細佬....一路好走

其實係呢幾年，係復活節呢個假期，我哋都會去外遊，因為加埋D公眾假期可以放好多假。不過呢一次呢個假期，一路都未諗到去邊到旅行好，因為好多地方都去過，又想去D未去過嘅地方先。所以一路都無決定到，最後諗到一係去荷比盧，一係就係去希臘(其實希臘好耐好耐之前就想去，不過個一次因為佢哋國家經濟有問題，出現大型嘅罷工，所以就無去)。

但係踏入2014年，工作上面有D變動，好多嘢做，所以無咩時間。之後重點出現喇，就係我娘親係新年後跌親，入咗醫院，重要就唔知點解咩成因頭暈，開頭個幾星期直頭夠起唔到身。醫生話係糖尿病，問題係我娘親一路都有睇開醫生，係出事前幾個月有驗血，但係一齊都正常嘅。所以唔知點解出現糖尿病，之後又話鉀低(我係網上面搵過下，鉀低可能同個腎有關)，一連串嘅問題出現，但係都係唔知點解。不過最重要係跌親條腰骨，好在條腰無咩問題，不過可能撞親，要兩個星期後先郁得返。係呢個事件發生個時，好在有我細佬係屋企。其實我好耐之前已經搬咗出來住，屋企只係淨返我老豆、我娘親同細佬同住，早幾年我老豆走咗就淨係我娘親同細佬同住。今次好在我細佬係到，所以可以送我娘親去醫院。

今次想講嘅一路好走嘅人係我細佬，係我娘親出院後一日。我細佬唔知點解吊頸自殺....到呢一刻我其實都諗唔到點解，因為個日現場佢嘅女朋友在場...第一個聽到嘅版本係因為佢女朋友想自殺，所以佢由一齊自殺，最後佢女朋友係無事嘅。當日夜晚，收到我娘親夜晚十點打電話來話我細佬自殺，我聽到好震撼，點解會發生呢D事嘅.......???

之後我就去咗急症室，醫生同我講佢情況好危險，因為腦部嚴重缺氧，之前曾經無呼吸無心跳，急救後有返心跳，但係都係無呼吸，叫我做定心理準備。我個一刻其實無咩特別感覺，可能我哋兩個少接觸呱。只係諗到我娘親之後點算，無人睇住佢。

急救完一輪，最後送咗佢去深切治療部，因為佢重有心跳，而呼吸就由部機幫佢。期間醫生問我佢吊咗幾耐，其實我一D都唔知，警察問知唔知點解會吊，我都係唔知。最後都係由警員到知道大概嘅事發經過。

我細佬呢一生其實可能都唔係過得咁暢順，好多阻滯，工作唔如意。可能係性格問題，每份工都做唔到好長，之前重要欠卡數...女朋友有好多個，啱啱呢個應該拍咗唔夠一年。之前聽到話佢哋重要今年結婚，出咗事後，佢個女朋友重去排期結婚，可能佢覺得佢會醒返呱...

係呢段期間其實對家人都幾辛苦，因為好驚聽到電話，真係好驚，每次電話響都好怕話醫院打來，雖然知道佢其實醒返機會好微....工作上面又好忙好忙，我諗如果個人唔夠意志力可能會唔得，頂唔緊~~~

我娘親當然係想佢醒返啦，但係根據醫生所講佢腦部受到嘅創傷係非常之大，事發內兩日如果醒唔返醒返嘅機會基本上係零，之後就會出現一連串嘅身體問題，最後會因為器官出現問題而離開。過咗兩日佢都無醒返，我其實都做好心理準備~~~~不過由出事到佢走個一日，有成差不多成個月，醫生都覺得佢好勁，可以捱到咁耐，可能佢重係後生呱~~~出事後一個星期，我娘親都無去睇佢，一來係因為重未點行到，二來係因為怕去到見完佢就會走。去睇佢係因為醫生第一次要見屋企人話返佢個情況俾我哋知，叫我哋做好心理準備，因為話佢隨時走，個時係事發後一個星期到。之後我娘親就差不多日日都去睇佢，所以我都要日日去，因為要睇住我娘親。

期間其實我娘親又去求神庇佑，亦都搵過中醫幫佢按摩同用氣功幫佢，可能都有D功效所以佢先捱到咁耐~~~

之後有一日又見到佢個女朋友，同我講話我細佬係因為我老豆走咗之後好唔開心，所以就造咁嘅事~~~開頭我都信嘅，不過尋日睇完我細佬部手機，再加上之前佢話會做嘅嘢最後都無做到，我就覺得佢講大話。因為之前佢話會幫我細佬捧牌(一個人一生只可以捧兩次牌，因為得兩個父母)，其實覺得奇怪，又唔係老婆都肯~~不過佢想嘅我哋當然係順佢意啦，可能我細佬會好開心....不過最後佢都無做到，話我細佬出殯個日佢亞媽生日，咁妳講到妳亞媽生日我哋無理由叫妳來架嗎，所以叫佢唔好來，費時有沖撞~~~最後都係搵師傅幫我細佬攪掂....其實佢一開始話唔做，我哋都唔會怪佢，因為佢都係女朋友來啫~~~不過佢話做到最後先唔做就真係令人覺得唔係好得~~~唉~~不過算...總之問題解決到就唔洗理~~~

到咗尋日係我細佬出殯日，事情叫做攪掂晒，我可以幫佢做嘅已經做晒啦，希望來生會行返一條好嘅路啦。其實有屋企人過生，真係有好多嘢要攪，好在之前係 Blog 到識到一個人，佢從事呢一行，基本上所有嘢都係一條龍，唔似我老豆走個時，有好多嘢都係要屋企人親身去攪，分擔咗唔少嘅嘢~~~

其實家下重有個問題，就係我娘親家下變咗一個人住，無人睇住佢~~~所以都重有嘢要攪~~~
好彩嘅係佢係過咗我最繁忙嘅時間之後先走，都幫咗我唔少

不過，經過呢件事發覺如果真係有人想輕生，真係要諗下你身邊嘅人先好做，因為你嘅一個決定，會為身邊嘅人帶來好大嘅痛楚。

最後，都係要講一句~~~細佬，你一路好走啦~~~

呢一篇文章，基本上係雜亂無章，我諗到咩就打咩，有睇嘅人請見諒~~~