~~~活在當夏~~~: 2017 北歐自駕之旅 Day 1 28/10/2017 Sat

2017/12/09

2017 北歐自駕之旅 Day 1 28/10/2017 Sat - 窄窄哋嘅特色監獄旅舍

2017 北歐自駕之旅 Day 1 28/10/2017 Sat

HK > Stockholm > ICA Kvantum Väsby(大型) > STF Långholmen Hostel

今日第一嘅行程基本上搭飛機，我哋7點己到咗機場。Checkin完就去食個早餐先，呢幾次去旅行都係去太興到食，感覺好似比大家樂好食D。

呢一程機要坐成差不多11個半鐘先到，坐咗好多次廉航，今次坐返D正常航空公司。SAS航空公司第一次搭，D機位闊度又OK喎，唔頂腳!! 呢一程機有三餐食，都OK啦。

班機都幾準時都咗Stockholm，一踏出機艙~~嘩~~真係幾凍喎。過海關都係問咗我哋會幾時走，同埋會去邊就搞掂。出到去等攞行李都好快，去到離境大堂就要搵搭去租車公司嘅免費巴士啦，我哋要搭4號巴士(Parking bus Beta)。跟住D指示行，出到去搵到等咗一陣就有車。由機場去租車公司個到大概要10 分鐘到就到，呢一個站有幾間租車公司係到，有Avis, Hertz, Europcar and Budget，而Avis就係今次我哋嘅租車公司。

今次我哋就租咗 Volvo V70，未試過揸Volvo，諗住今次可以試添~~~搞手續方面都幾容易，不過就會係你信用卡到捚咗租車嘅費用同埋按金，跟住就俾條車匙你同埋話架車泊咗係邊，就叫你自己去攞車。係搞手續嘅時候，個職員話我哋租嘅時間比較長，所以就俾架大車俾我哋~~咦!!點解唔係Volvo來嘅，俾咗架 SEAT Alhambra我哋 !! 睇落去係架7人車來嘅，打開門有一陣新車味，行咗7千幾公里，真係好新下~~~架車都幾大下，我哋個兩個喼可以打平放落去都得!!

Set 好晒D嘢就出發，個時都差不多成4點啦，我哋第一站就係去超市買D嘢先! 之前已經搵咗幾間附近嘅超市資料，咁就入咗間ICA Kvantum Väsby (GPS : 59.518751, 17.913397)，大概15分鐘到就到咗。呢到除咗有超市之外，重有個商場係到，不過我哋就無去行到，因為諗住快D去酒店。我哋主要係買D水同埋聽朝嘅早餐，因為住宿個到就無頂到早餐嘅。行行見到有燒雞就買埋當係晚餐，因為今晚住個間酒店附近都應該唔係太多嘢食，同埋第一日搭完飛機會比較攰，加上聽日有長途車，所以就決定食燒雞喇! 其實去歐洲幾次，我哋都成日買呢D燒雞當晚餐，因為又平又好食!!諗住買兩個蘋果食下，嘩~~要成10蚊一個，放棄~~~係呢間超市入面，有好多糖果買，之前睇資料都見到話佢哋有好多糖果買，唔知係唔係天氣問題，即係少陽光，食多D甜嘢個人會開心D嘅呢..埋單原先諗住試下用信用卡，點知個職員睇一睇張咭好似覺得有D問題咁，於是我就話用Cash啦~~

買完嘢就去酒店，今晚我哋係住係一間由監獄改建而成嘅酒店，都幾特別。我哋1730到就到咗酒店，Book呢一間除咗覺得佢幾特別之外，就係佢有得免費泊車。呢個旅程係搵住宿個時，泊車真係一個幾大嘅問題，北歐好多嘢都係要俾錢，但係泊車就算你肯俾錢都未必有位，要泊街先得~~一落車~~嘩~~又大風又凍，五點半到個天就黑咗一半~~~

Checkin過程都幾順利，淨係問你咩名就得，Passport都唔洗睇。之後就要攞埋床單同埋毛巾，因為呢一間酒店其實係 Hostel ，不過之後發現原來佢哋有酒店個喎，但係想Book個時已經無晒房(奇怪嘅係，我哋去呢段期間應該係淡季，但係每一區嘅酒店房都好快Full晒)。

之後就去攞房，一開門~~~嘩~~~真係要唱返首”飛沙風中轉”，間房真係好細，我哋個兩個喼其實係無位放!!奇怪嘅係個廁所反而有三分一間房咁大，所以我哋D行李要放係床上面先開到。放好行李，我哋就食咗個晚餐先，之後就去睇下個廚房係邊，因為聽朝要煮早餐。其實呢一間Hostel 入面有間博物館，要睇當然係要俾入場費，但係住係到嘅住客就唔洗俾錢，不過我哋到嘅時候佢已經收咗工。

原先嘅計劃，聽日我哋都係會係Stockholm嘅，係可以睇到呢個博物館。不過因為係由丹麥去挪威個一程船得返一間船公司有，個時間重要係下午一點，原先會由丹麥嘅希茨海爾斯 Hirtshals搭船去克里斯蒂安桑 Kristiansand，再去Stavanger 住嘅。如果跟原先嘅計劃，咁就會成夜晚8~9點先到住宿，加上丹麥係個個時間淨係得哥本哈根 København有嘢睇，LegoLand又收咗檔，要出年3月先開返，所以就改變原有行程喇。

新行程下，我哋係唔會睇到呢個博物館。咁我哋就係Hostel到行下睇下有咩睇啦，呢間Hostel其實重有一間酒店嘅，不過就係另一邊，個一邊重有一間餐廳，Checkin時個職員都有同我哋介紹可以係個到食嘢，同埋可以訂埋聽日嘅早餐，不過我哋就話聽日要做走，所以就無訂到，行完返去沖涼瞓覺~~~聽日我哋要揸成六個幾鐘車去馬爾摩 Malmö !!

ICA Kvantum Väsby (3 hours free parking with p-sheet)

Dragonvägen 86, 194 70 Upplands Väsby, 瑞典

59.518751, 17.913397

住: STF Långholmen Hostel

Långholmsmuren 20, Södermalm, 11733 Stockholm, Sweden Tel. : +46 8 720 85 00

GPS: N 059° 19.271, E 18° 1.490 , 59.3211813279077, 18.0248348414898

太興早餐~~整返隻糯米雞食下先