~~~活在當夏~~~: 2017 北歐自駕之旅Day 9 5/11/2017 Sunday 不請自來的喵星人

2017/12/17

2017 北歐自駕之旅Day 9 5/11/2017 Sunday 不請自來的喵星人

貝根 Bergen > 松恩峽灣 Sognefjorden > 弗洛姆 Flåm (挪威縮影) Route

Fløyen Panorama > Tvindefossen > Flamsbana Museet > Stegastein Viewpoint > Laerdalstunnelen

今日我哋會去Flam，車程兩個幾鐘就會到，都幾近。今朝有酒店早餐食，之前搵住宿時，睇網上面嘅評語話呢一間酒店嘅早餐好得，就呢一個其中一個原因，所以就揀咗呢一間住。

我哋未夠7點就落咗去，佢哋真係7點先開始。一入到去，嘩~~~好多嘢食呀~~~淨係煙三文魚都有三款，麵包款式又多，重有其他嘅嘢食，都好正~~~~其實我哋可以係呢到慢慢嘆，不過我記錯咗泊車個到以為係每個鐘計，唔記得係以24小時計最多收NOR$250，所以我哋就唔係食咗好耐。不過其實全部想食嘅都食咗，但係早走咗又有一個好處，睇落去就知。呢一間酒店，係我哋成個北歐之旅，有酒店早餐食最好食嘅一間，如果大家會去 Bergen ，可以考慮住呢一間酒店。

食完早餐，我哋就上去執埋D嘢走人，停車場個到埋單可以用信用卡或者Cash都得，過程都好順利。我哋係離開呢個Bergen市之前就去咗山頂到走咗一轉，其實原本諗住尋日搭纜車上去架，不過尋日D天氣好差，基本上上到去咩都睇唔到，所以我哋就無上去。今日臨走前就揸車上去睇一睇，今朝天氣都OK，無雨落，有好多雲，重有少少陽光添。上去山頂條路其實係單程路，我哋都唔知其實可唔可以揸上去，不過我哋都係沿條路行。上到去山頂，啱啱好重有陽光，我哋架車就咁泊咗係個纜車站隔離。影影下相，見到一舊雨雲飄緊過來重要好大風，我哋就快快影完就走人。嘩~~之後就落好大雨，酒店個職員真係無講錯Bergen真係成日都落雨~~~

好，影完我哋就離開Bergen向 Flam出發，由Flam至Oslo呢一段路，有挪威縮影之稱，不過要座鐵路先會見到D風景。係挪威到揸車要小心影快相，因為佢哋都幾多影相位，不過佢哋會放一個警告牌係到話你知影快相，見到就要小心慢駛。

其實由Bergen去Flam呢一段路D風景都幾靚，不過無個藍天，如果唔係會好正。沿路我哋見到靚嘅景都有停低影下相，中途入咗次油添呀。我哋大概12點幾就到咗今日嘅住宿，都係試下有無得Checkin先，又係有房已經清潔咗，可以Checkin。呢間Flåm Marina & Apartments對住個湖，個景真係幾靚。我哋放好咗D行李就出去搵下有無嘢食，去個鐵路紀念館附近睇下有無嘢食，食店都有幾間，但係唔係好啱心水。Checkin個時個職員同我哋講話呢到間超市今日會下午4點就收工，因為今日係星期日~~~嘩~~我哋當然要去睇下有無嘢買先啦，呢一間超市唔係好大間，無咩嘢買，我哋買咗少少嘢就走人。諗住去睇呢個鐵路紀念館，點知閂咗門，問下個遊客中心佢答今日應該會開到4點。但係我哋去到間鐵路紀念館又閂咗門，之後又返去個遊客中心問，佢就話啱啱收到個訊息話個鐵路紀念館個職員病咗，所以今日全日都唔開~~~咁無辦法啦，我哋只有係外面睇下~~~最後我哋都係搵唔到嘢食，咁我哋唯有食誠實豆沙包啦~~~

跟住就去呢到嘅景點睇嘢，我哋去咗呢個觀景台Stegastein Viewpoint，呢一個位可以睇到呢到嘅峽灣，都幾靚，不過我哋覺得係上來呢個Viewpoint中途有個位重靚~~~之後就去呢個拉達爾公路隧道(Laerdalstunnelen)，呢個拉達爾公路隧道(Laerdalstunnelen)位於挪威西部，是世界上最長的公路隧道。洛達爾隧道位於挪威西部的洛達爾和艾於蘭之間，全長24.51公里。於1995年3月開始動工興建，2000年11月27日正式通車。整個工程項目共耗資約1億美元，由挪威國王哈拉爾五世為隧道正式剪綵通車。成段路會有三個點有藍色嘅燈光照住，話等D駕駛者無咁悶喎~~原來呢一段路，我哋聽日走嘅時候係可以途經架，早知今日就唔行啦。睇完，我哋又返去鐵路紀念館個邊睇下嘢，見到間鐵路紀念館入面有人係到睇緊嘢。咁我哋就行去睇下係咪可以入去，個時都未到3點，原來呢間鐵路紀念館又有開返喎~~~不過應該係3點就休息，所以就閂咗，睇來我哋都係睇唔到呢一間鐵路紀念館。

之後我哋就返去住宿到Hea下，因為呢一間Apartment真係幾正。我哋泊好車，行返去Apartment時，突然有隻喵星人係咁向住我哋行過來叫喎，我哋當然又招呼下佢啦。之後佢係咁跟住我哋行喎，最後重行埋入我哋間Apartment 添呀~~~佢好似好熟地頭咁，自己係屋入面行來行去，真係當咗係自己屋企咁。呢隻喵星人個身好乾淨應該係有人養，我哋開頭以為係呢一間Apartment嘅人養嘅添最後重坐咗係Sofa到瞓覺添~~

晚餐我哋就自己整來食，又餵下喵星人食呢個魷魚絲~~~喵星人成晚都係Sofa到瞓覺~~~我哋諗過放返佢出去，開咗門，但係佢無走到，所以我哋無叫佢走~~~

聽日我哋就落返去Oslo，會住兩日，可以慢慢玩~~~

Tvindefossen

5710 Skulestadmo, 挪威

60.726207, 6.486148

Flamsbana Museet(鐵路紀念館) 60.862594, 7.113588

觀景台Stegastein Viewpoint 60.908224, 7.212968

拉達爾公路隧道(Laerdalstunnelen)

住:

Flåm Marina & Apartments Tel.: +47 57 63 35 55

Flåm 5742 Flåm Norway

GPS: N 060° 51.638, E 07° 7.172 60.8606394414613, 7.1195375919342