2017 四國自駕之旅 (18) 28/4/2017 Day 12 (Fri)
住 : ベイリゾートホテル小豆島 (MC: 364 773 038*78)
四方指展望台 (MC: 758 049 097*67) (免費泊車) (免費泊車)
天使之路 (17:57) (エンジェルロード潮見表はこちらから) (免費泊車)
今日我哋又要早起身，因為要搭船入去小豆島，我哋之前係網上面Book咗今日入去嘅位。呢間東橫Inn嘅早餐都係一貫咁樣，好簡單。呢一間東橫Inn都幾多香港人住，因為我哋都聽到有幾枱人係講廣東話嘅~~~
我哋大概0830到到咗碼頭，不過都重未有得買飛。我哋架車原來係要揀未滿4m嘅車款，因為我Book個時係揀咗未滿3m嘅車款嘅，所以個價錢就貴返少少，我哋買咗呢個往復嘅飛，比續次續次買係平D嘅~~
泊好咗車，我哋係上左去船艙上面坐休息下。搭咗大概70分鐘嘅船程都咗小豆島，我哋第一個景點就係呢個中山千枚田喇。呢個中山千枚田，其實應該似係D梯田咁嘅景，不過我哋係呢中山千枚田個時，見都有個竹織嘅藝術品，不過呢就係封咗唔俾人入去睇嘅，當然我哋有去外圍到睇過下咁啦。 不過呢個位要係上面行落去，都要行成10分鐘架。
順路我哋就去咗呢個四方指展望台，呢個台可以望到小豆島嘅南面嘅海岸，但係北邊個一邊就望唔到。之後就跟住條路行去呢個寒霞溪，我哋首先去呢個寒霞溪山頂 ，呢個有個食嘢同埋買嘢嘅地方，其實都差不多係食嘢嘅時間，不過呢到得D麵食，所以我哋就無食到。影完相我哋就去呢個寒霞溪纜車紅雲亭站到，呢到應該有個站長係到，不過今日我哋唔見佢係到，行兩圈我哋就走人。係呢個站出面嘅樹，我哋居然見到有紅葉係到，唔知真係本身棵樹係咁，定係天氣嘅問題，不過我哋見到呢一棵樹同佢隔離嘅樹應該係同一種嘅樹，但係隔離個D係綠色嘅~~
咁之後我哋就去呢個小豆島橄欖公園，睇嘢順便食Lunch。呢到其實無咩嘢食好揀，不過我哋去到個時已經係差不多一點，所以我哋就食咗就算喇。呢到話D嘢食好多都係有橄欖油，不過我又見個Menu又喎。食完係呢到行咗一陣，就去玩扮魔女飛天喇。我哋要扮飛咁坐係支掃把到，所以就要不停咁跳，都玩得幾開心，重影咗好多相添。呢到都幾多人係到扮魔女飛天架，重遇到兩個香港人，呢兩個香港人我哋已經見過佢哋二次架喇，呢到又遇到佢哋。
之後我哋就去咗睇呢個天使之路，去個時諗住睇下漲水個時個樣，點知原來已經退咗好多水喇，成條路都見到!!嘩~~呢到好大風，真係頭髮都吹到亂晒， 我哋重行咗上去睇個個約束之丘展望台，上面重大風D~~我哋走個時又再見到個兩個香港人喎，一日見四次我哋都真係幾有緣~~
跟住我哋就去酒店Checkin，我哋個Plan有得免費浸呢個貸切風呂，我哋梗係要浸下啦，呢個貸切風呂係地下一間房望住個海，都幾正 !! 而個個大浴場就係頂樓，但就一般囉…
到咗晚飯時間，晚餐係Buffet形式，款式唔係好多，不過有小豆島嘅醃漬物食，反而呢一樣就好多款~~食完就返房休息，我哋間房可以望到日落，不過日落個時我哋去咗食嘢!!
早餐
搭船碼頭
船艙
竹織嘅藝術品
四方指展望台
小豆島橄欖公園
Lunch
小豆島橄欖公園風車
飛行中
飛行中
天使之路
ベイリゾートホテル小豆島
私人風呂
Dinner
一口氣睇左好多日,小豆島我都想去,風景好靚
回覆刪除小豆島幾正，好多特別嘅嘢睇，其實慢玩可以玩3日
刪除又可以揸埋架車入去