~~~活在當夏~~~: 2017 北歐自駕之旅Day 3 30/10/2017 Monday

2017/12/09

2017 北歐自駕之旅Day 3 30/10/2017 Monday - 晴朗的一天

Malmo > 哥本哈根 Copenhagen Denmark Route

Cabinn City > 新嘉士伯美術館 Ny Carlsberg Glyptotek (途經) > 趣伏裡公園 Tivoli(途經) > 新港Nyhavn > 哥本哈根歌劇院 Operaen > Lunch@Copenhagen Street Food > 美人魚 Den Lille Havfrue > 吉菲昂噴泉 Gefionspringvandet > 阿馬林堡宮 Amalienborg > 腓特列教堂 Frederiks Kirke > 圓塔 Rundetaarn > Cabinn City > Dinner@Dalle Valle > Cabinn City

今日我哋就會過去丹麥嘅哥本哈根到玩一日，原先會係丹麥玩兩日，不過因為船期嘅關係就改變咗個行程喇。住酒店就唔洗自己煮早餐，呢一餐早餐係我哋係北歐之旅嘅第一次係酒店食嘅早餐，以歐洲來講都叫唔錯。食完我哋就上房執嘢出發去哥本哈根，去呢個哥本哈根可以搭汽車渡輪又或者行橋。不過呢條Øresund Bridge橋行一行就要EUR$50，即係成差不多港幣五舊。

我哋大概10點幾就到達咗今晚入住嘅酒店，呢一間酒店有得泊車，所以我哋就試下睇下可唔可以泊架車入去，然後就出去睇嘢。呢間酒店都幾好，可以俾我哋泊架車入去先。

泊好車我哋就出去睇嘢，其實間酒店同D景點都有一段嘅距離，不過都係10~15分鐘。我哋第一個景點就係睇呢個新港Nyhavn，今日天氣幾好，又有陽光，所以睇落去都幾靚，不過呢~~其實都重好凍下。但係D外國人呢都重係會坐係戶外到飲嘢，但係就著晒大褸咁囉。去呢個新港途中見到有個遊樂場趣伏裡公園 Tivoli，有D機動遊戲玩，不過佢就未開門~~

睇完呢個新港，我哋就去睇呢個歌劇院Copenhagen Opera House ，一路行就一路睇下有無嘢食。不過行去呢個歌劇院都幾遠下，歌劇院入面嘅嘢我哋就無咩興趣，所以就係遠距離影張相就算。順便睇下附近有咩嘢食，見到有個叫Copenhagen Street Food嘅地方，我哋開頭都無諗住會有咩嘢食。但係就不段見有人行去呢個Copenhagen Street Food，重以為佢哋係去呢個歌劇院添，睇下地圖應該係行唔到過去個喎。於是乎，我哋就行去呢個建築物到睇下。一入去，兩個世界。入面真係好似D街道咁，有唔同嘅食店係入面。入面有西式、日式、韓式、泰式同埋中式嘅嘢食，真係好多種類可以揀。

呢到睇落有D似酒吧街，最後我哋揀咗韓式同埋西式，西式係牛肉burger加薯條，因為見好多人買，所以就買。兩個都好食，個Burger D汁好惹味，所以好好食。

食飽我哋就行去呢個美人魚 Den Lille Havfrue到睇下，呢個位應該係哥本哈根嘅著名景點，所以有好多唔同國家嘅人係到，基本係多人到你係唔可以影唔到其他人。睇完我哋就行去睇呢個阿馬林堡宮 Amalienborg ，咁啱佢哋又係到換緊班，所以睇咗一陣。係呢個阿馬林堡宮就係腓特列教堂 Frederiks Kirke，我哋入咗去參觀下。

之後就行去睇呢個圓塔 Rundetaarn，呢個圓塔其實係可以行上去睇下呢個哥本哈根嘅市，不過團友話行咗成日已經無力再行上去。之後，我哋就係呢個市中心到睇下有無咩嘢食啦，係網上面見都有人食過一間叫Dalle Valle，係 all you can eat 來嘅。咁我哋就食呢個啦，時間尚早，我哋就返去酒店Checkin先。

呢一間酒店嘅房重細過日本嘅SuperHotel，攞完房坐咗一陣，我哋就出去食Dinner。

呢一間Dalle Valle嘅嘢食睇落都幾多下，不過就唔係好多都啱食，但係都OK嘅。食完就返酒店，呢間酒店嘅沖涼花灑裝咗係個天花頂到，係完全洗唔到個身，真係非常之差嘅設計。

聽日我哋就會返返去瑞典啦，車程大概3個幾4個鐘到~~~~

住:

Cabinn City Tel.: +45 33 46 16 16

Mitchellsgade 14 1568 Copenhagen Denmark

GPS: N 055° 40.228, E 12° 34.246 55.6704590276794, 12.5707626342773

Parking : Cabinn City (DKK$180)

食早餐嘅地方