~~~活在當夏~~~: 2015 北海道自駕美食之旅

2015/12/27

2015 北海道自駕美食之旅 - Day 10 26.10.2015

26/10/2015 (星期一) Day 10

釧路 > 釧路濕原(細岡展望台) > 釧路濕原駅 > 細岡駅 > 達古武湖 >塘路湖(塘路湖エコミュージアムセンター「あるこっと」) > 和商市場 > 道の駅しらぬか恋問 > 十勝が丘展望台 > 幸福駅 > 愛国駅 > 帶廣駅 > 帶広市。長崎屋 > 天然温泉白樺の湯　ドーミーイン帯広

今日我哋差不多成0700先起身，因為聽唔到鬧鐘響，起身即刻快手快腳去洗面刷牙。呢一間SuperHotel嘅麵包都幾正，係佢哋自己新鮮整嘅，焗完即刻就會擺出來，所以非常之美味!!

雖然今日遲咗起身，但係我哋都可以係0830到就可以出發，今日第一個景點就係釧路濕原(細岡展望台)，去到呢個濕原，係喎~~~點解叫濕原唔係叫濕地嘅?打打下先發覺好似有D同香港唔同，不過其實日本嘅濕原即係香港叫嘅濕地，我睇網上嘅資料加上我嘅幻想，應該係指濕地嘅平原，所以簡稱濕原，呢個係我自己嘅推測來嘅啫~~~講返個行程先!! 我哋去到呢個濕原，又係見到黃草一片，如果成塊地都係枯草其實都幾靚架!影咗幾張相就再去附近嘅釧路濕原駅，本來想揸架車去嘅，不過行行睇到條路好似幾難行，所以都係行入去算。

北海道D火車站都幾過癮，就咁一個站係到，入面咩都無，但係外型又幾靚個喎!!睇完就去睇呢呢達古武湖，途經細岡駅又入去影張想先!不過個達古武湖我哋路過咗就無影到相，然後就去塘路湖。呢個塘路湖有個資料中心係到，入面都幾多嘢睇，不過我哋最大嘅目的就係去廁所!今日其實都幾大風，不過就無早兩日咁勁!原來係一道寒流吹咗來，所以北海道比平時早咗凍!

之後我哋就返去釧路市，去咗和商市場到行下同埋睇下有無咩食先。其實呢個和商市場都係一個街市，不過特別在於佢入面有D食嘢同埋買嘢，食嘢就係勝手丼，不過其實價錢都唔平。我哋行咗個行市一圈，入面除咗海鮮賣之外，重有D手信買，我哋係重見到有Kinki魚賣，價錢重要唔係好貴，不過我哋諗應該無得就咁買來當做魚生食。行到去賣勝手丼嘅檔口，發現其中一檔有得賣Kinki魚魚生，咁我哋就去附近嘅一檔到買返個飯先，個飯有分大、中、細~~~之後就去呢一檔都買魚生。我哋買咗細飯要 ¥160，魚生就買咗 ¥1695，包括金眼鯛(kinki魚)、拖羅(非常肥美)、八角魚、三文魚(呢段時間係三文魚嘅季節)，不過其實加埋唔係有好多，所以計返其實都幾貴下 !!

食完我哋就要離開釧路去帶廣，我哋途經呢個道の駅しらぬか恋問，見到食Lunch嘅時間，個時都成1230架喇，雖然頭先啱啱半個鐘前食咗個勝手丼，不過唔係大碗，重要係Share嘅，所以基本係已經肚餓架啦!!我哋一入到去呢個道の駅就聞到一陣好香嘅味，呢個站嘅餐廳嘅豚肉丼都幾出名架。我哋去到個時都要等咗一陣，不過其實入面都有好多位，到我哋坐咗一陣已經好多人來到，重要排除等位添。我哋叫咗兩個豚肉丼，一個大同一個普通。都真係幾好食個喎，尤其係佢個D汁，會令你不其然食多好多飯，我差D忍唔住要食晒成碗飯添。食完就係行咗一陣個商店，就繼續行程。

之後我哋就去咗呢個十勝が丘展望台，呢個展望台我哋都搵咗一陣先搵到，因為個GPS唔知點解帶咗我哋去咗附近嘅一個高爾夫球場到。本來想走人嘅時候見到有個路牌係寫住展望台，咁就人肉GPS去搵啦。不過今日有D煙霞，望得唔係好遠。影完我哋就去幸福駅同埋愛国駅，呢兩個車站其實都已經係無用到架啦，變咗做旅遊點。個到放咗兩架火車係到，個站同埋架火車入面都貼滿咗一D紙，我哋諗應該係附近嘅店舖到有得買來寫嘢然後貼上去嘅。

睇完就去住宿，今日我哋係住呢個DormyInn嘅。Checkin完我哋就出去行下，行咗去帶廣駅同埋長崎屋到行下，個站都幾大下。反而間長崎屋就無咩特別嘢睇啦~~~之後我哋就係帶廣駅入面食咗個豚肉丼，無Lunch個個咁好食。食完就行返去酒店到，原來係酒店附近有條街同埋一個幾大嘅商場，不過我哋差不多七點去到，佢哋全部都閂咗門，無得行~~~加上又幾凍下，所以我哋都係返酒店浸溫泉，之後就休息了~~~

住宿 : 天然温泉白樺の湯　ドーミーイン帯広 (包早餐)

地址 : 〒080-0012 北海道帯広市西2条南9丁目11-1 電話 : 0155-21-5489

費時 : 9890日圓 (☆禁煙☆コンフォートルーム（17平米）) 泊車 : 1000日圓

GPS:42.9218211,143.20166474 MC : 124 624 290

景點:

釧路濕原停車場 MC 149 654 767 GPS 43.10112506089059,144.45077987287988

細岡展望台 MC 149 654 402 GPS 43.097795392759124,144.4493901416162

釧路濕原駅

細岡駅 MC 149 686 322 GPS 43.105400899312315,144.46884153262414

塘路湖

達古武湖

塘路湖エコミュージアムセンター「あるこっと」 (MC 576 841 128)(GPS: 43.15373555,144.50670224)