2010 土耳其自駕之旅 (24) Day 3 - 往Bergama驚險的路段

2010 土耳其自駕之旅 

Day 3 23/10/2010 Day 3

往Bergama驚險的路段

Çanakkale > Truva Arkeolojik Kenti (特洛伊遺跡)(Truva) > Lunch@Edremit > Bergama > Bergama Akropolis (衛城)(Bergama) > Kizil Avlu (紅色教堂) > Izmir >
Residence Comfort Izmir @ Izmir

呢一段我估計係我哋行個一段路，因為基本上一離開Edremit無耐就行山路 

搵Google Map 睇多次，如果係行海邊嘅Express Road，路程上同埋時間上計算應該會多過行山路，所以亞 GPS 就點咗我哋行山路.... 

食完嘢，我哋係個Shopping Center個超市都行咗一陣就出發去Bergama啦，途經一個油站就入埋油先。諗住個GPS話兩個鐘唔洗就到Bergama，應該好快就到!!點知個 GPS 又帶我哋行咗一段無人無車嘅路，一路行咗好多都係荒山野嶺，行行下重要係玩飄移添，即係基本上個GPS係唔係一條路上面行緊~~~重要係揸極個GPS到達時間都無減過咁，咁我哋唯有見路有行喇，其實我有諗過好唔好揸返轉頭架，但係行咗成個幾兩個鐘，無理由兜返轉頭架!!

之後行行下去到一個小村莊，咁啱有架泥頭車係到落嘢塞住咗條路喎，佢又唔肯郁架車喎。叫我哋兜條路去喎，嘩~~呢一兜路一兜兜咗成45分鐘路，其實呢一段如果佢哋可以倒車，只係一分鐘路程咋。佢哋唔肯郁，我哋唯有行第二條路。呢一段路，照我哋睇應該係當地居民係附近嘅森林到斬完D樹林運返去用嘅，我哋見到條路有D好大嘅車轆痕跡，我諗佢個轆應該有最少2米高個種，唔怪之得佢哋可以行呢D路啦~~~~
嘩~~呢一段其實根本就唔可以行私家車，成段路又爛又多石，重要凹凸不平，架車撞咗好多次底，重有部份路段好似玩Rally車個D咁，成條路都係泥，行咗落去隨時都會俾D泥食住條軚。我哋幾驚行呢一段路出唔返來，如果係就大鍋，因為呢一段路基本上就係係個山入面，所以我哋又係行得好慢，一見條路唔係好得，就落車睇下先揸架車行。試過不停落車搵D石搵來填D窿架喇，因為D窿真係好大過，如果就咁揸過去，好肯定架車會落咗去個窿到~~~個時就麻煩啦~~~當時都無影到條路D相，因為根本就無心情去影，只係想快D行完，行咗大約45分鐘之後，就兜到返去頭先個架車塞咗個個位置~~~真係無陰公，攪我哋行咗咁多冤枉路，好在我哋真係有驚無險啫。

之後我哋繼續前進啦，跟住無神神改道喎，行個條路個GPS好似無資料，根住GPS行行下又玩飄移喎，行緊條路完全係無資料，攪到我哋係到兜來兜去喎。咁我哋唯有停係到諗下點行先，唔知向前行呀，定係向返後行~~~又唔知自己係邊到，成條路一架車都唔見喎。好在咁啱有架車經過，成架車得個小朋友可以同我哋溝通，佢識講英文，不過我哋好在有張地圖，溝通唔到都可以用身體語言攪掂 !!
原來佢哋都係會去Bergama個邊個方向，叫我哋跟住佢哋行，佢哋行行下就揮手叫我哋跟住，真係好好人呀~~~行咗大約20分鐘到，個GPS就歸位啦，又出返條路啦~~~不過我哋都係繼續跟住個架土耳其人架車行，佢哋原來唔係去Bergama，只係會去個個方向行，當佢哋到咗佢哋個目的地之後就落車指住前面叫我哋繼續向前行，我哋當然係要揮手多謝佢哋啦~~~

行咗好耐先見到有個城鎮仔...諗住好快就會到添..

我哋就係行呢D Rally 賽車行嘅路，隨時都會俾D泥食住條軚，又會撞車底