2017 四國自駕之旅 (10) 20/4/2017 Day 4 (Thu)
住 : いやしの温泉郷 (MC: 357 117 773*30)
今日我哋會去呢個祖谷個邊，車程其實都幾遠，諗住早D出發，最後都係9點幾先出發~~~呢一間東横INN嘅早餐都 ok 喎~~~
我哋第一站係去呢個道の駅「温泉の里神山」，呢到無咩特別嘢睇，我哋方便完就繼續行程。途經一個叫川井峠，有D櫻花睇下，不過都去到水尾。影完相我哋就繼續，大概11:30先到呢個二重藤橋，都成兩個幾鐘先到。不過，係呢到又見到有香港人喎，重有唔少嘅老外添。睇呢個二重藤橋係要俾入場費的。入落去條樓梯都有少少長，行返上來都幾係嘢~~~
我哋去到個時無咩人，所以可以周圍影相，呢到重有個野猿(人力吊車)係到，我哋都有玩，都幾過癮，不過玩完雙手會無晒力!!
玩完諗住係上面間嘢到食嘢，但係一個人都無~~~咁就搵附近嘅地方食啦，不過都要成半個鐘頭先到，個時已經係12:30到。途經一個地方有好多大布偶放咗出來，係呢個祖谷好多地方都會係咁樣，不過夜晚見到其實都幾驚下~~~順路我哋就去咗呢個落合集落展望所，係個山腰上面，但係就無咩特別嘢睇囉，之後就去搵間 Coffee Shop 食輕型 Lunch。
去到個間 Coffee Shop ，原來呢個位係打算聽日來睇嘅景點來嘅，咁我哋就順便睇埋喇。呢間Coffee Shop入面D嘢唔係好啱團友嘅口味，所以就要再搵下。原先又係諗住睇下有無免費位泊，不過都無嘅，最後我哋泊咗係かずら橋夢舞台對面嘅一個露天停車場，¥300任泊~~~
之後我哋就去咗呢個かずら橋夢舞台入面到食Lunch，呢到有好多班香港人係到。食完我哋就去睇呢個祖谷のかずら橋，原先以為係免費嘅添，重有我哋係人哋嘅出口到行咗入去，之後俾人用咪話唔可以~~條橋其實無咩特別，之前係東祖谷個一邊行過二重藤橋，所以就唔行囉，原來呢到嘅過橋費要成¥550架。呢到有條琵琶の淹，唔~~氣勢就唔係好勁~~~睇完我哋就去呢個小便小僧到睇下先，去到呢個位又有香港人見到，呢到其實可以周圍泊，不過宗旨係唔可以阻到人 !! 其實呢個小便小僧都幾難影相架，要就D位先影到~~~
影完就要去返今晚嘅住宿，都幾遠下，因為方便聽日玩呢個Monorail~~~揸咗差不多一個鐘先去到，間酒店好似無咩人住咁，我哋Checkin 完就去浸下溫泉，不過唔係好夠熱，睇來應該唔係天然溫泉。
浸完就返房休息下，之後就去食晚飯。今晚連埋我哋得兩枱客，唔怪得之浸溫泉個到無人啦~~~呢到嘅晚餐都OK啦，唔係好特別~~食完我哋就返去休息啦~~
二重かずら橋 (二重藤橋)(MC: 497 365 049*46)(P.167) (免費泊車)
東横INN嘅早餐都 ok 喎
二重藤橋
野猿
大布偶
Lunch@かずら橋夢舞台
琵琶の淹
小便小僧
いやしの温泉郷
有網友都係住個呢一間酒店，呢一間房呢~~~
溫泉
Dinner
沒有留言:
發佈留言
來到留返句說話先走啦...