2012 捷克、奧地利、匈牙利自駕之旅 (19) - Day 10 (3 Nov 2012) Vienna > Budapest (Hungary)

Day 10 Vienna
> Budapest ( Hungary ) 3 Nov 2012

 

 

食完嘢，我哋就去睇條Chain Bridge 鏈橋，不過今日好大霧，個View唔係好靚，影咗一陣相我哋就走人返去Apartment到Checkin先。係返去Apartment個時我哋途經瓦西大街，個幾條街都幾多嘢睇同埋有好多嘢買，之後又行經Deak Ferenc ter個邊就重熱鬧，重有好多嘢食都幾特別 ! 呢間Apartment都幾大間，我諗應該有成千呎都有，佢分咗房、廚房連飯廳，重有就係客廳同埋睡房，當然重有就係廁所啦。個廁所入面重要有部洗衣機，正，我哋可以洗下衫先 !!

Checkin完係到Hae咗一陣我哋又出去 Chain Bridge到影下相，然後就去咗中央市場到睇嘢，點知~~噢~~閂咗門喎，星期六只開到14:00，星期日重要係全日都唔開添~~吓，咁我哋咪睇唔到囉 !! 之後就行去搭Metro點知有一個入口封咗，我哋就以為成個站都封咗，因為搵唔到D指示牌，第二日先知，其實係Budapest差不多所有嘅地下隧道都係Metro嘅入口來架…咁，我哋以為封咗就要行路返去Apartment到啦，不過都係一個站啫。我哋行返去個時途經一條街，呢一條街有好多食店同埋酒吧，重有一間中國菜館，價錢都唔係好貴咋喎 !!

一路行，行下行下就好快返到去我哋Apartment個個站，咁我哋就去個商場入面嘅Food Court到睇下有咩食先。呢個Food Court都有幾多嘢食，中國菜有2間，土耳其菜有一間，重有D西式嘢。睇完我哋就落去超市到睇睇先，睇下有無咩買~~整嘢食嘅嘢就唔係好多，但係就有好多Cake買喎，我哋見有一件係係斯洛文尼亞Beld出名嘅Cake – Kremes~~只係 HUF$99，即係大約HK$3.5一件咋，咁抵我哋當然係買來食啦~~係超市睇咗一輪都無咩心水，於是就去Food Court到食喇，重有買咗支Cherry味嘅汽水。最後，我哋係揀咗食中國菜嘅，叫咗一個豬扒湯麵再加個應該係洋蔥炒豬肉套餐，呢個餐係包埋個酸辣湯嘅，我哋就另外叫咗個芝麻雞，再加埋係超市買嘅Cake同埋汽水，嘩~~呢一餐食到好飽呢…

食完嘢，我哋就去超市到買埋聽朝嘅早餐，呢一間Apartment係無早餐食嘅，之後就返去Apartment 到休息同埋洗衫啦~~

Chain Bridge

都係天陰陰咁

街邊小食，個大嬸整緊個兜好似係糖水..

地面電車

亞敵克廣場

有街邊表演

又係蛋卷

有腸仔食

重又其他記念品買

又有嘢食，夾包..

呢個好似係Pizza咁嘅嘢，好多人排隊

Apartment