~~~活在當夏~~~: 2015 荷、比、盧、德、法自駕之旅 Day 7 (9) 一日經歷四季....陰天、雨、落冰雹、落雪、太陽

2015/05/16

2015 荷、比、盧、德、法自駕之旅 Day 7 (9) 一日經歷四季....陰天、雨、落冰雹、落雪、太陽

Day 7 (4 April 2015) 星期六 (陰天、雨、落冰雹、落雪、太陽)

Liège(列日市比利時) > Clervaux, Luxembourg(盧森堡) > Vianden > Kichberg > Luxembourg(盧森堡)

行車里數 : 216km

今日嘅行程比較輕鬆，因為我哋嘅目的地係盧森堡，由呢個烈日市去盧森堡個幾鐘就可以直到，不過我哋會去下途經嘅城鎮到睇下嘢先去盧森堡市。呢間 Hostel 嘅早餐其實都幾款，不過我哋0830落到去都已經無咩嘢食，因為係無人 Refill D嘢食，我哋見到遲過我哋落來食嘢嘅人，淨係得麵包食咋。到我哋走個時先見到有人 Refill ，Hostel係咁上下，不過其實我哋都見到有唔少嘅家庭住呢一間嘅Hostel，可能呢個市難搵住宿都唔定。

尋晚其實唔係瞓得幾好，可能係凍，因為唔知點解瞓瞓下好似部暖油機好似係熄咗咁，咁呢一間 Hostel 又唔係有好多嘅被可以用，所以都幾凍。

我哋食完早餐係房到 Hea 咗一陣同埋要還原返D嘢，大概0930我哋先出發。今朝起身個時都已經見到出面落緊雨，到我哋出發個時都重落緊雨。之後一路上都重係落緊雨，行行下重落冰雹添，差不多去到盧森堡嘅時間重落埋雪添呀，不過我懷疑個GPS帶咗我哋行咗一段德國嘅路，因為個電話無神神有過咗境收到第二個國家嘅網絡嘅訊息。

今日我哋第一個景點係係Clervaux，呢個位於盧森堡嘅城鎮，特色就係城堡同教堂~~~不過我哋都係遠觀，無入到去睇，因為個時都重落緊雨。下一個景點就係Vianden，呢到有個好大嘅城堡，不過因為都重係落緊雨，我哋想兜個近D嘅位去睇，點知兜兜下去咗第二個地方，係遠距離睇呢個城堡，影完相我哋就繼續行程喇。行行下見到有個商場，諗住睇下有無嘢食，就入咗去睇下。呢個商場淨係得個好大嘅超市同埋飲咖啡嘅地方，無食店嘅，好在係唔洗俾錢泊車嘅啫，我哋重幫襯埋呢個商場嘅廁所添呀。之後就繼續向酒店出發，行行下見到有間麥當當同埋一間叫 Quick 嘅又係食包嘅食店，咁我哋就入去麥當當到食個Lunch先啦，叫咗兩個新款包食，味道都唔錯啦，重有就係D薯條都幾好食。其實係香港，基本上我係唔會食麥當當嘅，係去旅行無咩選擇之下先食架咋~~

食完我哋就繼續去酒店啦，我哋兩點幾到咗，搵咗個位停低咗，問咗個 Reception 佢話俾我知附近都有D免費嘅街位可以泊嘅。咁我哋又兜咗一個圈，但係免費嘅位就無晒，唯有兜返去停個個位，個位其實就係酒店對面。咁我哋停咗係到，買咗飛，要 EUR$2/hour，都幾貴 !! 不過1800之後就唔洗入錢，咁即係我哋要泊3個鐘先得。之後就 Checkin 啦，休息咗一陣，我哋就出去睇下盧森堡嘅景點啦。呢一間酒店其實都幾近D景點，10分鐘就可以行到去市中心。我哋去睇咗呢個大公府、聖母教堂、威廉二世廣場，重有環狀城壁，同埋維修中嘅市政廣場。重行咗一D買紀念品嘅舖頭，順便睇下有無咩可以食，不過就搵唔到啱心水嘅。

之後我哋就返去酒店到休息啦，今晚嘅晚餐係食杯麵，聽日我哋就會去德國到啦…不過都係一日啫~~~

住宿資料:

Name: Christophe Colomb

Address: 10, Rue d'Anvers 1130 Luxembourg Luxembourg

GPS: N 049° 36.201, E 06° 7.798

Tel.: +3524084141

Price: €99 (Double Room) + Parking €12

Remark: Free Wifi and breakfast included

住宿評語:

呢一間酒店睇個款應該係家庭式經營嘅，酒店房都幾乾淨。泊車佢哋可以有安排，但係就同間酒店都距離幾遠下，酒店街出面有錶位。酒店有提供 WiFi 同埋有埋早餐，早餐都唔錯。酒店位置距離市中心有10分鐘腳程，如果天氣好其實都無咩問題嘅~~~

早餐...未食晒前都幾多嘢揀