2013 西班牙葡萄牙自駕之旅 Day 4 (2) Sevilla 我哋迷路了，沖沖下涼忽然無咗電 (好驚囉)

Day 4 29/10/2013

Granada > Cordoba > Sevilla

行走里數 : 345km

Sevilla

參觀了的景點 :

都市陽傘 Espacio Metropol Parasol、塞維爾市政廳 Ayuntamiento de Sevilla、塞維爾大教堂(Catedral de Sevilla y La Giralda) (或稱希拉達塔(La Giralda)、阿卡乍堡(Reales Alcazares)、阿卡乍堡入口─獅子門(Puetra del Leon)、狩獵中庭(Patio de la Monteria)、仕女中庭(Patio de las Doncellas)、黃金之塔(Torre del Oro)、西班牙廣場(Plaza de España)

食完嘢我哋就驅車去 Sevilla ，要揸成兩個幾鐘。去到我哋就首先去攞房先，呢到好似一個迷宮，兜來兜去到係個個位。事緣咁啱我哋去個間住宿有一條路整路，所以封咗，個GPS不停咁要兜返去行呢條路，我同 GPS好熟架，佢想點我唔知咩，所以最後我都無跟佢指示行。去到一個有得停車位，我就行去睇下點行先得。最後都俾我哋去到，不過兜一圈要成十幾分鐘先返到來，因為佢哋嘅路好多都係單程嘅。去到住宿個到，按極門鐘都無人應，好在等咗一陣終於有人出現。

呢一間住宿我哋會住兩日，不過入面嘅裝置就無咁靚仔，原先就諗住 Book 另外一間嘅，不過個一間無得係住宿到用 Wifi ，只可以係大堂到用，所以最終都係揀呢一間。同個負責人攪好晒D手續，然後就去泊車，呢間住宿有地下停車場，不過入口都真係幾窄同埋條路有好斜。經過第二朝個教訓，都係要慢慢入去會安全D，都唔知點解架車個底咁低嘅，好小心咁入到去泊好車，然後上房放好晒D嘢就出去睇嘢啦。

係住宿附近其實都有D食店同埋有間超市，都幾多嘢買。係最近嘅一個景點就係睇呢個都市陽傘 Espacio Metropol Parasol嘅景點，尋日係電視到見到無線有個旅行特輯”三個小生去旅行”都有去睇呢個景點，不過唔知點解佢哋可以行上去睇，可能其實係可以，不過我哋就無入到去睇。

都市陽傘（Metropol Parasol）俗稱道成肉身廣場的蘑菇（Las Setas de la Encarnación），是西班牙塞維亞的一座木建築，位於舊城的道成肉身廣場（La Encarnación），由德國建築師于爾根·邁耶-赫爾曼設計，2011年4月建成。它有150米乘70米，高約26米，號稱世界最大的木建築。

都市陽傘共有四層。地下為Antiquarium，展出在此發現的羅馬和摩爾遺址。一樓為中央市場。 二樓和三樓為全景露台和餐廳，可供觀賞市中心景色。

睇返D資料，原來真係可以上去架….之後我哋就行去睇呢區嘅大教堂，係D大教堂附近重會有D馬車係到嘅~~

影完相我哋就去搵食，順便去探路，因為係網上面有人去個一間叫La Carboneria 酒吧，只要買嘢飲就可以有得睇呢個免費嘅佛朗明哥舞表演。原來由大教堂行去間酒吧都幾遠下，去到確認咗個位置，然後就返去住宿附近，原來由住宿去呢個地點都要半個鐘。之後就去到住宿附近嘅超市到買嘢整來今晚食。食完嘢就上網搵下呢個佛朗明哥舞表演，開頭見到D資料話2200就會開始佛朗明哥舞表演，點知再睇多D資料話原來係要成2300到先開始，咁睇完咪成12點幾成點先返到來，同埋呢間酒吧離我哋住宿其實都幾遠，所以最後我哋都係無去到睇呢個Show。

咁唔出去，就去沖涼啦，見有洗衣機就洗下D衫褲啦，又見有少少凍就開埋暖氣。點知沖沖下涼突然電掣跳掣喎，嘩~~失驚無神攪D咁嘅嘢呀大佬，我重係淋濕咗無著衫個喎，重要好似拍戲咁，淋濕咗個頭，搽咗洗頭水，突然無電(啦~你唔好係到笑呀!!)~~~衫係咪要考驗我求生本能呢 ? 又來一個考驗 ~~

好在嘅係呢一個係儲水式熱水爐，重有熱水可以沖涼，個一刻我就當洗頭水入眼，合埋眼沖乾淨D洗頭水先。再行出去，好在平時去旅行都有帶電筒啫，即刻攞出來先。個一刻諗點攪呢?個頭洗濕咗，涼又未沖完，唔通要著返衫出去搵負責人(其實負責人都係住埋係同我哋一層，重要係一個靚女來架)。再諗諗，個電掣有機會係屋入面，咪周圍照下囉，好在!!個總掣係門口附近，即刻開返個總掣，但係過一陣有跳過喎。於是就諗可能係 overloading，咁就熄咗個暖氣，教細個熱水爐，熄埋部洗衣機。再開過，終於維持到可以沖埋個涼都無跳掣。後來我又開返個暖氣同埋洗衣機，但係都無跳，睇來應該係熱水爐問題~~~