麗江大研古城 > 拉市海遊船河茶馬古道騎馬一天遊 > 麗江大研古城
午餐 : 不知名團餐食雞煱
晚餐 : 阿媽意
今日我哋會參加咗一個 Local Tour 去呢個拉市海遊船河茶馬古道騎馬一天遊，我哋係經我哋住個到報嘅。其實呢個拉市海一天遊出面有好多間旅行社都有做，價錢就大部份都係 $60-80 ，不過呢個價格係要去一個消費點嘅，我哋報呢個就係 $150，就唔洗去呢個消費點嘅，包接送、午餐、騎馬同埋遊船河。$150包咁多嘢，咁之後個司機咪食水好深......
諗住去返附近個一間食店到食返個早餐，點知佢今日無開，咁我哋就去另外一間啦。點知呢一間嘢唔係唔好食，只係個排骨米線，得兩粒好細嘅骨，土雞米線就得兩件雞皮多過肉嘅雞，好在個餃子好食，不過就唔平囉....每一個要$15
食完嘢就返去客棧等出發，我哋早上9點鐘係客棧到出發，去呢個拉市海原來都要成個鐘，途中經過有好多間嘅騎馬嘅地方，原來有咁多間做呢一個騎馬團嘅~~~
去到首先就有一個人講解一下呢個行程路線，嘩~~個收費同個日個司機帶我哋去個價差不多 !! 但係最後就話我哋個個係優惠價，所以就咁平，就唔好同其他人講...之後就買入場費，然後就會問你買唔買鞋套。呢個鞋套對之後嘅行程非常重要，因為之後我哋行嘅路全部都係泥路來嘅，所以$10我哋都要俾~~~
我哋去到個時咁啱無晒馬仔，於是佢就安排我哋去遊船河先。去遊船河個地點都要成十幾分鐘車程，之後見到其他人係騎馬入去嘅，我諗可能有馬嘅就會騎埋入去都唔定~~
落車又要行一段路，好在買咗鞋套啫，因為條路成條都係泥，無咗個鞋套一定會成腳泥，連鞋都唔洗要~~~
呢個遊船河就係有個人載你出去遊呢個拉市海一個圈，呢個拉市海，如果好天的話影相會好靚。不過我哋去個時就有好多雲，但係都OK嘅~~~遊完船河就車我哋返去集合個地方，個時都十二點幾啦，佢哋夠膽死叫我哋去騎馬喎，騎一騎最少都個幾鐘啦。咪成三點先食嘢，重要係十二點，好曬架嗎 !! 咁我哋當然係話唔得啦，之後就車咗我哋去食嘢啦。呢個午餐其實都幾簡單，係一個雞鍋加一碟菜，鍋入面嘅豆腐同菇係可以無限任添嘅。呢個餐其實都OK，唔會肚餓。食完無耐就叫我哋去騎馬啦，重諗住會車我哋返去呢個集合點添~~~
騎馬所行嘅路就話係呢個茶馬古道，其實都唔知係唔係，因為都係山路一條。不過係呢個烈日當空嘅情況下，咩路都唔理嘅喇~~~之後就會去到一個地方停低，要行入去，話有一個瀑布睇，流落來嘅水係由玉龍雪山流出來個喎~~~嘩~~~行去個段路仔真係成條都係泥路來架，如果唔係有個鞋套對鞋應該係 Total Lost....行咗差不多成15-20分鐘路程入到去，見到一個唔係好大嘅瀑布，影完相就走人。出到去以為無泥路要行，咪除個鞋套囉，不過個鞋套都已經濕咗好多，除出來對鞋都幾哪喳...
點知係回程嘅路行咗另外一條好崎嶇嘅道路，重要係好多泥水，隻馬仔行到彈晒泥水上來，攪到褲腳同埋鞋都好污垢....呢個活動大概玩到三點幾先返到集合點~~之後車返我哋去客棧都差不多四點半，返到去第一時間就係要洗鞋~~~
洗完鞋休息一陣就出去食晚餐同埋搵下有無D玉龍雪山一日團報，我哋住嘅客棧都有，不過就要$580包食、所有門票同埋車。我哋係出去個時問過幾間，原來有D係可以唔要呢個氧氣樽同埋羽絨衫嘅，因為我哋呢兩樣都有，可以$450就得~~~不過呢個$450就唔包電瓶車，客棧個到都係唔包....其實去完之後覺得真係唔洗坐電瓶車，因為落車行一陣就到~~~但係個一刻因為個個都好攰，上完玉龍雪山，佢哋都無諗就要啦~~~
最後報咗$450個個一團，重要簽約添架...都幾認真個喎。點解咁快急報，因為見到天氣預測話聽日都好好天，不過之後個幾日就會好多雲...
係報團之前就去食咗個晚餐，然後報完名就返酒店休息，因為旅行社個個人話七點就出發~~~最後係八點幾先出發嘅..
沒有留言:
發佈留言
來到留返句說話先走啦...