膽(無腥味，入口係有海水嘅味道，正~~~)、同埋帶子刺生，埋單都要成九百蚊港幣，不過係香港用呢個價錢係食唔到架。其實個海鮮鍋本身都有唔少嘅嘢食架。食飽之後就同長腳蟹影相，之後就要繼續行程落函館睇夜景。

上到去函館山好大風同埋都幾凍下，話時話函館嘅夜景都係一般啦，無香港個夜景咁正。

睇完夜景就去今晚嘅住宿地點鹿部皇家飯店，同埋食酒店嘅自助晚餐。呢餐都幾正，有好多嘢食架，有三文魚子、雪長蟹、長腳蟹同埋毛蟹，團餐來講都叫做好正。食完之後休息o左一陣就去浸溫泉，日本家陣好興呢個叫做備長炭嘅東西，連洗頭水、護髮素同沐浴露都有備長炭成份，所以我都係個大浴室都用o左 ! 試過個露天溫泉，感覺都唔錯，如果有落埋雪可能重正。

2005年北海道之旅第一天

29/10/2005 (星期六) 陰天

第一天 : 香港 --> 札幌 

住宿     :  札幌後楽園ホテル

晨咁就要係香港國際機場集合! 嘩，成團人有成四十幾，都未試過有甘多團友。不過同一時間又見到好多去北海道嘅團，就咁睇一睇都有成六至七團，香港人真係勁......由香港搭國泰直飛北海道嘅新千歲空港要成四個鐘頭，去到機場比預期早，不過都無著數，因為早我地少少有一班台灣機到o左，係北海道o既入境廳等o左好耐先入到境，香港o既入境處效率一定快好多....

出到機場，見到成個地濕晒，之前落過雨，好在之後無落。不過氣溫都感到凍o左幾多下，五點鐘到個天已經開始黑緊，未到五點半已經黑晒~~

行程第一個地方就係札幌嘅拉麵橫丁，呢一餐係團包嘅，每人可以有成JPY$1,300食碗拉麵，因為日本時間比香港快一個鐘嘅關係，成四點幾邊有咁快肚餓呀~~咪四圍行下囉先食o野囉，行行下重買o左件草餅食呀! 之後返o左去拉麵橫丁到其中一間舖頭會，叫o左個帶子拉麵、叉燒拉麵同埋一個餃子，日本d拉麵味道係香港真係食唔到~~好味。食完o野就返酒店，今晚嘅酒店叫做札幌後楽園ホテル間酒店係大通公園隔離，附近無o野行，不過有間便利店 LAWSON 就係其中一間我哋去，日本d便利店都幾鬼多o野睇，行o左一陣就返酒店訓覺~~~