2012 捷克、奧地利、匈牙利自駕之旅 (25) - Day 13 Brno > Kutna Hora > Telc

Day 13 Brno > Kutna Hora > Telc

睇完呢個聖母瑪利亞教堂，我哋就去睇另外一個教堂，即係係 Kutna Hora 嘅最後一個景點啦，聖芭芭拉大教堂，由骨教堂去聖芭芭拉大教堂係要揸車去嘅，因為聖芭芭拉大教堂係係另外嘅一面，車程就係10分鐘內就會到。去到呢個聖芭芭拉大教堂，我哋就泊架車係門口到，因為咁啱有個車位係到，又係免費嘅~~呢個聖芭芭拉大教堂嘅外型都幾靚仔，佢嘅建築風格係代表晚期哥特式建築風格的一顆璀璨明珠，所以就真係幾特別，入面D玻璃窗真係幾靚仔，好特別。但係其實好快就會睇完，我哋睇完都差不多成12點，唔洗1個鐘睇晒。咁就搵下附近有咩食啦，今次我哋又係用GPS入面嘅function去搵嘢食，Search到附近有間 Peking Restaurant，於是我哋就去呢一間食店到開飯啦~~唔洗幾分鐘就到，落車睇過下應該都OK。於是就搵位泊車喇，呢到就無免費泊車，要泊錶位~~睇下個錶唔係幾識，咁啱有幾個本地人係到，我就請教佢哋點用啦~~最少要入 10Kc就有得，但係我得個20Kc，佢哋就幫我入咗去，結果係可以泊90分鐘嘅，入10Kc就有1個鐘~~其實入10Kc就得，不過算啦~~

今餐我哋叫咗個酸辣湯走辣，魷魚飯同埋一個炒飯，味道又真係唔錯喎，埋單都係 188Kc，唔洗HK$90~~食完嘢，我哋就去我哋今晚住宿嘅地方 Telc 出發，由 Kutna Hora 去 Telc 大約要2個鐘到~我哋大約2點鐘到就到咗 Telc ，今晚我哋會住係市中心嘅屋仔到，呢間Apartment, Privat No. 40又幾容易搵。係 Telc 市中心泊車係要有Permit 先得，我哋先前就問過下呢到嘅館主係無問題嘅，因為佢會幫我哋攪掂~~

我哋去到好快就搵到呢間Apartment，因為先前google過，之後就搵個館主啦。最主要係問佢架車點攪啫，館主講咗一大輪嘢我都唔次佢講咩，因為佢唔係講英文，可能係捷克話都唔定~~不過佢應該知我講咩，佢噏完一大輪嘢之後就示意我泊架車係邊，個個位有車泊緊嘅，架車就係館主嘅，所以佢就將自己架車泊入去間屋到。原來架車可以揸入去泊，早知我就揸入去啦，唔洗搬行李呀嗎 !

之後館主就帶我哋入去睇下今晚我哋住個間 Apartment，呢間屋有兩層再加埋個後花園，都幾大下。我哋住個間Apartment都有成4~500呎到，其實都幾大。入面間廚房D設備又係好齊全，咩都有!!

安頓好D嘢之後，我哋就出去行下呢個Telc市喇。出到去，個天色唔係幾好，開始有黑雲~~個噴水池重要封埋添，不過都唔係一個地方係咁，今次我哋去咗幾個地方都係個噴水池封埋，可能唔俾D雪跌落去呱。係Telc最特別嘅就係係市中心嘅屋，一排咁樣，重要間間都好有特色架~~如果好天的話，影出來會好靚架~~不過我哋去到個時個天氣就唔係咁好啦，之後就去睇埋市中心其他嘅嘢，其實都無咩特別嘢睇。係睇嘢之餘，我哋就順便搵下有咩嘢食，係網上面有人話呢到有間餐廳食Pizza好正~~好近我哋住個到，除咗呢一間，重有間老兵餐廳。搵到呢兩間餐廳之後就去超市到睇下有咩嘢食買，因為聽朝嘅早餐係要自己整嘅~~

係呢個Telc有幾間小型嘅超市，基本上嘅生活必須品都有得買，煮食嘅嘢都有但係唔多。不過，我哋一路行搵超市同食店嘅時候，見到有個牌寫咗一間超市嘅名，呢一間超市應該會幾大間~~不過我哋行咗幾間超市之後都未搵到呢間超市，可能要行好遠都唔定~~咁我哋就買咗D腸仔、一支汽水同埋杯Yogurt就返去Apartment到休息啦，因為諗住今晚就去食Pizza~~

返到Apartment Hae 咗一陣之後諗諗下，我哋買咗支汽水，如果唔係自己煮嘢食的話，咁咪飲唔到囉，於是就出去超市到買D嘢返來自己煮，今次就行去頭先搵唔到個間，嘩~~呢一間好大，有好多嘢買，重要有燒雞買添呀~~買咗D雞翼同青瓜，再加埋先前買嘅意粉就係今晚嘅晚餐啦~~

食完嘢休息下就沖涼瞓覺，聽日就會直接上去布拉格，而我哋嘅旅程又進入倒數嘅階段啦~~