2013 西班牙葡萄牙自駕之旅 Day 13 (2) Zaragoza 西班牙第一次出夜街~~

埋單之後就去睇埋其他嘅景點先，路過El Corte Inglés百貨公司，睇落去應該係無Food Court嘅。行行下就到咗呢到嘅西班牙廣場，本來想去睇呢個呢間Museo del Teatro de Caesaraugusta 劇場，呢一個係一個舊時劇場嘅遺跡來嘅，不過我哋搵唔到喎，之後睇返原來係係食Buffet附近嘅~~~

咁我哋就去睇下呢個Plaza de Toros de Zaragoza 鬥牛場先，我哋都係係外邊到影下相嘅啫。

Plaza de Toros de Merced is a bullring in Zaragoza, Spain. It is currently used for bull fighting. The stadium holds 10,072 spectators. It was opened in 1917.

之後就去埋睇下呢到嘅皇宮，不過我哋行行下好似覺得唔對路，所以就問下人點去，當地人都幾熱心，講下好詳細點樣行去~~

去到呢個皇宮呢~~點講呢，唔覺得佢係皇宮，附近有D好似石硤尾公屋嘅樓宇係到，個皇宮又係到裝修緊(話時話，10月11月唔知係唔係呢個景點裝修期呢，我哋呢段時間去親睇嘢好多都係裝修緊架，可能係淡季呱)，睇埋呢個，係Zaragoza要睇嘅嘢就睇晒喇。

之後我哋就沿河邊行返去住宿到休息下，今日無食晚餐，可能係Lunch個時食得幾多嘢下，所以就唔肚餓~~大概六點幾到，天黑咗，我哋決定出去影下教堂嘅夜景相，原來夜晚都真係幾靚架喎~~影完相行返去住宿個時見到有一間食日式嘢嘅Buffet餐廳係我哋住宿附近喎~~不過我哋都唔餓同埋佢要八點先開門，我哋應該唔會試啦~~聽日又要早起身出發，酒店包早餐，不過原先係話朝早8點先有得食嘅，我哋Checkin個時本來想叫佢扣返呢個早餐錢，我哋話要6點鐘走人，點知佢哋話無問題喎~~