~~~活在當夏~~~: 2015 北海道自駕美食之旅

2015/12/25

2015 北海道自駕美食之旅 - Day 2 18.10.2015

18/10/2015 (星期日) Day 2

札幌 > 富良野 > ふらのチーズ工房(芝士工房) > アイスミルク工房 (Ice Milk工房) > ふらのピッツァ工房 (Pizza 工房) > 富良野市集Furano Marche > 午餐 @ 回転寿司トピカル > 美瑛白金青い池 > 白ひげの滝 > 哲學之樹 > Ken 和Mary 的樹 > 雲霄飛車路 (ジェットコースターの路) > 超市 > Chalet Fuyuri(CHALET 富遊里) > 晚餐 @ 札幌軒 > Chalet Fuyuri(CHALET 富遊里)

今日我哋係會離開札幌向北行，會去富良野，不過呢段時間去應該係無咩嘢睇，但係又唔想揸咁耐車，因為之後有幾日會幾長車程，所以就揀係富良野住一晚。搵住宿個時，富良野D平靚正酒店俾人訂晒，都唔知點解喎。

食完簡單早餐我哋就出發啦，我哋今日會去富良野，全程行無料道路，我哋大概0900出發，要1130到先到第一個景點~~~ふらのチーズ工房(芝士工房)，泊好架車就入去睇下嘢，呢到其實又係個D可以Join學整嘢嘅地方，不過我哋就無咩時間玩呢D嘢，睇下就算。呢到重有アイスミルク工房 (Ice Milk工房)同ふらのピッツァ工房 (Pizza 工房)，我哋係アイスミルク工房(Ice Milk工房)到買咗支軟雪糕食，味道都唔錯嘅，但係就唔係太重奶味。去埋隔離嘅ふらのピッツァ工房 (Pizza 工房)睇睇，睇個款好似係食 Pizza 嘅，但係唔知可唔可以自己整來食嘅呢 ?!

之後我哋就去富良野市集Furano Marche到行下睇下有無嘢食，有就有嘅，不過都係D輕食來嘅。咁我哋就上返架戰車到，用個 GPS 入面搵下附近有無回転寿司食啦，又搵到間喎，咁就去呢一間到食喇!!

我哋叫咗D三文魚子、帶子、海膽之類嘅寿司食，味道真係唔錯，重叫咗一個蟹湯，入面有好多蟹肉係到架，我哋重試咗秋刀魚寿司，第一次食，佢會加埋D薑同埋荵落去，味道好Match個喎，幾好味!!

之後我哋就去睇呢個美瑛白金青い池，由富良野去都要成50分鐘。去到都幾多人係到，可能係大景點呢 !! 我哋去到個時個天陰陰哋，唔係太靚~~不過我哋都係呢到影咗唔少相。之後就去附近嘅白ひげの滝，呢到有一條瀑布，我哋係條橋到影落去，如果有時間其實附近係有條路可以行落去睇下嘅。不過我哋個日就又大風又有DD雨，重幾凍下，所以我哋影完就走人啦~~~

係呢個富良野同美瑛有幾棵出名嘅樹，其實都係樹一棵，我哋睇咗兩棵，分別係哲學之樹同Ken 和Mary 的樹，有去搵過 Mild Seven 個棵，不過去到個樣都唔似，都唔知點一到先係。然後我哋就去咗睇呢個雲霄飛車路 (ジェットコースターの路)，等咗好耐都無車駛過，都睇唔到有飛車~~~

最後我哋都係唔等，因為又係好大風又有雨，又凍，所以我哋影完就走人啦~~~之後就返去富良野住宿喇。返去富良野途中見到有一間幾大嘅超市，咁我哋就入去睇下有咩買啦。係入面聽到有人講廣東話，睇來都係香港人來架喇。我哋買咗少少嘢之後就繼續行程，來到北海道五點幾就天都黑晒。我哋返到去富良野個時5點幾到，不過我哋間住宿個位置比較難搵D，搵咗差不多20分鐘先搵到。今晚我哋住 Apartment ，係一棟~~~下面係睡房，樓上係客廳、廚房同浴室~~~都幾大下。個館主好細心咁講屋入面每一樣嘢，放好晒D嘢之後我哋就去搵食，又用個車嘅GPS去搵，點知都無個間食店嘅。好在附近有一間食拉麵嘅 - 札幌軒，我哋就入去幫襯啦，由兩個公公同婆婆主理。我哋叫咗兩個麵同埋一個餃子食，地道麵店，味道都唔錯喎，價錢重要唔係好貴 ¥1950 ，都幾抵 !!

食完我哋就返洗下衫，因為有部幾勁嘅洗衣乾衣機係到~~~同食柿同埋飲牛奶，網上面D人話北海道嘅牛奶好好味架嗎 !! 個柿都幾好食，牛奶呢….奶味都幾重，但係無想像中咁濃!!

住宿 : Chalet Fuyuri(CHALET 富遊里)(Booking.com)

地址 : 〒076-0035 富良野市学田三区2264番-4 電話 : 81167220534

費時 : 12960日圓 (禁煙雙床房) 泊車 : 0日圓 Car Park MC 450 058 202

GPS : 43.34614587635327,142.36236331865348 MC 450 058 238

景點 :

ふらのチーズ工房 (MC 550 840 171; Tel 0167-23-1156)，入場無料，停車場都係無料

アイスミルク工房 (Ice Milk工房) 、ふらのピッツァ工房 (Pizza 工房)，全部係埋附近

北海道中心標就在小學校園內(MC 349 031 074; tel 0167-39-2312)

富良野神社 (MC 349 001 878; tel 0167-22-2731)

富良野市集Furano Marche (MC 349 001 775; tel 0167-22-1001)

富良野駅 (MC 349 032 312)