2013 西班牙葡萄牙自駕之旅 遊後感

開頭去呢個西班牙葡萄牙旅遊都有D驚，因為話治安唔好，不過最後我哋都無事發生。不過西班牙嘅住宿費都幾貴，可能係我哋住Apartment嘅關係呱，不過我睇過D酒店都唔係平得好多。泊車又係一個貴嘅地方，呢個係我呢一刻去咁多個國家最貴嘅一個，交通費其實都唔平得去邊。食方面，我哋食咗好多餐Buffet，價錢又幾好喎，因為食一個 Tapas都成兩三歐一個，食個Buffet 到係十歐到，所以唔係太貴~~至於景點呢，好多都係教堂、廣場同皇宮，睇得多都有D悶，我哋都係鍾意睇風景多D。重有就係基本上全部嘅景點都係要俾入場費嘅，尤其係巴塞隆納高第嘅景點，如果全部高第嘅都要入嘅話，要成差不多成兩千幾港幣埋單。

最後，就係揸車嘅嘢，呢兩個國家D路都幾好揸，同埋西班牙就無Speed Check嘅，反而葡萄牙就有喎。西班牙好多地方都有錶位，不過係D大城市好似馬德里同巴塞隆納到就會有D係專俾當地居民用(綠色泊車位)，任何人都可以用(藍色泊車位)。重有就係除咗係D大城市唔鼓勵泊車係景點到之後(因為應該好貴)，其他嘅城市係景點附近都會有停車場。

至於路費方面我就唔係好知，不過應該都唔平，如果唔係我都行咗啦，不過如果時間唔多嘅，就行收費道路會快D，特別係係葡萄牙。但係要注意，葡萄牙有部份收費路段係用電子收費，俾錢方法都幾麻煩，就係因為咁我都無用，因為唔知邊一段路會有電子收費系統~~入油就無問題啦，周圍都係油站。

重有一個要注意嘅就係佢哋嘅休息時間，佢哋基本上每日嘅1400-1700都會休息，星期六可能得半日，星期日重要全日休息。如果有嘢買或者有食店要去食嘢的話，就check清楚佢哋個營業時間啦~~