麗江大研古城 > 黑龍潭公園(玉泉公園) > 束河古鎮 > 玉石市場 > 玉龍雪山 (3356m) > 大索道 > 玉龍雪山 (4506m) > 步行 > 玉龍雪山 (4680m) > 藍月谷 > 白水河 > 黑龍潭公園(玉泉公園) > 麗江大研古城
午餐 : 自備乾糧
晚餐 : 阿哩哩
今日我哋又係參加咗個本地一天遊嘅團，目的地係玉龍雪山。尋晚報團時個旅行職員重話要七點出發，好在最後都係八點十五分出發啫。我哋又係係附近個間小吃店到食早餐，因為之尋日食個一間真係唔係好得，又貴又少餸，所以都係呢一間最好食，個老板娘重認得我哋添呀，話我哋都係到玩咗好耐...
食完我哋就去個個集合點到等車，架車準時08:15出現。上車之後個導遊就同我哋介紹一輪，其實我哋都唔係幾聽得明佢講咩嘢，因為佢講得好快~~~之後就要收我哋張古城維護費嘅收據，因為入去呢個玉龍雪山都係要俾呢個維護費。呢個維護費，基本你就咁係大研古城入面睇嘢係唔需要買嘅，但係當你參觀景點嘅時間就要一併購買呢個維護費。每位多謝$80，其實都幾貴下，不過可以見到嘅係古城入面有免費乾淨嘅廁所，重有就係街道係幾乾淨嘅，重有有時係會有人係到巡邏囉，重有呢個維護費係包咗呢個黑龍潭公園嘅入場費架。
都係講返我哋嘅行程先，個導遊話如果我哋係呢個時去玉龍雪山嘅話，應該要排兩至三個鐘嘅隊先搭到吊車。所以佢就去咗其他嘅地方先，喔~~~~原來我哋呢個團係唔知去玉龍雪山個喎，我哋重以為淨係去雪山添~~~
第一個景點，就係呢個 黑龍潭公園啦~~~呢個公園其實係古城附近，我哋都諗住之後會來睇嘅。不過帶埋去又無咩所謂嘅，基本上導遊有導遊帶住其他團員去睇同講解，我有我哋影相~~~今日天氣好好，所以可以望到玉龍雪山，重有就係個倒影都好靚，所以我哋不停係到影相，呢個時間，基本上點影都會好靚~~~~真係好靚....
之後就去另外一個景點，束河古鎮 !! 吓!!!.我哋都諗住去個喎，咁我哋之後個幾日可以去邊呀 !! 不過我哋都係係咁行一個圈，導遊就會講解下呢個古鎮嘅歷史，不過我哋都無聽到，又係係到影相，導遊帶咗我哋去行嘅地方都唔係主要嘅地點，所以我哋係可以再來嘅~~~嘻嘻~~~
睇完呢個束河古鎮，下一個景點就係去呢個玉石市場，重要係一個鐘添~~~我哋入到門口睇一睇就走人啦，之後就係出面搵咗個地方坐低休息~~
好啦...一個鐘好快就過咗，我哋就向呢個玉龍雪山出發，不過又要去另一個地點，因為有團友要咗呢個氧氣樽同埋羽絨，咁就成車人都去啦。有部份人應該都係無買到嘅，去到都買咗氧氣樽。我哋呢...已經自備咗啦~~~~
架車去到入口嘅時間又要停一停，因為原來同團有幾個係學生，所以門票應該係半價嘅~~~Check個個人都Check 得幾認真架，又對學生証又對身分證...好喇，終於可以入去啦。落車個位重要行入去搭車去大索道嘅位，我哋個同行一時不慎，跳唔上一個壆撞親上五吋下五吋....好痛
之後入咗去排除搭車去大索道，呢到都排咗成45分鐘，不過有好多人打尖，唉~~~內地人真係無辦法~~~搭完車落車又要排隊搭吊車，呢到又排咗成二十分鐘到。好啦，終於上吊車啦~~~我哋會係10分鐘之內由呢個3356米去到4506米，其實坐係到係無問題嘅。不過一落車行兩行就真係會來料，行兩行就無氣，即刻攞支氧氣出來嗦幾嘢先，嗦完又真係幾爽個喎，即刻成個人腳步輕快咗，不過個無耐，腳步又重返~~
出咗吊車個位，就同碌柱影下相先，我哋去到呢個 4506 米高啦。個到重有一段路行先會上到最高點，係呢到影下相，慢慢行~~~~之後就行上去呢個高點 (4680米) ，嘩~~真係行一行就要休息一陣，重要嗦下氧添~~~行到一半，有一個友人真係唔係好行到，所以就叫另外兩個友人行上去先~~~到最後個一個友人都係行唔到上去，咁我就自己行上去啦，嗦一嗦就即行，用咗好短嘅時間就上到頂。另外兩個友人就已經上到去，重係到影相添~~我都快快影完相就落返去會合返另外一個友人，個支氣見都上到頂就得閒嗦下先~~~呢個 4680 米，我都唔記得係咪我現時去嘅最高點~~
睇完呢個就搭返吊車落去集合，係搭吊車個個位個到有一間快餐店，導遊就話係呢我哋可以食D嘢先。咁我哋就食埋帶上來嘅乾糧啦，順便休息下~~之後就搭返車落去第二個景點，就係呢個藍月灣。
藍月灣附近有埋白水台，一落到車友人們就話要坐電瓶車，唔行喎，因為頭先上山頂好辛苦~~~不過聽客棧個主人講其實係唔洗買嘅，因為係好近~~~不過無計啦~~~我哋去到呢個藍月灣個時個天色唔係咁靚，所以呢呢兩個位就唔係太靚 !! 睇完就係集合點集合等車返去停車場，原來真係唔洗搭呢個電瓶車架，因為落車個位行一陣就到個兩個影相位，電瓶車車去個另外兩個位，其實唔去都無咩問題~~~
好喇，睇完就車返我哋去黑龍潭公園到，途中個導遊講咗好多呢個麗江古城入面商店嘅嘢同埋參加旅行團嘅合理收費，又介紹邊一間耗牛乾好食...不過我哋都係聽到一DD咋，因為佢真係講得好鬼快。
我哋係黑龍潭公園落車，又入去影下相，不過就無今朝咁靚喇，影幾張就走人。然後我哋就行返去古城，呢到行去其實都係20分鐘路程到~~
返到古誠我哋就順便食埋呢個晚餐先返去客棧，今次食呢個阿哩哩，味道都OK喇，不過雖然叫咗佢唔好辣，但係好多嘢都係辣嘅....
沒有留言:
發佈留言
來到留返句說話先走啦...