2010 土耳其自駕之旅 (23) Day 3 -Lunch@Edremit

2010 土耳其自駕之旅
Day 3  23/10/2010  - Lunch@Edremit

Çanakkale > Truva Arkeolojik Kenti (特洛伊遺跡)(Truva)
> Lunch@Edremit > Bergama Akropolis (衛城)(Bergama) > Kizil Avlu (紅色教堂) > Izmir > Residence Comfort Izmir @ Izmir

呢個土耳其都放低咗成差不多兩年啦，終於都到寫土耳其啦，因為今次土耳其自駕真係非常難忘，一定要寫低佢先得(雖然我其實已經寫低咗係本簿仔到，但係都係想同大家分享下)，希望快D完成佢啦。之前個兩日已經寫咗，家下由第三日開始寫返，好多嘢都要靠睇相同睇本簿仔記返...呢一次自駕最驚險就係Day 3呢一日，同埋重有一日係生死時速，透露少少先。就係有一日當揸緊架車去緊一個景點時，有一架車係我前面行行下駛咗落坑...之後發生D咩事呢?大家遲D就會知...  ....去片...

睇完隻木馬，我哋就驅車去Bergama喇。由Truva去Bergama需時3個幾鐘，我哋睇完都成十點幾差不多十一點先走人，大約揸咗個幾鐘到，行咗一段山路，都無咩車嘅，因為第一次用呢個GPS，所以基本上又無懷疑過佢有問題喎，但係當時條路一架車都無，感覺好似有D問題，好在都重係行緊蠟青路，揸咗一段無人之路成半個鍾有多，終於都見到有個鎮仔係前面，個前面唔好以前好近呀，其實都重要揸成二十幾分鐘架。之後就到咗一個叫Edremit嘅區，見到都係食Lunch時間就周圍搵下嘢食，咁啱附近有個Shopping Center，我哋就去睇下有無嘢食啦。

上到去呢個Center嘅頂樓有個Food Court，其實都唔係咩Food Court，得個幾間食店，睇咗一輪揀咗一間入去叫嘢食。點解去呢一間呢，因為佢有相囉，我哋咪睇咗D相啱心水嘅就指俾佢哋睇啦，叫咗一個包同埋一個叫inegol Kofte Tarifi，睇個樣都幾好食咁，應該係D烤肉..個店員又介紹咗D嘢食叫我哋試下，又幾好食喎...

係等食期間，無神神有三個土耳其嘅青年人行埋來同我哋搭訕喎，又同我哋扼手喎，非常之熱情。又問我哋來做咩，佢哋又講自己幾多歲做D咩嘢咁，不過三個當中，得一個可以溝通到，其餘個兩個就只可以答一兩句。

呢一間餐廳D嘢食都幾好味，重有就係應該似D歐洲文化，D包係任食架，佢哋見我哋食完一籃，又攞多一籃俾我哋食。嘻嘻~~之後我哋重攞走咗兩個包走，等如果係車到肚餓都可以食下嘢呀嗎~~~真係又食又拎呀...
呢一架就係我哋架戰驅啦...隻色開頭睇唔慣，睇睇下又覺得幾好睇喎..

行咗成半個幾鐘先見到個鎮咋~~

係Shopping Center入面嘅食店

我哋就係揀咗呢一間

呢D包係任食架...

呢一隻桃汁幾好飲架

呢一間原來係土耳其好多地方都有分店，不過我哋覺得呢一間好食D

inegol kofte Tarifi應該係烤肉來嘅...幾好食，個條青色嘅係辣椒，但係又幾好食個喎..

我哋重叫咗個包，呢個包係餐來嘅，包飲品

d薯條好好食架

佢哋送咗個甜品俾我哋，好甜架，食一粒就無所謂，但係兩粒就到頂喇...但係人哋送嘅點都要食晒佢

又送咗杯土耳其茶俾我哋飲喎，好好飲架...