~~~活在當夏~~~: 2015 北海道自駕美食之旅

2015/12/27

2015 北海道自駕美食之旅 - Day 11 27.10.2015

27/10/2015 (星期二) Day 11

帶廣市 > 十勝千年の森 > 日勝峠 > 白老和牛烤肉 > 櫻木橋 > 登別地獄谷 > 大湯沼 > 奧の湯 > ホテルまほろば

今日起身見到個天氣都唔錯，天朗氣清咁。本來預先計劃過會去一個叫襟裳岬嘅地方，不過睇落路途都幾遠下，來回要成差不多四個鐘，所以就無去到。呢一間DonrmyInn嘅早餐都唔錯，有自製嘅豚肉丼食，又有燒帶子(雖然細隻咗D)，重有巨峰提子同菠蘿添呀。

食完個美味嘅早餐，我哋就去一個叫十勝千年の森嘅地方，去到門都未開，睇個牌見到好似話係休息，咁我哋就去附近兜下睇下有無嘢睇喇。不過最後都係無嘢搵到嘅，準備走人去下一個地方。點知路過頭先個停車場見到多咗幾架車，而個個十勝千年の森又開咗門喎，其實呢個十勝千年の森有咩睇嘅呢?佢有得玩一種叫做 Segway 嘅嘢，之前係網上面見人玩過導覽團，可以係個千年の森入面玩架，不過就要有人Guide住先可以玩，但係價錢就當然唔平啦。費用係 ¥8,800 兩個鐘，有30分鐘係講解，90分鐘係導覽，不過重點係要預約嘅。其實睇落都幾好玩架，不過我哋就無玩到。入到去，見都有兩班人係到，有一班應該係香港人，另外一班講普通話，可以係台灣人。我哋本來想行入去呢個千年の森，不過似乎係要有人參加D導覽團先可以入去睇(今日Check返原來入去行下都要¥2,000個喎)，所以我哋最後都係混吉無入到去玩。如果再去，我諗會Join個Segway 玩下!!

好，混完吉我哋就向我哋今晚住宿嘅地方登別出發，但係我哋會途經一個叫白老嘅地方，呢到有個好出名嘅嘢食，就係白老和牛。開頭都係係網上面見到有人食過，咁啱我哋會路經此地，咁當然試下喇。我哋係千年の森大概10點鐘就走，因為路程到唔短，就睇下行有料道路要幾多錢先，個GPS話要 ¥4,8xx到，不過我諗應該要差¥5,000，同埋睇返個行車距離其實同行無料差不多，所以都係行返無料喇。

行行下我哋見到有個叫日勝峠嘅地方，咁我哋就入去睇下喇，其實最主要係去廁所啫 ! 係未到去嘅時候都已經見到好多架旅遊巴經過，入面有間商店人頭湧湧，好多人係到買嘢，當然又係有得試食啦。重見到有好多架軍車出現添呀，D軍人好似都係去廁所。我哋就係到影下相，之後就繼續行程。由日勝峠去白老係要行山路，其實如果前面係無大車的話，可以行下幾暢順下，呢一段路係會途經D山路，好多段路都舖晒雪。

去到白老町個時，見到有間回転寿司，本來打算入去食嘅，不過最後都係決定食呢個白老和牛。去到白老食白老和牛嘅店舖都成點幾鐘，我哋入到去都重有一枱客係到。我哋揀咗個 Sirloin Steak ，但係無晒，因為呢一個係 Special Menu ，平時就 ¥4,400 ，家下就只係 ¥3,300。咁我哋就揀咗個特選嘅 Sirloin Steak，要 ¥4,900，同埋要咗個 Ramp Steak ，要 ¥2,500，兩個都係Set來嘅。如果唔係要揸車，加埋個啤酒應該會好好味。

呢到係用炭來燒D肉嘅，所以都幾大煙下。不過當件肉放咗係枱面嘅時候，未食都已經覺得會好好味!!因為件牛排嘅油脂分佈係非常之均勻嘅。好啦，一燒嘅時候，用唔係好多嘅時間就可以燒熟咗，而個件Ramp都係好好食，入口非常之淋，而件Sirloin 就又淋好有牛味，兩種肉都係唔洗點咬就得，重要係好滑嘅!!呢一餐暫時係我哋來到北海道食最貴嘅一餐，但係就非常之值得，因為係香港用呢個價錢應該係食唔到，有一次去香港洲際酒店嘅 THE STEAK HOUSE winebar + grill 食咗件港幣八百幾蚊嘅都無呢兩件咁好食，呢一餐其實都唔洗港幣五舊水! 超值 !!

食完，我哋就繼續行程喇。行行經過一個地方，叫網元動感市場，好多跟過團去北海道嘅都好大機會來呢一個市場到食過嘢。所以，我哋經過嘅時候就覺得好似似曾相識咁樣，不過我哋停係呢到最主要係去廁所啫!!

去登別地獄谷途經櫻木橋，叫得櫻木，當然係睇櫻花嘅地方，不過都有一兩棵嘅紅葉樹係到。之後就去登別地獄谷到睇嘢，呢到停車場係要俾錢泊車嘅。去到地獄谷嘅時候都幾多旅遊巴泊咗係到，當然啦，呢一個都係一個大景點來架嗎。不過我哋落車行嘅時候有D開始落雨，咁就快快睇完先喇。我哋去睇咗呢個大湯沼、奧の湯同地獄湯，再去埋呢個日和山展望台同埋泉源公園，之後就去酒店到 Checkin 喇。

呢間酒店係我哋成個旅程最貴嘅一間酒店，我哋係一泊二食嘅，晚餐係食三大蟹宴，所以都幾期待。不過用餐嘅時候都其多人，重有好多都應該係強國人來嘅。除咗D蟹比較特別D之外，其餘嘅嘢食都係一般。食完我哋就休息下然後去浸溫泉，男湯個一邊無露天，但係女湯個一邊就有。係我浸浸下個時，有四個(兩個大人同兩個小朋友)可能係強國人嘅人入咗來浸，睇住佢哋完成無洗身就咁就浸落D水到。嘩!!我睇到眼到突出來，之後我就睇住佢哋浸過邊到，個到我就唔去浸!! 唉~~有呢D人係到嘅地方都唔係咁好~~~

住宿 : ホテルまほろば (包早晚餐)

地址 : 〒059-0551 登別市登別温泉町65番地電話 : 0143-84-2211

費時 : 23000日圓【30日前早割】毛蟹・ズワイ蟹・タラバ蟹　三大蟹食べ放題バイキング(和室8畳)

泊車 : 0日圓 GPS: 42.49312703,141.14188964 MC : 603 257 794

景點:

十勝千年の森 (MC 608 059 862 GPS 42.93539651,142.86901127)

襟裳岬 [えりも町] (十勝與苫小牧之間) (MC 765 015 751)(GPS: 41.92646891,143.24658906)

白老和牛烤肉 (MC 545 226 534 GPS 42.56557003,141.38633296) Tel. 0144-82-5093白老牛の店いわさき

櫻木橋 Tel.0143-83-3311 MC: 603 170 590 *28 GPS 42.46635562503158,141.168581685529

登別地獄谷MC: 603 288 425 GPS 42.49808186773296,141.14775195452896

大湯沼 MC： 603 288 875 *28 GPS : 42°30'08.2"N 141°08'56.5"E

登別熊牧場MC 603 257 773 GPS 42.49289603,141.14443728